La capital del conceyu del mesmu nome allúgase na desembocadura del Sella. El nucleu tradicional allúgase na vera derecha del ríu, mentanto que dende últimos del XIX medraron los barrios de la otra oriella, xunto a la estensa playa de Santa Marina. El nucleu urbanu surde oficialmente en 1270 cola Carta Puebla concedida pol rei Alfonso X. Cuntaba con un puertu y nun tenía muralles, siendo les cais Guillermo González y Escura actuales el nucleu de la población. Nel sieglu XVI el mieu a incursiones marítimes llevó a fortificar el cerru de Guía.

La rellación de Ribeseya col Camín de Santiago data lo menos del sieglu XV. En 1486 documéntase la existencia d’un hospital de pelegrinos baxo l’advocación de San Sebastián, que nel sieglu XVI pasó a denominase de San Roque.