Edificiu promovíu por Ramón de Argüelles, marqués d’Argüelles, como regalu de boda pa la fía, María Josefa de Argüelles, heredera del títulu. Foi ésta la so residencia de branu y puntu d’alcuentru de l’alta sociedá llanisca de primeros del XX.

L’edificiu obedez a un proyectu del contratista local Juan Sordo Mijares, inspirándose nel palaciu de Vistahermosa de Madrid. Ye un palacete de planta rectangular, con suétanu y dos pisos, d’estilu neoclásicu, mui conteníu.

La fachada principal, que recuerda nel diseñu a una villa del Renacimientu italianu, cunta con un gran remate en forma de frontón triangular. Nel pisu d’arriba hai un balcón bien ampliu con antepechu de piedra a lo llargo de los trés güecos centrales. Nel pisu d’abaxo, una escalinata esterior de tramu doble da pasu a la puerta principal.