Capital del conceyu de Ribadeva, con 1.300 habitantes aproximao, asitiada nuna llanada a 110 metros d’altitú. Ente les primeres cites documentales d’esta población destaca la referencia a la nueche que pasó equí’l rei Carlos I depués de desembarcar en Tazones, fechu qu’asocedió en setiembre de 1517.

La gran tresformación de Colombres faise na segunda metá del sieglu XIX y primeros del XX, gracies al patrociniu d’emigrantes a América arriquecíos que deciden construyir nel so pueblu d’orixe unes viviendes espléndides y que, amás, promueven infraestructures y servicios públicos, como la propia plaza central, la trayida d’agua, l’hospital asilu o’l cementeriu. Estes construcciones y servicios coexisten con dellos exemplos del Colombres tradicional, en forma de viviendes ente cortafueos, con galeríes o balcones de madera, que se concentren en dalgunos barrios del norte de la capital.

Colombres declaróse Conxuntu Históricu en 2013 y Pueblu Exemplar d’Asturies nel 2015.