Llanes

Capital del conceyu del mesmu nome, ye una de les grandes villes d’Asturies. Tien l’orixe na repoblación de la costa cantábrica impulsada pola monarquía castellana na Plena Edá Media. Nel casu concretu de Llanes, la so fundación débese a la carta puebla concedida pol rei Alfonso IX en 1228. Depués, monarques como Alfonso X el Sabiu, Alfonso XI o los Reis Católicos, concediéron-y o confirmaron dellos privilexos comerciales y fiscales, lo qu’ayudó a la medría de la población nesti periodu medieval. La villa taba amurallada (entá se caltienen dellos cachos d’esi recintu murariu y dalguna de les torres, como la qu’anguaño acueye la oficina de turismu) y dientro desenvolvióse una rede de cais alredor de la ilesia de Santa María del Conceyu, principal templo d’un llugar onde se caltienen exemplos destacaos d’edificios d’época gótica, renacentista, barroca y contemporánea, momentu nel que la villa rebasa’l perímetru amuralláu medieval y s’esparde en toles direcciones.

Llanes asítiase a la oriella del mar Cantábricu, a 11 metros d’altitú, alredor de la desembocadura d’El Ríu Carrocéu. El so puertu foi una de les principales puertes del comerciu asturianu en dómina medieval y moderna: hai testimoniu d’intercambeos con puertos de tola Europa atlántica. Tamién foi un puntu de llegada d’abondos pelegrinos a Santiago que siguíen el Camín a la tumba del Apóstol dende equí per tierra.

Compartir

Share on facebook
Share on twitter
Share on linkedin
Share on pinterest
Share on email
Scroll to Top