Empieza la etapa énte la catedral d’Uviéu, na plaza d’Alfonso II el Castu, arrodiada d’edificios de munchu interés, como’l Muséu de Belles Artes d’Asturies, la Casa de la Rúa (la edificación civil más antigua que se caltién na capital asturiana), la capiya de la Balesquida y los grandes palacios urbanos de Valdecarzana y Camposagrado, güei rehabilitaos y al serviciu de l’alministración de xusticia asturiana. La plaza adquirió la configuración actual a últimos de la década de 1920, cuando se procedió al valtamientu del bloque d’edificaciones vieyes que s’asitiaba frente a la fachada principal de la catedral, que facía qu’énte ella se conformare una plaza porticada mui pequeña a la que se llegaba pela cai de la Platería, tamién desapaecida nesa reforma, que partía xusto frente a la torre catedralicia, pa xubir hasta la cai de la Rúa. Esta reforma urbana tan radical provocó tamién la desapaición d’espacios pequeños como la plazuela de la Balesquida, énte la capiya del mesmu nome, o les güertes de los palacios de Valdecarzana y Heredia. Modificóse, tamién, la conformanza de la cai Schultz, onde a últimos del sieglu XIX valtárese l’edificiu del hospital vieyu de pelegrinos de San Xuan, herederu directu del establecimientu asistencial que se fundó por orde d’Alfonso VI nel sieglu XI.

• Ver ficha: Catedral d’Uviéu
• Ver ficha: Muséu de Belles Artes d’Asturies
• Ver ficha: Casa de la Rúa
• Ver ficha: Colexu Oficial de Notarios
• Ver ficha: Casa de los Llanes
• Ver ficha: Capiya de La Balesquida
• Ver ficha: Palaciu de Miranda-Valdecarzana-Heredia
• Ver ficha: Palaciu de Camposagrado

El Camín sigue, pasada yá la catedral, pela cai Schultz, que ye la primera a mano derecha en saliendo de la plaza, y pasa ente los palacios de Camposagrado (a la esquierda) y Valdecarzana-Heredia (a la derecha).

Ente les cais actuales de Schultz, Xovellanos y L’Águila asitiaba na Edá Media’l gran hospital de pelegrinos de San Xuan, fundáu gracies a la donación del rei Alfonso VI del palaciu real vieyu (el conocíu nes fontes históriques como “palatio frantisco”), pal usu de la ilesia asturiana como centru d’asistencia a los pelegrinos. Esti hospital, de grandes dimensiones, que tenía una capiya y una güerta onde se llabraben yerbes melecinables, tuvo en pie hasta primeros del sieglu XIX. Na so contornada había otru hospital, el de Santiago, tamién rexíu pol obispáu uviedín.

Báxase per esta cai de Schultz y llégase darréu a la plaza de Xuan XXIII, con una estatua nel centru. Crúciase y síguese de frente, pela cai La Lluna, en baxada. A la metá d’esta cai, na vera derecha, tán les escueles de La Lluna, anguaño bautizaes col nome de la famosa escritora uviedina del sieglu XX Dolores Medio.

• Ver ficha: Escueles de La Lluna o de Dolores Medio

Síguese, crúciase una cai perpendicular (la cai Víctor Chávarri) y depués d’unos metros enllázase a la esquierda cola cai Cuadonga y síguese por ella a mano derecha, pasando per delantre de la fachada principal de lo que foi’l monesteriu de Santa Clara, güei delegación provincial de Facienda.

• Ver ficha: Antiguu conventu de Santa Clara

Al pasar el monesteriu vieyu, crúciase otra cai, La Gascona. El Camín sigue de frente, pero si se garra l’esvíu a la derecha llégase, tres de malapenes 200 metros, a la fonte prerrománica de Foncalada, declarada Patrimoniu Mundial en 1998, y una de les construcciones civiles n’usu más antigües del continente européu.

• Ver ficha: La Foncalada

Síguese pela cai Cuadonga, ente edificios modernos nos qu’hai dalguna construcción racionalista d’interés. Pásase la plaza Longoria Carvajal (que queda a mano derecha del Camín) y tres d’una curva enllázase cola cai Melquíades Álvarez, pasando pocos metros más alantre xunto a la ilesia neobizantina de San Xuan el Real.

• Ver ficha: Ilesia de San Xuan el Real

En pasando la ilesia a mano derecha, sigue la ruta pela cai Melquíades Álvarez, que depués d’unos cien metros llega a la cai Uría, la más característica del enanche burgués d’Uviéu, creada pa conectar el centru históricu cola estación de ferrocarril (que queda a mano derecha del Camín, a malapenes 200 metros de distancia del so cruz cola cai Uría). El cruz ente les cais Melquíades Álvarez y Uría produzse a mano esquierda del Camín, onde’l monesteriu de les Sierves de Xesús de la Caridá, cola so capiya apegada.

• Ver ficha: Monesteriu de les Sierves de Xesús de la Caridá

Na otra esquina del encruz hai una vivienda d’estilu montañés, con remate en torre nel chaflán, con fachada a les dos cais.

El camín crucia la cai Uría y sigue derecho pela cai Independencia, llegando poco depués al edificiu de la Escuela universitaria de Mines de la Universidá d’Uviéu, edificiu de la segunda metá del sieglu XX apegáu al históricu Hospiciu de la capital asturiana, sede actual del Hotel de la Reconquista, de munchu interés patrimonial y sede cada añu de los xuraos qu’otorguen los gallardones de los Premios Princesa d’Asturies. Dientro caltiénse, tamién, un refuxu antiaereu de la dómina de la guerra civil española de 1936.

• Ver ficha: Hospiciu Provincial Vieyu
• Ver ficha: Escuela de Mines

Pasada la Escuela de Mines, llégase al poco a l’avenida de Santander; crúciase la cai y síguese escontra la esquierda peles ceres qu’arrodien la llamada Llosa d’Uviéu, la estructura que resalva les víes del ferrocarril y que dexó crear enriba un espaciu públicu axardináu.

Xúbese per esta avenida de Santander y llégase a una rotonda, que se bordia, siguiéndose pa la derecha, pela primer cai a la que se llega en pasando la Llosa. El primer edificiu que queda a mano esquierda agora dexa ver bien a les clares buelgues de los duros combates vivíos n’Uviéu nel primer añu de la Guerra Civil, en forma d’impactos de munches bales na fachada.

Tírase de frente hasta llegar a una estatua del deportista asturianu Samuel Sánchez, onde hai otra rotonda. Nesti puntu crúciase, bórdiase la rotonda y síguese pela segunda cai que s’atopa a mano esquierda y qu’empobina pa la cai de L’Argañosa, pela que se va siguir los siguientes 650 metros, aproximao, ente dellos edificios racionalistes, viviendes de promoción pública de dómina franquista y bloques modernos. Desque se llega a una rotonda, gárrase un esvíu contra la derecha, llegando a un pasu eleváu peatonal sobre les llinies del ferrocarril. Crúciase’l pasu y llégase al barriu modernu de La Florida, configuráu a primeros del sieglu XXI, y per onde sigue’l Camín.

En pasando’l Camín vírase a la esquierda, dexando bloques d’edificios a la derecha y una zona verde pequeña a la esquierda, onde se caltienen les estructures de formigón de dos niales d’ametralladora construyíos cuando la Guerra Civil.

• Ver ficha: Niales d’ametralladora

Déxense atrás y llégase a una rotonda, onde se sigue de frente, hasta llegar a otra rotonda qu’enllaza con una gran pasarela de comunicación col centru d’Uviéu que queda contra la esquierda. La ruta xacobea sigue contra la derecha d’esta rotonda, dexando a mano esquierda un complexu deportivu municipal.

Síguese per esta cai, y depués d’un cruz llégase de siguío a otra rotonda, presidida por unos árboles y qu’incluye un monumentu pequeñu dedicáu a la pelegrinación xacobea, obra de l’artista asturiana Pilar Fernández. Bórdiase la rotonda y síguese derecho, pa llegar a un espaciu verde que s’arrodia; tuércese a la esquierda y pásase al pie d’un centru educativu. Na siguiente cai xírase a la derecha y depués a la esquierda, llegando a una cai pela que se sigue hasta’l siguiente cruz, onde se tuerce a la derecha, pa garrar de siguío, desque se pasa un reguerín, una pista de tierra y piedra qu’apaez a mano esquierda, ente árboles.

Esti Camín, tres d’un encruz con una cai ancha, enllaza, al siguir de frente, cola carretera local que xube contra San Llázaro Paniceres.

• Ver ficha: San Llázaro Paniceres

Depués de circular unos 400 metros ente praderíes, con bones vistes a la esquierda de los barrios de La Florida y El Cristo, llégase a un primer nucleu de viviendes, en La Trapa; síguese derecho, ensin garrar esvíu nengún, ente dalguna vivienda y praos, dexando un esvíu a mano derecha y otru a mano esquierda. Llégase entós a un biforcu de caminos onde la vía sigue pela carretera que va pela esquierda (na derecha empieza la vía que lleva a La Pachuca y La Braña); báxase ente praos y dalguna vivienda sola, hasta que nel siguiente cruz tuércese a la esquierda, contra Villamar. Empieza equí una xubiduca ente praos hasta qu’unos 150 metros depués gárrase un esvíu a la derecha, per una pista de formigón que xube con praos a la esquierda y árboles a la derecha, pa llegar 200 metros depués a un petuñín de viviendes, onde se sigue de frente.

Entra entós el Camín nuna zona de praderíes, con bones vistes a la esquierda del valle. Síguese derecho, per una xubidina, hasta enllazar con otra pista formigoniada; nesti puntu ha siguise contra la esquierda, pasando darréu de frente énte otru esvíu a la esquierda. Principia equí un percorríu con una baxada suave, ente praderíes y dalgún árbol aisláu arrodiando’l Camín; llégase doscientos metros depués a un biforcu de víes, onde hai que garrar la que sigue pela derecha, con árboles a entrambos llaos de la ruta pa baxar depués suavemente ente praos y carba, con bones vistes a la derecha, y ensin garrar nengún esvíu de los que van apaeciendo. Llégase asina, tres d’unos 900 metros de percorríu dende’l biforcu de caminos anterior y en xubiendo un recuestu final, al pueblu de Llampaxuga.

• Ver ficha: Llampaxuga

Crúciase una carretera local y síguese per un camín asfaltáu que conduz al poco a la capiya d’El Carme de Llampaxuga, que se llevanta al pie d’un prau, percima d’un llavaderu cubiertu y al llau d’un depósitu pequeñu d’agua, nuna posición dominante sobre les cases d’esti llugar.

• Ver ficha: Capiya del Carme

Pasada la capiya, síguese per una pista de grava ente praos, que s’avera a un altucu, llamáu El Bravín; primero d’él hai un esvíu contra la derecha que se garra, empezando asina una baxada empinada per una pista de grava que pasa ente ocalitos y qu’al poco yá dexa acolumbrar, a mano derecha, vistes dende lo alto de la siguiente población a la que va llegar el Camín, Lloriana.

Tres d’una baxada empinada qu’acaba nun reguerín, xúbese hasta’l llugar de La Pipera, un espaciu verde pequeñu onde hai un llavaderu y un reguerín que se crucia per una pasera de madera. Tamién hai equí dellos bancos y meses de madera.

• Ver ficha: Fonte y llavaderu de La Pipera

Nesta zona de La Pipera, el camín conecta con una carretera local que depués de 150 metros de xubida lleva al pueblu de Lloriana.

• Ver ficha: Lloriana

Llégase énte’l portón d’entrada de la finca onde ta l’edificiu de Villa Rosa y síguese a mano esquierda, en dirección a la ilesia de Santa María de Lloriana, que ta al llau, dientro d’un espaciu verde pequeñu que tien una muria de piedra y rexes. Xunto a la ilesia, pela parte esterior, hai una fonte llavaderu construyida nel añu 1929.

• Ver ficha: Villa Rosa
• Ver ficha: Ilesia de Santa María
• Ver ficha: Llavaderu y fonte de Fuentepeña

Pasada la ilesia y el cementeriu, gárrase’l primer esvíu a la derecha, ente cases. Depués d’otros 50 metros, gárrase otru esvíu a la derecha, dexando a mano esquierda un piñu de viviendes con dos plantes y corredores de madera nel pisu d’enriba. Empieza entós una baxada empinada per un camín asfaltáu (dexando, de la qu’empieza esti percorríu, otru esvíu a mano derecha), ente viviendes soles y praos. La ruta ta encaxonada en bona parte del percorríu por muries de piedra d’altor variable.

Esta pista conduz, depués de daqué más de 400 metros, a la carretera AS-232. Depués, yá nel pueblu de La Bolguina, síguese derecho per una sienda estrecha de tierra paralela a la carretera.

• Ver ficha: La Bolguina

Traviésase d’esta manera’l nucleu de La Bolguina y depués hai que garrar el segundu esvíu a la derecha, qu’empobina a Rodiella y La Vega, pel arcén d’una carretera local que 800 metros más alantre, en Fabarín, conecta cola ponte de Gallegos, llende ente los conceyos d’Uviéu y Les Regueres.

• Ver ficha: Fabarín
• Ver ficha: Ponte de Gallegos

Crúciase la ponte de Gallegos y síguese derecho, per un camín peatonal paralelu a la carretera AS-232, que depués ye una cera que pasa al pie d’un llavaderu cubiertu y continúa, en xubida, ente viviendes unifamiliares, nel llugar llamáu Gallegos, hasta qu’acaba la cera y tien que pasar a circulase pel arcén d’esta carretera autonómica, pasando xunto a una casería con una gran panera delantre (a mano esquierda). El camín dexa la carretera nel primer esvíu qu’apaez contra la derecha, 600 metros aproximao depués de dexar la ponte de Gallegos.

Empieza equí’l percorríu pel llamáu Castañéu del Soldáu, per una pista de tierra con tramos d’empedráu natural, ente árboles de fueya caduco, y paralela más o menos a El Ríu Nora, que conduz al regatu de La Reguerina, que se resalva ensin falta de pasera o ponte, y que da pasu a una xubiduca hasta la entrada del llamáu Molín de Quintos, llugar onde’l camín da un xiru contra la esquierda, pasando a una pista más ancha, primero de formigón y depués de grava, que nuna xubida empruna de más de mediu quilómetru, ente árboles, lleva a unes viviendes unifamiliares, nel nucleu de Los Arroxos; desque se pasa, enllázase con una carretera asfaltada y síguese pa la esquierda, ente los zarros de delles cases y pasando al pie de dellos ivernaderos.

• Ver ficha: Los Arroxos

Déxase a mano esquierda una zona pequeña con bancos nun biforcu de víes, y enllázase de siguío, tres d’una xubida curiosa, cola AS-232. Equí tuércese a la derecha y llégase al pueblu de L’Escampleru, onde hubo a últimos del sieglu XIV un hospital de pelegrinos fundáu por Rodrigo Alfonso.

• Ver ficha: L’Escampleru

Depués de menos de 150 metros, llégase un cruz de carreteres y tien que se siguir pela derecha, garrando la carretera AS-233 en dirección a Avilés. A mano esquierda, a unos cien metros del cruz, la primer vivienda qu’aparez a mano derecha correspuéndese con lo que foi un hospital de pelegrinos, güei mui tresformáu.

Síguese pela AS-233 unos 130 metros, hasta garrar, nel primer esvíu a la esquierda, la carretera AS-234 en dirección a Valsera, nuna zona con unes poques cases. Hai que siguir depués per una cera paralela a la carretera, dexando a mano derecha una gran casona con escudu y una panera de grandes dimensiones completando’l conxuntu.

• Ver ficha: Palaciu de L’Escampleru

Más alantre pásase énte la ilesia de Valsera, a mano derecha del camín.

• Ver ficha: Ilesia de Valsera

Desque pasada la ilesia, síguese pel arcén de la carretera, ente cases de planta baxa y dalguna panera, pa llegar 170 metros depués a un cruz de carreteres.

Pela derecha síguese a Tamargu, mentes que si tiramos pa la esquierda llégase a un piñu de cases, llamáu El Charcón, onde s’atopa l’edificiu de les escueles vieyes de L’Escampleru, qu’agora acueye un albergue de pelegrinos. El Camín sigue de frente nesti encruz, pel arcén de la carretera, hasta que daqué más de 400 metros depués, garra un esvíu a la esquierda, desque dexa atrás la zona d’El Bravu, que tien no cimero una vivienda sola y un cementeriu, a mano esquierda de la ruta.

L’esvíu lleva a una pista asfaltada que va ente praos y muries de parceles, de piedra, nel nucleu de Taraniellu, y empieza depués una baxada contra un depósitu d’agua de 1970, qu’en pasándolu tuerce a la esquierda; el camín ye agora de tierra y piedra: primero va ente muries grandes de piedra y depués pasa énte una casa rectoral vieya, de piedra visto, dos pisos y aleru bien pronunciáu.

• Ver ficha: Taraniellu
• Ver ficha: Rectoral vieya

Esta pista empobina a la carretera local. Síguese pel arcén contra la esquierda y pásase ente un petuñín de cases de dos pisos que, desque se pasen, en baxada suave, llégase a la capiya de Fátima de Valsera, a mano derecha de la carretera, allugada nun prau al pie d’un cementeriu.

• Ver ficha: Capiya de Fátima de Valsera

En cuantes se pasa la capiya, gárrase un esvíu a la esquierda, contra’l nucleu de Valsera, per un camín formigoniáu que darréu va pa la esquierda, dexando a mano derecha’l palaciu de los Suárez de Valsera, un  edificiu del sieglu XVII-XVIII, con escudu y con recercos de piedra de cantería nos vanos de la planta fondera y cimera y nos esquinales.

• Ver ficha: Valsera
• Ver ficha: Palaciu de los Suárez de Valsera

Síguese per delantre d’una filera d’edificios ente los que destaca una construcción de dos pisos con un gran antepar abiertu na zona d’embaxo, que recuerda l’estilu de les viviendes d’estilu mariñán. Esti conxuntu tien tamién dos horros.

• Ver ficha: Vivienda mariñana

Depués de pasar esa tira d’edificios síguese contra la esquierda, per un camín asfaltáu ente muries de piedra que, tres d’una curva a la derecha, empieza una baxada per una vaguada ente praderíes bien estenses a entrambos llaos, ensin construcciones a la vista, na zona conocida como El Pedréu, onde, faciendo honor al so nome, abonden los afloramientos caliares na redolada del Camín, qu’en dellos tramos va, amás, encaxonáu ente muries de piedra.

Depués de 750 metros aproximao, llégase a una casa, nel llugar de La Rabaza, al final d’un tramu de camín encaxonáu ente muries de piedra trabayaes en seco. Primero de llegar a la vivienda, gárrase un esvíu a la esquierda, que xube per una pista de tierra y adiéntrase nuna zona d’arboláu, al llau de La Peña l’Aila. Depués d’unos pocos metros, síguese contra la esquierda, nun biforcu de caminos, xubiendo ente árboles pa depués llaniar, con vistes a la derecha al pueblu d’Ania, a lo cimero, cerca de la llamada Cueva Escura d’Ania, d’interés polos restos prehistóricos que nella apaecieron.

Báxase ente praos y muries de piedra pa llegar, tres d’una curva, a una zona conocida como El Picarín, na qu’existe una vivienda con horru, amás d’al esvíu, a la derecha, al molín d’El Picarín. La pista ye equí más ancha, de grava, y empobina a una pontina de formigón sobre El Ríu Andayón. Resálvase’l ríu y empieza una xubida qu’acaba conectando, nuna curva, cola carretera. Síguese entós pel arcen de la derecha, hasta llegar, depués de mediu quilómetru, al nucleu de Premoñu (hai que siguir derecho, ensin garrar un esvíu a la derecha qu’hai al empezar el pueblu).

• Ver ficha: Premoñu

Síguese pela carretera, ente cases y dalgún horru, hasta llegar a la capiya de Santa Ana, con un horru énte la so fachada principal. Esta capiya formaba parte del hospital de pelegrinos de Santa Ana, yá documentáu en 1426 como «abellugu y albergue de los pelegrinos que pasen en romería al apóstol Santiago en Galicia». Esta institución paez que taba na casa de La Portalada, qu’existe tovía na actualidá.

• Ver ficha: Capiya de Santa Ana

Pasada la capiya, síguese de frente pela carretera menos de 400 metros, ente cases, hasta que se llega hasta’l barriu de La Tabierna, conformáu por una placina énte una filera de construcciones pequeñes, a mano derecha de la carretera y con un horru frente al espaciu abiertu. Nesti puntu’l camín dexa la carretera y sigue contra la derecha, garrando la pista de tierra que parte ente l’horru y les cases.

Esta sienda estrecha de tierra, con dalgún tramu empedráu, pasa ente praos y árboles, y de ralo en ralo tamién ente muries de piedra en seco. Confórmase d’esta manera un tramu de la ruta xacobea bien interesante. Confluye la sienda nun cruz de caminos: ábrense frente a la ruta trés víes, y d’elles hai que garrar la central, un camín estrechu de tierra y empedráu natural que sigue ente zarros de parceles y árboles y que conduz al poco a un camín más anchu, con empedráu na parte del mediu, que más alantre va pasar per debaxo del palaciu d’Ardaxe, asitiáu a una cota cimera, tres d’unos praos.

• Ver ficha: Palaciu d’Ardaxe

Al poco llégase a un cruz que conduz contra la esquierda a la ilesia de Valdunu, qu’al pie d’ella afayáronse los restos d’unes termes romanes, con un hipocaustu visible dende l’esterior del templu. El Camín sigue nesti cruz de frente, pasando a bordiar la vega amplia d’El Ríu Nalón en Valdunu, y continúa unos metros más per un tramu empedráu que depués da pasu a una sienda estrecha de tierra, arrodiada por árboles, tramos de muries de piedra y carba. Depués d’unos 300 metros, esta sienda enllaza con una pista de formigón y sigue contra la esquierda, pa siguir ente praos pela gran vega de Valdunu. Queden a mano derecha delles viviendes del nucleu d’El Castiellu, dalgunes d’elles con horros y paneres de grandes dimensiones, amás d’una capiya vinculada a una d’estes construcciones.

Esti camín formigoniáu llega a confluyir nuna carretera asfaltada, nun cruz tres del qu’hai una casería con panera. Tírase contra la esquierda y llégase al poco a la carretera, onde hai que torcer a la derecha. Pásase asina per delantre de la casería mentada enantes y empieza circulase en paralelo a El Ríu Nalón.

Esta carretera conduz al pueblu de Paladín, presidíu no cimero pol gran palaciu de Bolgues.

• Ver ficha: Paladín
• Ver ficha: Palaciu de Bolgues

Llégase al pueblu de Paladín pela carretera, dexando a mano derecha la fonte llavaderu de La Sierra.

• Ver ficha: Llavaderu de La Sierra

Crúciase’l ríu per una ponte de piedra de dos vanos, y síguese contra la esquierda, pela carretera, qu’en xubida suave conduz al siguiente nucleu, el de Puerma, con unes poques viviendes a los llaos del camín, que pasa al pie d’una panera con motivos decorativos tallaos nes sos colondres.

• Ver ficha: Puerma

Tres d’otros 380 metros, aproximao, y en dexando a mano esquierda una casa con horru nun estáu d’abandonu avanzáu, llégase a un biforcu de caminos onde se garra’l que sigue pela esquierda, de manera qu’hai que dir esviándose de la carretera local pela que se venía circulando.

Esti camín ye una pista de tierra y piedra que más alantre da pasu a una sienda de tierra que va pasar a dir pela vera d’El Ríu Nalón, pa transitar depués pela parte posterior d’un petuñín de cases nel llugar de Carril.

• Ver ficha: Carril

Pasaes estes construcciones, sigue’l camín pela sienda estrecha de tierra ente árboles y carba, y llégase depués a una pontiga de madera (bautizada como ponte de Les Xanes) sobre un regatu. Empiézase entós una xubida qu’a los pocos metros lleva a la carretera AS-234 y, desque se llega a ella, hai que siguir pel arcén de la esquierda. En paralelo al Nalón, llégase más alantre al nucleu de L’Aracha y síguese derecho pela carretera, ensin garrar l’esvíu a la derecha que conduz a un conxuntu de fortificaciones de tiempos de la guerra civil española y al llugar de Las Ablanosas.

• Ver ficha: L’Aracha

Tres d’esti esvíu apaez una cera a la vera derecha de la carretera y llégase al poco al llugar de La Venta las Casas y a la ponte de piedra sobre’l Nalón, a la esquierda, per onde sigue’l Camín de Santiago, nuna zona onde atiesten los conceyos de Les Regueres, Candamu (pel so territoriu pasa la ruta unos pocos metros) y Grau.

• Ver ficha: Ponte de Peñaflor

En cruciando la ponte de Peñaflor, síguese pela carretera nacional N-634 contra la derecha, en paralelo a les víes del tren y al ríu. Llégase aína al pueblu de Peñaflor y a la so ilesia de San Xuan, a mano esquierda, nun cruz de víes. Nesti pueblu existió un hospital de pelegrinos dende 1144; promovíu pol rei Alfonso VII xunto a la ponte, tuvo n’usu hasta’l sieglu XVIII, anque hubo que reconstruyilu bien de veces por mor de les riaes del Nalón, que dacuando causaben grandes estroces.

• Ver ficha: Peñaflor
• Ver ficha: Ilesia de San Xuan

Peñaflor destaca pola so arquitectura tradicional, con munches cases con corredores de madera. Atención especial merecen los sos horros y paneres, construyíos sobre bodegues de piedra que davezu presenten un desenvolvimientu grande. Existe un conxuntu interesante sobre manera de dos paneres y un horru desque se pasa la ilesia, a la vera de la carretera nacional, toos ellos con pegollos de madera y de poca altura, que tán sofitaos nunes estancies inferiores construyíes en piedra o mampostería y denominaes caramanchones.

En dexando la ilesia atrás, nel cruz síguese derecho p’adientrase nel pueblu de Peñaflor y abandonar la carretera nacional. Nel siguiente cruz tamién hai que dir de frente, dexando a mano derecha l’esvíu a la estación de tren.

Pásase ente les cases, horros y paneres de Peñaflor. Hai viviendes ente cortafueos, otres con balcones de fierro fundío nos sos vanos principales y otres con corredores de madera. Tamién ye posible ver dalgún escudu.

• Ver ficha: Casa de la Obispalía

El Camín traviesa’l pueblu y llega depués a un cruz de caminos, con una muria alta de piedra al frente. Tien que se siguir entós a mano derecha, contra un pasu inferior per debaxo de la llinia del ferrocarril, conformáu como un arcu de mediu puntu construyíu con piedra de cantería.

Síguese depués per una pista ancha de grava que va pelo llano, ente praderíes y dalgún árbol, yá en dirección a la villa de Grau. El camín va siempre de frente, ente dalguna pumarada y delles edificaciones soles, hasta que la pista llega frente al polígonu de La Cardosa (nuna de les sos naves tán les instalaciones del muséu etnográficu de Grau).

• Ver ficha: Muséu Etnográficu de Grau

Primero de llegar al polígonu de La Cardosa, el Camín tuerce a la derecha y depués a la esquierda, pa enllazar depués de 200 metros con una carretera asfaltada que se sigue contra la derecha, en dirección a la estación de tren de Grau. Les sos víes hai que travesales per un pasu controláu con barreres de seguranza; en pasándolu, tírase a la esquierda pa llegar al edificiu de la estación.

• Ver ficha: Estación de Grau

De la que se llega a la entrada principal de la estación, hai que xirar a la derecha pa  xubir una cai de firme adoquinao que conduz a la carretera xeneral, nel barriu de San Pelayo de Grau.

Tuércese a la derecha, pela avenida de Valentín Andrés, y depués de malapenes 50 metros llégase a la ponte de piedra sobre El Ríu Cubia, que se crucia, y síguese depués per una cera, pasando de llargo dos rotondes más alantre hasta llegar al parque de San Antonio, que se bordia. Llégase entós al palaciu de Valdecarzana, y la ruta sigue per delantre de la so fachada principal.

• Ver ficha: Palaciu de Valdecarzana
• Ver ficha: Capiya de los Dolores

Desque se pasa’l palaciu (y se dexa a mano derecha’l caleyonín que conduz a la capiya de los Dolores, vinculada al palaciu), xírase a la derecha y pásase énte la casa rectoral. Depués tuércese a la esquierda pela cai que lleva a la Casa Conceyu de Grau, final d’esta etapa.

• • Ver ficha: Casa Rectoral
  • Ver ficha: Casa Conceyu
  • Ver ficha: Grau