Santa Cristina de Ḷḷena

La capiya de Santa Cristina de Ḷḷena, asitiada enriba d’una llomba que domina’l valle d’El Río Ḷḷena, ta ensin dulda rellacionada coles obres de Naranco, anque detecta más tosquedá ornamental.

Pudo desenvolvese na dómina de Ramiro I (842-850) o na del so socesor Ordoño I (850-866), pero siempre depués del maestru que crea l’estilu ramirense.

La so estructura estrémase de la d’otres ilesies de la Monarquía Asturiana. Consta d’una nave única, rectangular con cuatro salientes pequeños, tamién rectangulares, ún nel mediu de cada muriu esterior (pórticu, cabecera y habitaciones llaterales).

Tolos espacios tán abovedaos con bóveda de cañón sobre arcos faxones, y la construcción ta encontada al esterior con munchos contrafuertes.

La nave tien cinco tramos, definíos polos arcos faxones que se sofiten nuna arquería ciega que percuerre los murios llaterales. La cabecera ta constituyida por un cuerpu saliente. El so pavimentu y lo del últimu tramu de la nave tán más altos y xúbese a ellos per dos escaleres llaterales.

Esti espaciu ta xebráu de la nave por un gran iconostasis formáu por trés arcaes sobre capiteles y columnes, decoráu con güecos rectangulares zarraos por celosíes calaes y un cancel visigodu.