Empieza esta etapa na plaza central de Salas, arrodiada pola colexata, la casa conceyu y la torre y palaciu de Valdés-Salas.

La ruta pasa debaxo del arcu que comunica la torre col palaciu y sigue derecho pela cai La Campa, ente viviendes d’una y dos altures. Al llegar a un biforcu de cais, síguese pela derecha, que baxa. Ye la cai Ondinas, que pasa ente viviendes d’una planta, ente les que se llevanta dalgún horru. Síguese recto, dexando a mano derecha un esvíu que lleva a un llavaderu, al otru llau d’El Ríu Nonaya.

Síguese recto, per una redolada cada vez más rural, con cases unifamiliares, horros y paneres, pasando más p’alantre el camín a circular per una pista de grava primero y depués de tierra y piedra, que se va adientrando nun monte d’ocalitos y especies autóctones como’l sabugu. Avánzase en paralelo al ríu, a la derecha, Y atópase llueu a mano esquierda la fonte de Paín.

• Ver ficha: Fonte de Paín    

Caltiénse la xubida per esti camín, ente praos y árboles. Nun biforcu de víes qu’apaez poco depués de la fonte, síguese pela derecha, al par del ríu, y llégase al poco a una escampada onde hai restos d’una esplotación minera vieya: una tolva metálica apegada a un muriu altu de formigón, de contención de la fastera, na qu’apaecen otros restos de construcciones vinculaes a la mina de caolín qu’equí hubo. A la esquierda, a lo alto, ye posible contemplar un viaductu de l’autovía.

Sigue la xubida, ente árboles y zones onde’l camín ta delimitáu por murios de piedra, col ríu siempre a la derecha. Tres d’unos 950 metros, llégase a la ponte de La Borra, construyida en piedra, d’un vanu.

• Ver ficha: Ponte de La Borra   

Crúciase la ponte y síguese pela sienda, y tres d’otros 800 metros, aproximao, llégase a la ponte d’El Carcavón, construcción pimpana en base a piedra de cantería, que salva un tayu fondu formáu pol ríu. Primero de la ponte, hai una esviadura a la derecha que conduz a los saltos d’agua d’El Ríu Nonaya, paraxe natural de gran guapura asitiáu a malapenes 250 metros de la ruta xacobea.

• Ver ficha: Ponte del Carcavón   

Crúciase la ponte d’El Carcavón y síguese per una sienda que s’esvia a la esquierda y que, nuna xubida cuesta, y en pasando per dos curves zarraes, lleva, 300 metros depués de la ponte, a enllazar cola carretera nacional N-634, nel llugar d’El Llanón, continuando pel so arcén daqué más de 800 metros. Pásase primero al pie de les murueques d’una construcción, siguiendo más tarde per una curva abondo zarrada, antes y depués de la que se circula baxo los viaductos de l’autovía. De siguío, déxase a mano derecha una tira de viviendes de 1906, con un horru, conxuntu conocíu como En Ca Servandu, y gárrase de siguío, antes d’una curva de la nacional, un esvíu escontra la esquierda, per una pista de tierra y piedra.

Xúbese per esta pista, ente carba y árboles, y síguese a la derecha nun primer biforcu de caminos. Más p’alantre, déxase a la derecha una sienda que baxa, continuando pela sienda estrecha de tierra pela que se venía, en xubida empruna, y que tres dos curves pronunciaes conecta con una sienda más ancha, de grava, que va más o menos en paralelo cola calzada de l’autovía, a mano esquierda. Déxase a la esquierda un pasu eleváu sobre esa autovía, y síguese de frente per una pista agora formigoniada. Depués de doscientos metros, tuércese a la derecha, per un camín de formigón perpendicular a l’autovía, que queda agora de llombu al Camín.

Circúlase ente praos, murios de piedra de zarru de parceles y dalgún árbol, dexando a mano esquierda una primer esviadura a Porciles que se dexa atrás. Depués de mediu quilómetru per esta carretera, llégase a una curva onde se garra un esvíu a la esquierda, pa enllazar con una pista de tierra y piedra que xube pa dar, malapenes 60 metros depués, con otra carretera local; síguese pa la derecha, camín del llugarín de Porciles, con delles viviendes y un horru.

• Ver ficha: Porciles   

Sigue la ruta agora ente murios de piedra de separtación de parceles; llégase depués de doscientos metros a un encruz de carreteres onde ha siguise de frente, n’avanzando nel encruz unos metros a la esquierda. Déxase a mano esquierda un espaciu verde pequeñu onde hai una marquesina d’aceru cortén y continúase derecho ente murios de piedra, pa pasar depués a circular en paralelo a l’autovía, que queda a mano esquierda, per una pista ancha de grava que más p’alantre va circular en paralelo cola carretera nacional, a la derecha, hasta llegar a un pasu inferior de la mesma, que se crucia y que lleva al pueblu de Boudenaya, pel antaño conocíu como Camín de Misa.

Tres del pasu fonderu síguese escontra la esquierda, dexando atrás unes naves y circulando per una pista de grava que depués d’unos 120 metros llega al cementeriu de Boudenaya, a mano derecha. En pasándolu, alcuéntrase, nun prau a la derecha del camín, un cruceru de piedra del sieglu XIX, llevantáu sobre un podiu tamién de piedra.

• Ver ficha: Cruceru de Boudenaya   

Pasáu’l cruceru, siguése de frente, escontra la ilesia, dexando a la esquierda delles naves de grandes dimensiones y l’esvíu a elles. Xúbese, pasando un regatu, bordiando la ilesia de Santa Marina.

• Ver ficha: Ilesia de Santa Marina   

En pasando la ilesia, síguese pa la derecha, per un camín bordiáu de murios de piedra, que s’adientra nel pueblu de Boudenaya, entre horros, paneres y delles cases.

• Ver ficha: Boudenaya   

Esti camín acaba desembocando na carretera nacional N-634. Crúciase esta vía y síguese de frente, per una carretera local asfaltada que xube y qu’al llegar a la primer curva, tuerce a la esquierda, per delantre d’una casa de dos plantes d’altor. Gárrase nesti puntu una pista de grava qu’a la esquierda arrodia una partida de cases unifamiliares alliniaes alredor de la carretera nacional, mentes qu’a la derecha son too praos. Síguese per esta pista, en paralelo a la carretera nacional, pasando per una zona onde hai un muriu altu de formigón na vera derecha del camín; en pasándolu, alcuéntrase una panera de grandes dimensiones, tamién nel llau derechu.

Dexada atrás esta panera, la pista va dar a la carretera asfaltada, síguese pa la esquierda, yá ente les primeres cases del pueblu de La Espina, al que se dirixe la ruta y bien vinculáu al Camín de Santiago dende va sieglos, que se documentó la existencia equí d’un hospital de pelegrinos yá nel añu 883.

• Ver ficha: La Espina   

Pásase ente praos, viviendes, horros y paneres, y déxase llueu a la esquierda un esvíu a la carretera nacional. Xusto depués de pasar esa esviadura, alcuéntrase a la derecha l’edificiu de les escueles de La Espina, de tipoloxía típica de los años 1930.

• Ver ficha: Escueles   

En pasando les escueles, ha siguise de frente, nuna zona onde yá hai ceres al pie de la carretera pa llegar, 220 metros depués, aproximao, a un espaciu n’abertal onde se llevanta la ilesia de San Vicente, con un parque infantil énte la so fachada principal.

• Ver ficha: Ilesia de San Vicente   

Nesti puntu tuércese a la esquierda; el camín pasa énte la portada de la capiya y baxa escontra la carretera xeneral, siguiendo entós pela derecha y llegando nun momentu a un encruz de carreteres onde hai que tirar pela esquierda, per una cai de bloques modernos de cases ente los que persiste dalguna construcción anterior de dos pisos. Síguese de frente nel siguiente encruz qu’apaez, ensin garrar los esvíos qu’a esquierda y derecha se presenten, hasta desembocar nuna rotonda, a la salida de La Espina. Primero de llegar a esa rotonda, gárrase una pista de grava que la arrodia pela derecha (nel sentíu de la marcha del Camín), pa esviase a la derecha primero de pasar la rotonda, enllazando yá con una pista de tierra que sigue ente carba y árboles, lloñe de la carretera nacional y entrando nel conceyu de Tinéu.

Esta pista conduz, n’ascensu, al primer pueblu de Tinéu al que llega’l Camín Primitivu, La Preda.

• Ver ficha: La Preda   

Tres daqué menos de mediu quilómetru de percorríu per esta pista, llégase a unes naves, sitiu onde se pasa a circular per un firme de formigón; llégase bien llueu a la capiya del Cristu de los Aflixíos, na vera derecha de la ruta.

• Ver ficha: Capiya del Cristu de los Aflixíos   

Vírase a la derecha, namás pasar la capiya, bordiándola y empezando una xubida empinada que lleva a la parte cimera de La Preda, el llamáu barriu de Reconcu, ensin garar nengún de los esvíos qu’apaecen a derecha y esquierda. Pásase al pie d’una construcción con planta semicircular y llégase, nuna curva, a enllazar con una carretera asfaltada, énte una vivienda de planta allargada. Tuércese equí a la esquierda y el Camín sigue ente cases y naves ganaderes, too ello con vistes xenerales del núcleu del pueblu que, más abaxo, desenvuélvese a la esquierda de la ruta, amás de poder contemplase panorámiques escelentes del paisaxe de la sierra de Boudenaya. Llégase a una gran nave ganadera frente a la que s’alcuentra, na oriella derecha de la vía xacobea, la fonte de Reconcu, construyida en 1809, y asitiada debaxo d’una cubierta.

• Ver ficha: Fonte de Reconcu  

Avanza’l Camín ente naves ganaderes, llégase a un encruz onde se sigue de frente, pa un poco más p’alantre, n’otru biforcu de víes, tirar pela de la esquierda, per una pista de tierra que pasa ente praos, arrodiada a la esquierda por estaques de madera d’estremar les parceles, y a la derecha por una turria de tierra. Depués d’unos 250 metros, nuna curva, tuércese a la derecha, xubiendo per una pista de tierra encaxonada. Poco depués, n’otru biforcu, sigue escoyéndose’l camín de la derecha, ente árboles, sebes y carba de cotolla, con vistes perbones a la esquierda de los valles colos montes al fondu.

Esta pista estrecha lleva, depués de poco más d’un quilómetru, al pueblu de Bedures, que lo primero que s’atopa ye una panera a la esquierda.

• Ver ficha: Bedures   

El camín pasa a tar formigoniáu y sigue rectu, ente cases y al llau d’un llavaderu apegáu al muriu; depués pásase per una zona de praos y vuélvese más p’alantre a llegar a otru barriu de la población, onde hai otru llavaderu, cubiertu nesti casu. Tres d’esti segundu llavaderu, hai un encruz de caminos onde hai que siguir derecho, ente más cases y dalgún horru; en pasándoles, vase ente praos, con un molín a la derecha, n’alto, amás d’un reguerín que baxa pela cuesta tan empinada qu’hai ente’l molín y el camín.

Continúase ente árboles y praos, y llégase a una curva con un biforcu de caminos; ha garrase’l de la derecha pa, xusto depués, torcer a la esquierda escontra una pista de grava, allugada yá sobre’l pueblu de La Miariega, que se pasa perriba d’él, en paralelo a la carretera xeneral, col conxuntu de cases y naves ganaderes desenvolviéndose a la esquierda, tres d’unos praos, mentes qu’a la derecha hai praos, con dellos molinos d’enerxía eólico a lo cimero del cordal.

Depués de menos de 300 metros circulando per esta pista, pásase al pie de les primeres viviendes del pueblu d’El Pedregal. El camín ta asfaltáu y déxase a mano derecha una fontina y una capiyina d’ánimes de piedra, de construcción recién y con una imaxe de Santiago dientro, guardada por un cristal.

• Ver ficha: El Pedregal   

Esti camín lleva al barriu de La Güérgula; pásase al pie de delles cases tradicionales y llégase a un caleyón estrechu onde se vira a la esquierda pa enllazar cola carretera nacional, onde hai que torcer pa la derecha.

• Ver ficha: Casa Fausto, casa tradicional   

Síguese pel arcén de la carretera unos 150 metros, hasta llegar a un encruz cola carretera que va a Viḷḷanueva y Ordial, continúase de frente, pa llegar tres d’otros 80 metros, a la ilesia de San Xusto y Pastor, nuna curva de la carretera nacional.

• Ver ficha: Ilesia de San Xusto y Pastor   

Pasada la ilesia, síguese pel arcén de la carretera, bordiando dos tires d’edificaciones (na segunda d’elles hai una panera enriba d’una bodega). Daqué menos de 200 metros depués, gárrase un esvíu a la derecha, per una pista formigoniada perpendicular a la carretera. Poco depués de garrar esta pista alcuéntrase, a mano derecha, un cruceru de piedra, llevantáu enriba d’un poyín de piedra.

Avanza’l Camín pela sienda hasta que, daqué más de 100 metros más p’alantre conecta con un camín perpendicular; ha siguise hacia la esquierda. Pasaos otros 130 metros, llégase a un biforcu de caminos y la ruta sigue pel de la esquierda, un camín de tierra bordiáu por árboles y en dellos tramos por turries altes de tierra (dacuando reforzaes por piedra de cantería), qu’encaxonen la sienda que pasa pela sierra de Tinéu.

Tres daqué más d’un quilómetru de percorríu, llegase a un cruz onde se sigue de frente, ente árboles y murios de división de parceles, en baxada hasta llegar a un regatín que se traviesa ensin falta de pasera o ponte. Empieza depués una xubida y déxase llueu un esvíu a mano derecha. Circúlase ente árboles y sebes, y queda a mano derecha más p’alantre una construcción sola (una nave de lladriyu); desque se pasa, báxase hasta enllazar con una pista más ancha, de tierra, y nesti puntu síguese pa la derecha.

Continúase per esta pista, ente praos, col camín arrodiau por árboles y sebes. Déxase a mano esquierda una nave y, poco depués, un esvíu a la derecha. Traviésase un regatu pequeñu y nel siguiente encruz avánzase pela derecha, ente una zona d’árboles, pa conectar con otru camín y siguir escontra la derecha, nuna baxada ente l’arboleda qu’arrodia la ruta, con praos a los llaos y un parque eólicu enriba a la esquierda. Crúciase otru regatín y el percorríu d’esta pista va depués per una contornada natural dafechu. Déxase más p’alantre a mano derecha un esvíu y síguiese hasta otru cruz de víes onde se tira a la derecha, per un camín que va llevar hasta cerca del pueblu de Santolaya, al que nun se llega a entrar. Primero de llegar a la primer casería del pueblu, onde destaca una panerona, gárrase un esvíu a la derecha, per una pista que va dexando atrás el llugar y que pasa ente praos, bordiáu por sebes y árboles.

Síguese per esta pista un quilómetru aproximao, hasta llegar a una esviadura que, escontra la esquierda, lleva al pueblu de Zarracín. Ha siguise de frente, per una pista que sigue travesando un monte y que, tres daqué más d’un quilómetru, llega a unes cases unifamiliares, pasando’l camín a tar asfaltáu. Poco más p’alantre, enllázase con una carretera que bordia un campu de fútbol, arrodiáu por un muriu de formigón. Nesti puntu síguese pa la derecha, pel arcén de la carretera, que lleva depués de daqué más de 250 metros a la capiya de San Roque y al so campu, na entrada yá de la villa de Tinéu.

• Ver ficha: Ermita de San Roque   

Pasada la capiya, síguese pel paséu de los Flaires, per una cera. A la derecha, enriba, alcuéntrase la bolera municipal. Un poco más p’alantre, al llau esquierdu del camín, álzase una estatua al pelegrín, que tien a los pies un gran reló de sol; el Camín avanza y apaez depués, tamién a la esquierda, una fonte.

Tírase pel paséu, bordiáu pela derecha por un muriu altu de piedra sobre’l que se llevanten dellos edificios residenciales, mentes qu’a la esquierda puen vese los barrios nuevos del Tinéu moderno, frutu de la espansión de la población dende’l cascu vieyu al qu’empobina la ruta.

La ruta adiéntrase na población pel camín de San Roque, ente viviendes d’una y dos altures, dalgunes d’elles con corredores y galeríes de madera, y tamién al pie de dalgún horru y panera qu’entá se llevanten en plenu centru urbanu, nel barriu de Picosdeviḷḷa.

• Ver ficha: Ilesia de San Francisco   
• Ver ficha: Tinéu