Casa de gran porte, con cuatro altures (suétanu, dos pisos y sobráu), con cubierta a dos agües. Ta nuna finca arrodida por una muria de piedra y rexa, que da accesu a un camín que va a la entrada principal del edificiu, mui destacada, depués d’una escalinata de xubida al porche d’entrada, na exa central del edificiu, embaxo d’un mirador que garra les dos altures cimeres de la construcción. La fachada a la derecha de la entrada principal tien una galería grande.

Trátase d’un exemplu destacáu de vivienda indiana, construyida en 1920 por iniciativa de Ramón Fernández Fernández, indianu que fixo fortuna en México.