Edificiu de grandes dimensiones propiedá a lo primero de los condes de Santa Engracia y qu’al entamu del sieglu XX pasa a les manes del indianu Sinforiano Dosal Sobrino, que reforma la construcción anterior en 1908 con un proyectu de Juan Miguel de la Cruz, una de les grandes figures de l’arquitectura asturiana del sieglu XX.

Esti ye un edificiu complexu, con dos niveles y un áticu. En planta, cunta con dos volúmenes, ún rectangular atrás con otru más estrechu delantre, hacia la cai y el Camín de Santiago. La fachada principal ye apaisada, cola entrada principal al centru, precedida d’una escalinata cubierta por un pórticu sofitáu por columnes xóniques de fierro, sobre’l que se construyeron dos miradores superpuestos, que rematen con una mansarda. Sobre los dos niveles d’esta fachada hai una terraza, zarrada con arquinos de piedra. Na parte d’atrás del edificiu llevántase una torre con ventanales grandes cubierta con una mansarda troncopiramidal, que ye l’elementu más representativu de la construcción.

Igual que les demás grandes villes d’esta parte de Llanes, el palaciu queda nel centru d’una finca mui grande, con xardín, separtada de la carretera por un zarru de piedra y rexería.