Camín primitivu

Etapa 2: Grau - Salas

Esta etapa del Camín Primitivu pasa ente les capitales de los conceyos de Grau y Salas, los dos conceyos pelos que se circula nos 22,51 quilómetros que tien el percorríu. Ye una etapa que nel primer tramu encara l’ascensión hasta l’altu d’El Freisnu, que ye mui pindiu, dende la villa de Grau hasta los alredores del santuariu d’El Freisnu, a lo llargo de 4,5 quilómetros aproximao; sálvase nesa distancia un desnivel d’unos 300 metros y intensifícase la xubida de manera notable nel tramu anterior a la llegada al altu. De siguío, empieza la baxada escontra El Ríu Narcea, en Corniana, y depués vuelve xubise, muncho más llixero, hasta algamar la villa de Salas.

 

El percorríu faise per caminos d’asfaltu o formigón lo más d’él, anque hai un terciu del itinerariu qu’entá se fai per pistes de tierra o grava. Al pie de les capitales conceyiles que marquen l’empiezu y final de la etapa, el Camín de Santiago traviesa munchos pueblinos y llugares, como Acebéu, Doriga, La Rodriga, Llamas, Villazón o Zorrina, amás de la gran villa de Corniana, onde ta’l monesteriu de San Salvador, ún de los grandes conxuntos patrimoniales d’Asturies, incluyíu nel 2015 pola UNESCO na Llista del Patrimoniu Mundial como elementu vinculáu al Camín Primitivu de Santiago.

 

Son munchos los testimonios del patrimoniu cultural nesta etapa, tanto al respective de grandes exemplos d’arquitectura relixosa y civil de dómina medieval y moderna, como les ilesies romániques de Santa Olaya de Doriga, Santiago de Villazón o la colexata de Salas, como no que tien que ver con muestres de l’arquitectura tradicional y popular asturiana, bien abondoses nos pueblinos pelos que va la ruta xacobea, onde va ser posible almirar grandes horros y paneres, llavaderos, fontes y pontuques de fechura tradicional. Les dos capitales de conceyu presentes na ruta, Grau y Salas, cunten con conxuntos históricos declaraos Bien d’Interés Cultural y nos qu’existen munchos exemplos de bona arquitectura, amás d’espacios públicos (places, paseos, parques) d’abondu interés.

 

Nesta etapa hai bien de referencies al pasu de pelegrinos camín de Compostela n’época medieval y moderna. Na villa de Grau existió tradicionalmente un hospital de pelegrinos, documentáu dende’l sieglu XVI, baxo l’advocación de la Virxe de les Candeles; son anteriores les noticies relatives al hospital de San Xuan de Leñapañada, a poca distancia de la villa moscona, y yá mentáu a primeros del sieglu XIII. Yá en Salas, existió tradicionalmente una hospedería nel monesteriu de San Salvador de Corniana qu’atendía a los pelegrinos, yá mentada a últimos del sieglu XV. Na capital del conceyu hubo un hospital dedicáu a San Roque, del qu’entá se caltién la capiya, yá documentáu al principiu del sieglu XV.

Descripción de la etapa

CAMÍN PRIMITIVU

Empieza la etapa na plaza del Conceyu de Grau. 

Dando’l llombu a la Casa Conceyu, el Camín sigue de frente, hasta llegar nel intre a la plaza del Xeneral Llano Ponte, arrodiada de dellos edificios d’interés, como’l que tien una placa conmemorativa del pasu pela villa de la compañía de teatru La Barraca de Federico García Lorca, en 1930.

Crúciase esta plaza y síguese pela cai de los marqueses de la Vega d’Anzu, ensin garrar la primer esviadura a la derecha, que lleva a la ilesia parroquial de Grau. Siguiendo de frente, déxase llueu a la esquierda una placina con una fonte.

Avánzase per esta cai, ente bloques de viviendes modernes ente les que se caltuvieron dalgunes d’interés, d’empiezos y mediaos del sieglu XX, por exemplu na plaza Indalecio Corujedo, que s’arrodia.

En pasando esta plaza, déxase a mano esquierda un palacete con un xardinín delantre, too ello zarrao con un muriu de piedra y rexa, y síguese de frente, pela mesma cai de los marqueses de la Vega d’Anzu, per un tramu onde lo qu’hai más son cases de los años de posguerra, d’una o dos altures; más alantre llégase a les murueques d’una construcción d’últimos del XVIII, a mano derecha.

Depués d’unos 350 metros, la cai desemboca na travesía de la carretera nacional per Grau, llamada Eulogio Díaz Miranda, que tien xusto nel entronque La Fonte de Riba, de 1796.
 

Síguese escontra la esquierda, pela cai Flórez Estrada, pasando énte l’edificiu de la escuela de música; más alantre, llégase a un cruceru de piedra, nun cruz de caminos a la salida del nucleu vieyu de Grau, que depués d’él atópase una vivienda de dos pisos, con piedra de cantería en recercos de murios y esquinales, datable nel sieglu XVIII.

Dexando atrás el cruceru y esta vivienda, síguese derecho hasta cruciar El Ríu Cubia. Tuércese entós a la esquierda y gárrase la cai La Flor, ente cases de dos altures. Llégase a un encruz y ha siguise de frente, per una cai estrecha arrodiada pela derecha por un muriu de piedra y a la esquierda por un edificiu de dos plantes. Esta cai xube en paralelo a la carretera nacional N-634, que queda a mano derecha.

Xúbese per esti camín y nel primer biforcu de víes síguese pela de la de la derecha, en dirección a Acebéu, per una contornada cada vez menos urbana, con viviendes unifamiliares, praos y dalgún horru y panera a los llaos del Camín, que ta llindáu por murios de piedra en bona parte del percorríu. Al dexar atrás les últimes cases y una nave ganadera, pásase a circular per una pista de formigón, que sigue xubiendo, pa dar pasu más tarde a un firme de piedra y tierra, nuna zona onde se va pelo llano, ente parceles zarraes con murios de piedra, dalgún árbol al pie del camín y viviendes espardíes. Depués la pista vuelve tar asfaltada y acaba enllazando con una carretera que va en sen perpendicular a la marcha que llevaba’l Camín.

Nesti puntu, síguese pa la derecha, averándose a un ñudu de comunicaciones. Pásase percima de la carretera nacional per un pasu eleváu, dexando a mano esquierda, embaxo, una rotonda de distribución del tráficu.

En cruciando la carretera nacional, síguese per un camín asfaltáu, que lleva a El Cascayal, nuna zona de praos, con una casería con horru a la esquierda, nuna curva que fai’l percorríu del Camín.

Llégase depués a un encruz de caminos, teniendo de garrar el de la derecha, en dirección a un petuñín de cases con dalgún horru, que se dexa atrás, a mano derecha, siguiendo la ruta pa llegar a Acebéu, llugar que s’atraviesa, dexando a mano derecha una esviadura y, a entrambos llaos, cases y dalgún horru y panera.

Llégase a un encruz, entá nel pueblu, onde hai que siguir pela derecha; pásase depués al llau d’una vivienda de tipoloxía tradicional, con corredor de madera na planta cimera, en mal estáu, mentes qu’al otru llau del camín, a la esquierda, hai un horru con bufarda na cubierta. Más p’alantre déxense otros trés esvíos a la esquierda, que’ terceru lleva a un pasu altu sobre l’autovía, que va más o menos en paralelo al camín nesti puntu. Llégase a otru barriu de viviendes, con dalguna panera, y llégase a un encruz con otra carretera, onde hai que tirar pa la esquierda, dexando a mano derecha un horru.

Sigue’l percorríu per una carretera asfaltada, ente praos, dalgún árbol y cases soles, estremándose dacuando l’autovía, que queda a mano esquierda. Síguese recto na esviadura a la derecha escontra El Valle y caltiénse la xubida, ente praos, hasta llegar, un poco más de mediu quilómetru depués, a un encruz de carreteres. Escontra la derecha, síguese pa San Xuan, pueblu onde hubo na Edá Media un hospital de pelegrinos, yá mentáu en 1229, que ye l’únicu de los asturianos que se conoz que foi propiedá d’una orde relixosa, en concreto de la de San Xuan de Xerusalén o de los hospitalarios (orde qu’a primeros del sieglu XIV faise coles posesiones de la del Temple, cuando ésta la disolvieron). Anguaño nun se caltién l’edificiu d’esti hospital, anque se cree que taría cerca de la ilesia. Tien na actualidá San Xuan un albergue de pelegrinos que ta nel edificiu de les escueles vieyes. Pa llegar a esti puntu hai qu’esviase del percorríu del Camín unos 800 metros.

La ruta sigue recto, dexando a la esquierda un puñu de viviendes, con un horru, nel llugar llamáu La Venta. El camín ye una carretera asfaltada, encaxonada a lo primero ente turries de tierra, y bordiada por árboles y praos. Depués de 370 metros dexa a mano esquierda una casería con panera, nel llugar d’El Toral, y sigue la xubida hasta La Pelona, con un esvíu a la derecha que nun se garra y pasando al pie d’una casa con panera, a la esquierda. Dende esta zona contémplense bones vistes de los valles d’alredor y tamién de l’autovía, que pasa pela esquierda a menos altura.

Sigue’l percorríu, bordiáu por árboles, y llégase, tres de daqué más de mediu quilómetru, al pueblu de La Tabierna. Depués de la primer vivienda qu’apaez a la derecha, atópase un llavaderu cubiertu; en pasándolu, ha garrase l’esvíu a la derecha, nun llegando a adientrase nel nucleu del pueblu.

Xúbese una pendiente mui pindia y llégase a un encruz de caminos. A la derecha, a lo cimero, alcuéntrase’l santuariu d’El Freisnu, con vistes escelentes pa contra’l valle de Grau.

El Camín sigue de frente, travesando nesti puntu la llende ente los conceyos de Grau y Salas, pel conocíu tradicionalmente como camín de Los Morriondos, una pista de grava qu’empieza una baxada llarga, en parte en paralelo al percorríu de l’autovía A-63 y con bones vistes del valle de Las Dorigas. Ye una pista ancha, con turria grande de piedra a la derecha, que baxa cuasi 700 metros hasta llegar, nuna curva, a la ponte vieya de piedra de La Meredal, y a una fonte allugada al pie.

Pasaos estos elementos, la ruta empobina a una pasarela peatonal que traviesa l’autovía y sigue depués la baxada, per una pista de grava, pa contra’l pueblu de Samarciellu, primer llugar del conceyu de Salas pel que pasa’l Camín Primitivu y que llega a les sos primeres viviendes malapenes 320 metros depués de cruciada la pasarela, pasando’l firme de la ruta a tar formigonáu.

Pasa’l Camín pela parte cimera de Samarciellu, ente cases tradicionales, con galeríes y corredores de madera, amás d’ente munchos horros y paneres. Tamién se caltién dalguna vivienda cola estructura del fornu, de piedra, amestada al edificiu. Na parte fondera del pueblu, hacia la esquierda del Camín, hai al pie d’una panera ún de los pocos molinos de rabil qu’entá tán en funcionamientu n’Asturies.

Sigue’l percorríu’l camín ente murios de piedra de zarru de parceles y viviendes, hasta desembocar nuna carretera, en curva; hai que siguir pa la esquierda, pel arcén en daqué más de 200 metros, hasta cuasimente desembocar nuna rotonda d’accesu a l’autovía. Nesi puntu, primero de llegar a la rotonda, gárrase un esvíu a la esquierda, per una pista de tierra, que pasa ente murios baxos de piedra, travesando una zona llana de praos y pumares, hasta llegar, menos de doscientos metros depués, al reguerín d’El Freisnu, que se crucia per una pasarela de madera, llamada de La Meredal, recuperada nel 2003. Síguese per una pista de tierra, en paralelo al ríu y ente árboles. Depués déxense a mano derecha les murueques d’un molín, del que se caltién la so estructura de piedra, onde destaca l’arcu pal accesu del agua. Síguese depués unos metros xunto al ríu, nuna zona na qu’esti forma unos saltucos d’agua.

Xúbese de siguío pela mesma sienda, hasta llegar al pueblu de La Reaz, con una panerona a lo primero del llugar.

Nesti puntu’l camín pasa a ser una pista de formigón, que sigue ente les poques viviendes equí existentes y arrodia la fonte de La Reaz.

Desque se pasa la fonte, la pista lleva en mui pocos metros a un pasu per debaxo l’autovía, pel que se sigue recto, pa llegar de sópitu a les primeres cases del pueblu de Doriga.

Síguese derecho, ente murios de piedra y caseríes con horros y paneres, hasta llegar a un encruz, onde se tuerce a la derecha, ente más cases, dalgunes con corredores de madera, y horros; crúciase más p’alantre una ponte sobre’l ríu y llégase a la ilesia románica de Santa Olaya, pudiendo contemplase na contorna, amás, dos paneres de grandes dimensiones.

Bórdiase la ilesia y llégase a la carretera xeneral. Nesti puntu’l Camín sigue de frente. A la derecha, pela carretera, llégase en malapenes 120 metros a la portada renacentista d’accesu al palaciu de Doriga, declaráu Bien d’Interés Cultural

Volviendo al camín, xúbese per una sienda asfaltada, que va ente praos y zarros de parceles y dende la que puen acolumbrase, a mano esquierda, bones vistas del pueblu que s’acaba de dexar atrás.

Pásense delles cases soles y una panera, y llégase, depués de daqué más de mediu quilómetru, al cementeriu de Samarciellu, nel llugar de Carbayal, a mano esquierda. Apuértase depués a una pista asfaltada ancha, que baxa pa pasar debaxo d’un gran viaductu de l’autovía, que dende esti puntu salva’l valle d’El Ríu Narcea. Esti viaductu, inauguráu n’avientu del 2017, tien un llargor de 875 metros y sofítase en seis pilastres que lleguen a algamar los 175 metros d’altor.

En pasando perbaxo de l’autovía, vuelve xubise per esa pista, torciendo nuna curva a la esquierda, pa enllazar con una sienda de tierra y piedra que baxa escontra’l fondu del valle.

Esta pista va ente muncha vexetación y arboleda, pasando al pie de la estructura de piedra d’un caleru, a mano derecha según se baxa, xunto a una curva pronunciada.

Más alantre va pasase per un tramu d’empedráu bien calteníu.

Depués de cuasi 600 metros de descensu, llégase a una nave grande, a mano esquierda, y a un petuñu de cases, en La Ponte; pasa la pista a tar asfaltada y enllaza más tarde cola carretera AS-15, torciendo pa la derecha.

Hai na vera esquierda de la carretera una sienda estrecha de tierra paralela a la calzada y separada d’ella, pela que se va siguir nos 670 metros siguientes, aproximao, hasta enllazar con una rotonda de la carretera, nel llugar de La Rodriga, que queda a mano derecha del Camín. Síguese pa la esquierda, pel arcén d’esta carretera, que llueu enllaza cola ponte de Corniana, sobre El Ríu Narcea.

En cruciando la ponte llégase a la localidá de Corniana; lo primero que s’atopa ye una antigua casa de peones camineros, a mano derecha.

Síguese derecho, pela cera de la cai Prudencio Fernández Pello, coincidente col tránsitu de la carretera nacional 634 per Corniana. Déxense a entrambos llaos edificios modernos que conviven con edificaciones vieyes, d’una o dos plantes, con galería y con balcones. Tamién pervivió nesti conxuntu dalgún horru y panera.

Al llegar a la cai José María Caballero, tuércese a la esquierda, per esta vía, que lleva directamente al monesteriu de San Salvador de Corniana. Traviésase primero una ponte sobre El Ríu Nonaya, precedíu d’una construcción del XVIII, a mano derecha de la cai, que foi casa rectoral.

Llégase asina al monesteriu, precedíu d’un espaciu públicu con árboles y un cruceru. A la esquierda, llevántase la fábrica románica de la iglesia del monesteriu.

Bórdiase la ilesia, pasando al pie del so ábside románicu triple, y síguese per una carretera que biforca llueu; hai que tirar pela SL-7, en dirección a Suburriba. Empieza entós una xubida que va dexar ver una bona panorámica, a la derecha, del monesteriu y de la localidá de Corniana.

Menos de mediu quilómetru depués, llégase a los primeros edificios de Suburriba, síguese pela carretera, que pasa pel mediu d’esta población, de gran interés pola so arquitectura tradicional y los munchos horros y paneres.

El camín pasa pela carretera, travesando los barrios de Suburriba (La Devesa, Ramón) y los espacios de prau que s’alcuentren ente ellos, hasta que na parte cimera del pueblu, nuna curva, la ruta xacobea dexa la carretera, siguiendo pela esquierda, per una pista formigoniada xunto a un conxuntu de dos paneres y delles cases tradicionales, nel barriu de Ramón.

Esta pista vuelve xuntase depués de malpenes 80 metros cola carretera, que se crucia, pa siguir de frente per una pista de formigón que pasa al llau d’una casa de dos plantes con galeríes. Esta pista, que xube, dexa pasu a un tramu empedráu y depués a una sienda de tierra y piedra, que pasa ente árboles, con vistes perbones al principiu, del valle de Corniana.

Vase ente árboles, y xunto a delles zones de murios de piedra de contención de la turria, unos 1,6 quilómetros, hasta llegar a una cantera de síliz, que les sos instalaciones bórdiense per una pista de grava que lleva a un biforcu de caminos, en dexando atrás les instalaciones de la cantera; ha siguise pel de la derecha, en baxada escontra una carretera local, tuércese a la esquierda, pásase delantre d’unes naves y llégase al pueblu de Llama, onde pue vese un palombar de planta circular y estructura alta de piedra, amás de delles viviendes y dalgún horru y panera. Tamién hai una capiya, a la que nun llega’l Camín, na parte cimera del pueblu.

Síguese pela carretera, vase de frente nel cruz qu’apaez en pasando les cases del pueblu y déxase a mano esquierda una fonte.

Síguese per una pista ancha de grava, ente praos y dalgún árbol, y continúase escontra la derecha en dos cruces que van apaecer más p’alantre. Daqué más de 800 metros depués de dexar les últimes cases de Llamas llégase, nuna curva, a una casería, con una panera grande apoyada sobre un edificiu de piedra, nel llugar de La Carril; primero de llegar, traviésase’l reguerín de Peñouba per una ponte de factura tradicional.

Síguese pa la derecha, pásase más alantre per delantre d’una casa sola, nel sitiu de La Chamarga, y llégase depués a otra construcción; énte ella ha garrase un esvíu a la derecha, pa desembocar, 120 metros más p’alantre, nuna pista forestal de trazáu rectu dafechu que lleva, contra la esquierda, al pueblu de Quintana, capital de la parroquia de Villazón, pel mediu d’una vega bien llana, entre praos. Depués de más de 800 metros, esta pista conduz al cementeriu del pueblu, pasando’l firme a tar asfaltáu. Déxase atrás el campusantu y poco depués llégase a un biforcu de caminos. El que va a la esquierda empobina a la ilesia de Santiago de Villazón y al pueblu de Quintana, mentes que’l camín oficial sigue de frente, pasando pela zona fondera del pueblu y al pie de la fonte de Santiago, que queda a mano esquierda, igual que la ilesia, que s’asitia nun altu sobre esti tramu del Camín.

Síguese per esta pista ancha de grava, que depués d’unos 340 metros pasa per delantre d’una casería, con horru; desque se pasa, el camín va per un pasu altu d’accesu a una cantera allugada a mano esquierda de la ruta. Tírase de frente, dexando a mano esquierda una panera, y llégase depués d’otros doscientos metros a la fonte y llavaderu de Fontecaliente, a mano esquierda, qu’al pie hai un abellugu-marquesina modernu d’aceru cortén.

En pasando la fonte, llégase a un biforcu de caminos y síguese de frente, énte una casa sola; tírase per una sienda de tierra y piedra, ente castañales y ablanales que con trazáu irregular pasa pela lladera del monte El Picariosu y que depués de dalgo menos d’un quilómetru lleva a la ponte de Zorrina, de piedra y un vanu namás.

Poco depués de dexar atrás la ponte, llégase a una carretera local y el camín tuerce a la esquierda, pel arcén, llegando llueu al pueblu de Zorrina, que se traviesa.

Hai nesti pueblu munchos horros y paneres grandes, amás de dalguna casona de grandes dimensiones.

Nun encruz de víes existente en pueblu, ha siguise a la esquierda; el camín, tres de les últimes cases, pasa a ser una pista de tierra y piedra, que va ente praos hasta llegar a la ponte de La Devesa, una pasarela de madera. Depués del pasu del regatu hai un tramu pequeñu de sienda empedrada, con regodones de ríu, de gran interés patrimonial.

Sigue xubiéndose pela sienda hasta llegar al llugar de La Devesa, onde destaca la torre vieya, xunto a una panera.

Desque se pasa la torre, síguese per una sienda ente praos y dalgún árbol, hasta llegar a un pasu inferior de l’autovía, que se traviesa, enllazando con una pista de construcción nueva, paralela a la carretera nacional, cola que s’enllaza pocos metros depués.

Traviésase la carretera nacional y síguese de frente, per una sienda estrecha de piedra y tierra, ente praos, que 350 metros más p’alantre dexa a mano derecha una nave; síguese de frente, per una auténtica galería vexetal con munchos carbayos, hasta llegar a una vivienda evolucionada a partir d’una construcción inicial ente cortafueos. Nesti puntu’l camín pasa a tar formigoniáu y síguese pa la esquierda. Llégase llueu al nucleu de viviendes de Maicín, con dalgún horru y panera, al pie de los que se pasa; el Camín vuelve ser una pista de tierra nunos pocos metros, baxando ente dalgunes construcciones, ente elles una panera con una cubierta estendida pa guarecer el pasu ente la mesma y la vivienda a la que se vincula.

Llégase depués d’unos pocos metros a la carretera AS-226, con cera, qu’hai que cruciar y siguir escontra la esquierda, en dirección al centru de la villa de Salas, nuna zona onde empiecen a apaecer bloques modernos de viviendes. Síguese recto pela avenida del Llaniellu, pásase al pie d’un edificiu municipal, arrodiando la llamada Casa Xanzu (una casa con escudu), cola capiya de San Roque al llau, tamién xunto al Camín, na cai San Roque, y llégase depués, tres de malapenes 100 metros, a la colexata de Salas, na plaza de la Ilesia, en plenu centru de la villa, puntu final d’esta etapa.

Compartir

Share on facebook
Share on twitter
Share on linkedin
Share on pinterest
Share on email
Scroll to Top