Camín primitivu

Etapa 6: Salas - Bourres

Esta etapa respuende a una propuesta de realización del Camín Primitivu si se garra la variante de Los Hospitales, ente los conceyos de Tinéu y Ayande, partiéndose entós el percorríu en dos tramos: ésti ente Salas y Bourres, y otru siguiente ente esta localidá y Berducedo, continuando yá de siguío’l Camín per un percorríu únicu ente Berducedo y la llende con Galicia, nel altu d’El Garabocho.

El percorríu d’esta etapa descríbese nos capítulos dedicaos a les etapes Salas-Tinéu y Tinéu-La Puela.

Incluye un percorríu de 32 quilómetros, pelos conceyos de Salas y Tinéu. L’itinerariu tien un perfil ascendente a les clares, dende la salida de la villa de Salas hasta l’altu La Espina, na llende de los dos conceyos. A partir d’equí, pasa a ser más estable, volviendo a producise un ascensu significativu pero más curtiu dende la villa de Tinéu hasta l’altu de Parafita, dende’l que yá s’empieza una baxada suave hasta la localidá de Bourres, final de la etapa. En Bourres documéntase la existencia del primer albergue de pelegrinos del Camín de Santiago, nel añu 893, recuperándose nos años noventa del pasáu sieglu xx la tradición hospitalaria d’esti pueblu gracies a un albergue allugáu nes escueles vieyes.

Más de la metá del itinerariu d’esta etapa (unos 14 quilómetros) pasa per pistes de tierra y grava, mentes que’l firme asfáltico ta presente nunos 10 quilómetros.

 

Compartir

Share on facebook
Share on twitter
Share on linkedin
Share on pinterest
Share on email
Scroll to Top