Equipaxe pal Camín

Ye bien importante, cuando se plania’l Camín de Santiago, l’equipaxe que se va llevar a lo llargo de la ruta, con dos elementos fundamentales: la mochila y el calzáu.

EL calzáu ha ser cómodu y convién que yá s’usara en delles ocasiones primeramente. La mochila grande, pero non escesiva, aconseyable la de 30 llitros, con bon apoyu lumbar y con bolsos que dexen accesu a dellos compartimientos.

L’equipaxe nun tien de perpasar el 10% del to pesu y tien d’incluyir chubasqueru o impermeable, gorra o similar y ropa llixero, preferiblemente qu’ensugue rápido.

El sacu de dormir ye imprescindible si va realizase’l Camín al traviés de la rede d’albergues.

Bien importante, anque la solidaridá y el compañerismu tán presentes en tol Camín: nun ta de más llevar un pequeñu botiquín básicu. La crema solar y les gafes de sol son daqué que tampoco tien de faltar.

Si vas faer el Camín en bicicleta: cámares, parches y pequeñes ferramientes, tronchacadenes y timbre, esti postreru va facilitar l’avisu a la xente que pelegrina a pie.

Enantes del Camín

Ha faese un entrenamientu previu col mesmu calzáu y cola mesma mochila y pesu.

Convién preparar bien les etapes sabiendo que munches vegaes pue haber cambios. Ye importante mirar l’agospiamientu previstu y les normes que pueda tener.

La organización del equipaxe va facilitar el caminar, ha llevase lo más pesao embaxo y pegao al llombu.

El calzáu ye fundamental, bota alta, impermeable, trespirable y que nun seya nuevu. Han llevase chancles pal usu nes duches.

Botiquín: antisépticu, material básicu de cura, antinflamatorios, antihistamínicos, antifúnxicos… puen ser elementos que formen parte del mesmu. Quien más conocencia tien ye’l Centru de Salú de la persona que pelegrina, que va faer otros encamientos personalizaos.

Si va faese’l Camín en bicicleta ye aconseyable una bona revisión mecánica.

Nel Camín

Cada persona convién que faga’l camín al so ritmu.

La inxesta abondante d’agua nes etapes ye básica pa una bona hidratación.

El llaváu de manes que seya frecuente.

Ye bien recomendable un repelente d’insectos.

Ha evitase caminar con poca lluz.

Ha tenese procuro colal alimentación y los líquidos. Ye aconseyable llevar frutos secos, chocolate, barres enerxétiques, pan de figu… o cualesquier otru alimentu d’absorción rápido.

Hai que ser respetuosu col Camín y cola xente que pelegrina.

Depués del Camín

Si tuvo cualquier problema de salú que persista a la llegada a la casa, ha visitar el Centru de Salú.

Scroll to Top