Edificiu exentu, de grandes dimensiones, construyíu a últimos del sieglu XVII con suétanu, pisu baxu y dos niveles. La casona llevántase nun solar con un desnivel suave, lo que determina diferencies d’alzáu ente les fachaes. La principal tien dos pisos. Nel centru hai una puerta d’accesu configurada por un vanu adinteláu con dos ventanines abocinaes. Nel pisu d’arriba ábrense cuatro ventanes con balcones de fierro de fundición, con un escudu en mediu coles armes de los Noriega, los Posada, los Pérez y los Calderón. Na fachada que da pa la plaza de Cristu Rei tien delles alliniaciones de vanos cuadraos, arrodiaos por piedra de cantería bien trabayao, y un balcón corríu nel pisu principal, al que s’abren trés ventanes, y que ta cubiertu por un teyadín a trés vertientes.