Prerrománicu asturianu

Pudiere abultar que’l términu prerrománicu define un periodu entá imperfectu, anterior al románicu hexemónicu; sicasí, tamos énte la etapa final rellumante onde cristalicean tradiciones que se remonten al arte paleocristianu, que beben del mundu clásicu y que demuestren la participación d’Asturies na vanguardia cultural europea de l’Alta Edá Media. Atesoramos obres fechaes ente los sieglos VIII y X qu’acreíten el desenvolvimientu del Reinu d’Asturies, comparable al de les cortes bizantina o carolinxa, pero tamién de comunidaes monástiques pequeñes, demostrando asina una riqueza intelectual de la que güei apreciamos la so güelga artística. Estos promotores cuntaron con artistes espertos, con gran dominiu técnicu y capacidá simbólica, integrando escultura y pintura o custodiando la orfebrería tan delicao.

Considérase’l conxuntu más completu y homoxeneu d’arquitectura altomedieval d’Europa occidental, xeográficamente concentráu y con una calidá escepcional de caltenimientu del so estáu primixeniu, factores que lu convierten n’únicu. Esporpolló nel momentu d’esplendor máximu del emiratu de Córdoba y trescendió’l so tiempu influyendo na arquitectura europea posterior.

Nuna lóxica perfecta, yá en 1985 la Unesco inscribió delles d’estes obres na so llista de Patrimoniu Mundial, ampliando la nómina en 1998 hasta los seis monumentos asturianos del sieglu IX que güei gocen de privilexu talu. A éstos súmense otres construcciones y pieces artístiques que conviden a percorrer dellos conceyos pa descubriles.

N’Uviéu podemos atopar dellos de los elementos arquitectónicos más emblemáticos y ricos d’esta arquitectura: Cámara Santa, Santuyano, San Miguel de Lliño, Santa María de Naranco y La Foncalada.

Otros edificios tán tamién dientro de la ruta Xacobea, como Santa Cristina de Ḷḷena o Santiago de Gobiendes, configurando un estilu propiu y característicu.

Compartir

Share on facebook
Share on twitter
Share on linkedin
Share on pinterest
Share on email
Scroll to Top