Palaciu de Partarríu o Villa Parres

Palacete acabáu de construyir en 1908 por encargu de José Parres Sobrino, políticu eminente del cambéu del sieglu XIX al XX, qu’ocupó cargos como diputáu o senador, perteneciente a una familia d’indianos arriquecíos que promovieron, xunto a otros, la urbanización de la cai Pidal, pela que pasa’l Camín de Santiago nel so discurrir pa contra’l centru de la capital llanisca.

El palacete, arrodiáu por una finca qu’antaño tenía un xardín mui destacáu, too ello zarrao por un muriu de piedra y rexa de fierro forxao pa contra la cai, cunta con dos pisos, áticu y torre. La planta ye un cuadráu del que sobresalen en cada llau cuerpos mui desarrollaos n’altura y qu’avancen sobre esa planta cuadrangular. La fachada principal articúlase alredor d’una exa central a la que s’entra per una escalera de doble accesu en paralelo a la fachada del edificiu y ta rematada por una torre.

Hai abondos elementos decorativos qu’arriquecen la fachada, casu de l’alternancia de ventanes y vanos adintelaos con otros de remate n’arcu de mediu puntu, amás de remates de piedra en forma de pirámides, xarrones o bolones.

Compartir

Share on facebook
Share on twitter
Share on linkedin
Share on pinterest
Share on email
Scroll to Top