Basílica de Santa María del Conceyu

Les primeres referencies documentales d’esta ilesia daten del sieglu XIII, anque primero d’eso yá ye probable qu’hubiere equí una capiya dedicada a La Madalena. Ye ún de los grandes testimonios del góticu asturianu y declaróse Bien d’Interés Cultural en 1991. Na actualidá configúrase como una ilesia de planta cenciella que tiende al rectángulu, con una torre cuadrangular con campanariu na parte occidental de la cabecera. Cunta con trés naves, coru y cabecera poligonal. La cubierta faise con bóveda estrellada nel casu de la nave central. Les naves llaterales tienen bóveda de crucería, mentes que la cabecera cubre con bóveda nervada de llunetos oxivales. Na portada occidental, al llau de la torre, cunta con un arcu de mediu puntu con arquivoltes lises, columnes, capiteles y un frisu corríu, decoraos con motivos antropomórficos y zoomórficos. La portada del llau sur dispón d’un pórticu del sieglu XVII que protexe una puerta configurada como un arcu oxival con cinco arquivoltes sobre columnes y xambes abocelaes, con decoración antropomórfica y vexetal. Destaquen los retablos del interior, de los sieglos XVI y XVII. Nel retablu mayor, d’estilu platerescu, pue vese una talla de Santiago Pelegrín.

Xunto a la cabecera ta apegada la casa rectoral, d’estilu neogóticu.

Compartir

Ir arriba