L’Archivu d’Indianos y Muséu de la Emigración asítase na monumental Quinta Guadalupe, construyida ente 1905 y 1906 por orde del indianu Íñigo Noriega Laso, gracies a la fortuna que llegare a amasar en México. Esti indianu nunca vivió, sicasí, nesta quinta, que tuvo dellos usos a lo llargo del sieglu XX, ente ellos residencia hospitalaria o centru d’auxiliu social. Anguaño acueye’l principal centru d’estudios y divulgación asturianu alredor de la figura de los indianos y de la emigración asturiana a América, cuntando con un archivu escelente de fontes documentales relatives a esti procesu emigratoriu que marcó la vida d’abondos conceyos asturianos nos sieglos XIX y XX. Nes plantes del palacete espónse una colección mui rica relativa a la vida de los asturianos n’América, recalcando na historia de los centros asturianos d’aquel continente.

La quinta Guadalupe ye una construcción de planta cuadrangular con cuatro pisos, y dos torres a los llaos norte y sur, too ello construyío con unes dimensiones colosales, propies d’un palaciu auténticu. Ta arrodiada d’un xardín pergrande.