Camín primitivu

Etapa 8: Berducedo - Grandas de Salime

Etapa de 20,08 quilómetros que va pelos conceyos d’Ayande, Grandas de Salime y, unos pocos metros, per Pezós. La metá del percorríu faise per firme d’asfaltu, sobre manera na segunda metá de la etapa, mentes que no demás transítase per siendes de tierra y grava.

L’itinerariu parte de la villa de Berducedo, llegando al poco al pueblu d’A Mesa, yá nel conceyu de Grandas de Salime, y desque se crucia empieza un percorríu per siendes y pistes de tierra. Faise una primer xubida empinada namás pasar el pueblu y el camín adiéntrase, depués de dexar atrás la capiyina de Buspol, pel ámbitu natural tan grande que bordia’l banzáu de Grandas de Salime, el gran finxu paisaxísticu de la etapa. A lo llargo de bien de quilómetros pásase ente plantíos de pinos y otres especies, con vistes espectaculares al banzáu y al saltu de Grandas, pel que se va llegar a pasar depués d’una baxada llarga d’unos ocho quilómetros de duración, en dellos puntos bien intensa, tanto que llegó a facese famosa na Edá Media pola so peligrosidá; son munches les lleendes y rellatos que se centraron nesti tránsitu tan duru, que tenía na Ponte de Salime (na actualidá debaxo del agua del banzáu) ún de los sos elementos más significativos. En pasando’l banzáu, empecípiase una xubida siguida de más de cinco quilómetros hasta la capital de Grandas de Salime, la villa del mesmu nome; circúlase cuasi tol tiempu pel arcén de la carretera autonómica AS-14.

Ye ésta una etapa na que malapenes se pasa per poblaciones, sacante les mentaes más arriba, colo que’l predominiu absolutu ye del paisaxe y del saltu de Grandas, baxo’l que queden les murueques de l’antigua población de Salime. Los pueblos de Berducedo, A Mesa, el llugar de Buspol y la villa de Grandas de Salime, caltienen bonos exemplos de l’arquitectura del suroccidente asturianu, con construcciones con cubiertes de llosa. Los meyores exemplos del patrimoniu cultural alcuéntrense nes ilesies d’estes poblaciones: destaca la colexata de San Salvador de Grandas de Salime, a la fin del percorríu. Enantes, va pasase per ún de los exemplos más significativos del patrimoniu industrial d’Asturies, el saltu de Salime.

Les referencies al pasu de pelegrinos per esti itinerariu son abondosos dende la Edá Media. En Buspol entá se caltién la capiya vinculada a lo que yera l’hospital de pelegrinos, documentáu en dómina moderna como casa-alberguería que fundía los raigaños na Edá Media, lo mesmo que la qu’existía nel pueblu, güei tapáu pol banzáu de Salime. Tamién hubo un hospital na villa de Grandas, mentáu na documentación del sieglu XVI pero ensin dulda de fundación anterior, que ta cerca del muséu etnográficu actual, a la entrada de la población, y qu’entá se caltién l’edificiu.

Descripción de la etapa

Empieza la etapa al pie de la ilesia de Santa María de Berducedo. Déxase atrás esti monumentu, allugáu al pie d’un texu de gran antigüedá, y pásase a la vera d’un altar sacramental pa, de siguío, énte una casa, torcer a la derecha, per una pista asfaltada que pasa ente viviendes. Llueu llégase a un encruz onde hai que garrar el camín que pasa pela esquierda, xubiendo ente más cases, hasta dexar la postrera atrás nuna curva zarrada a la esquierda, que da pasu a una zona de praos, con bones vistes de Berducedo a la esquierda. Depués de cien metros, avérase la ruta a delles naves ganaderes, qu’en pasándoles ha siguise pa la derecha, per una pista yá de grava que pasa ente zarros de parceles a base de sebes.

Depués d’otros cien metros gárrase un esvíu a la esquierda y xúbese per una sienda de tierra, con partes onde’l firme fórmalo la mesma peña madre, ente praos y carba. Síguese 250 metros depués pela derecha, n’otru biforcu de caminos, pa llegar finalmente (tres d’otru encruz de caminos onde se sigue de frente, pel de la derecha) a una pista forestal que baxa al pie d’un pinal. Síguese per esti entornu más d’un quilómetru, ensin garrar nengún esvíu de los que se presenten a la esquierda, y llégase, depués d’un percorríu de mil cien metros, a la carretera local, pela que se sigue pel arcén, contra la esquierda, dexando llueu, na primer curva qu’apaez, un llavaderu a mano esquierda.

Continúase pela carretera, primero ente pinos y depués ente praos y vistes amplies de los valles d’El Carballín y d’El Teixedón, dos quilómetros, siguiendo en baxada, dibuxando’l percorríu delles curves zarraes, que nuna d’elles atópase un llavaderu.

Tres d’esos dos quilómetros, llégase al pueblu d’A Mesa, primer localidá del conceyu de Grandas de Salime que s’alcuentra nel percorríu del Camín Primitivu.

En pasando les primeres cases, llégase a una cera paralela a la calzada de la carretera, tuércese contra la derecha na curva d’accesu al pueblu, d’onde sal pa la esquierda un esvíu que lleva a la población de Paradas. Depués d’esta curva, llégase llueu a la ilesia de Santa María Madalena.

Pasada la ilesia, síguese de frente, ensin garrar nengún esvíu, hasta llegar al edificiu de les escueles vieyes, reconvertíu n’albergue de pelegrinos. Pasáse esti edificiu y gárrase la carretera local, qu’empieza nesti puntu una xubida empruna pela peña d’Os Coriscos que va llevar al camín a pasar per detrás del parque eólicu d’A Mesa.

Al poco de garrar la carretera, apaez una esviadura a la derecha, hacia A Figueiría, que nun se toma; la xubida sigue más de mil doscientos metros de percorríu, hasta llegar, depués d’una curva bien zarrada a la esquierda, a la parte posterior del parque eólicu, nuna zona de carba y pastu pal ganáu.

Síguese pela carretera nuna recta llarga, dexando atrás más p’alantre un esvíu a la derecha, y empieza, depués d’una curva a la derecha que llega de siguío, la baxada escontra El Río Navia. Tres d’esa curva, llégase a un cruz de caminos, onde hai que siguir de frente, pela mesma carretera, que se va abandonar yá 150 más p’alantre, nel principiu d’una curva perzarrada a la esquierda. Nesti puntu ha siguise de frente per una pista de tierra, cerca del pueblín de Buspol. Báxase per esta pista, ente murios de piedra, y pasa poco depués el firme d’ella a ser de llábanes de llosa, que na parte primero de llegar a les cases del pueblu, conviértese nun sistema de pavimentación a base tamién de llábanes de llosa, baxo les que se forma una canalización d’agua de munchu interés.

Pásase al pie de les edificaciones de Buspol y depués, a la capiya de Santa Marina, vinculada al hospital de pelegrinos qu’había nesti puntu y del que se caltién la campana, agora nel campanariu de la capiya, que data del sieglu XIV. Dende la capiya pue vese una panorámica bien guapa del valle d’El Río Navia.

Pasada la capiya, síguese per una sienda estrecha de tierra, delimitada a la derecha por un muriu de piedra puesto en seco y a la esquierda por llábanes de llosa fincaes, hasta llegar a una portiella, que se trespasa, pa continuar de siguío per un prau pa pastu de ganáu; el camín tuerce pa la esquierda y empieza una baxa empinada escontra El Río Navia.

Báxase per una sienda estrecha de tierra y piedra, malapenes marcada nel terrén, arrodiada de carba, cotolles y con vistes bárbares del valle del Navia, cola villa de Grandas de Salime al fondu y tres d’ella, l’altu d’El Garabocho.

Depués d’unos 700 metros de baxada, y de delles vueltes zarraes, llégase a una zona de pinales y enllázase con una pista forestal ancha pela que se sigue escontra la esquierda, en descensu.

Esi percorríu pela pista forestal faise en ziszás, con grandes rectes a les que siguen curves zarraes, siempre pel dientro del pinal. Depués d’unos dos quilómetros, llégase a un biforcu de caminos. Contra la esquierda síguese camín d’un embarcaderu, a la vera del banzáu de Grandas de Salime y de delles murueques de construcciones que formaben parte del pueblu de Salime, güei tapáu debaxo del agua, puntu dende’l que dacuando ye entá posible garrar una embarcación que lu traviesa y lleva a la otra oriella, pa siguir dende ellí la ruta escontra la capital grandalesa. Como non siempre ye posible disponer d’esti serviciu, sigue la descripción de la ruta garrando’l camín escontra la derecha, en dirección al saltu de Grandas de Salime.

Sigue’l camín pela sienda forestal, con zones onde ta delimitada por una turria tallada na peña, siempre ente pinos y con bones vistes del banzáu de Grandas. Depués de 1,8 quilómetros aproximao, y en pasando (otra vez en territoriu del conceyu d’Ayande) per un cortafueos pel que circula un tendíu eléctricu procedente del saltu de Salime, que se pasa per debaxo, abandónase la pista pa garrar un esvíu a la esquierda que lleva a una sienda estrecha de tierra que va en ziszás per un castañéu y que, depués de menos d’un quilómetru de baxada bien cuesta, acaba dando na carretera autonómica AS-14; síguese pel so arcén escontra la esquierda.

Depués de 300 metros, llégase al mirador de la Ballena, sobre’l Saltu de Salime, a mano derecha del Camín. Dende él hai unes panorámiques espectaculares de la presa y de les instalaciones auxiliares, ente les que destaca’l trabayu d’integración artística obra de Vaquero Turcios.

Dexando atrás el mirador, llégase depués d’otros 300 metros, a la presa, na llende ente los conceyos d’Ayande, Grandas de Salime y Pezós, travesándola peles ceres dispuestes a entrambos llaos de la carretera. De frente, na fastera que se dispón a mano derecha según el sentíu del percorríu del camín, apaecen los restos d’instalaciones vinculaes al procesu de construcción del banzáu, amás del pobláu d’A Paicega, onde s’agospedaron los trabayadores qu’ente 1945 y 1955 construyeron esta gran obra d’inxeniería. A la esquierda del Camín, ye posible contemplar, dende los miradores de la presa, el banzáu.

Pasáu’l banzáu síguese pela carretera AS-14, yá en territoriu del conceyu de Grandas de Salime, en ascensión siguida. En dellos puntos pue pasase per una sienda estrecha de tierra paralela a la calzada de la carretera, anque ye mester facelo n’otros sitios pel arcén. Déxense atrás delles construcciones nel llugar d’El Salto y un mirador sobre’l banzáu y el saltu, y llégase depués de cuasi cuatro quilómetros de percorríu, xusto desque se pasa una curva cuasi completa, a un cruz de caminos nel llugar d’El Marco, al que llega la ruta xacobea procedente del embarcaderu en Salime.

Continúase de siguío inda unos 200 metros pela carretera y depués gárrase un esvíu a la esquierda, per una pista de tierra que xube primero en dirección contraria al sen de la marcha que se caltenía pela carretera pa depués dar una curva zarrada y volver circular en paralelo a la carretera, a más altor, pela fastera del monte d’El Coto Grandas.

Síguese per una sienda estrecha de tierra, de ralo en ralo empedrada, ente munchos pinos, carbayos, fayes y castañales, y en dalgunos puntos acotada por murios de piedra o de llábanes de llosa fincada. Depués de daqué menos de 1,5 quilómetros, llégase per esta pista a les primeres cases de la villa de Grandas de Salime; el firme pasa a ser de formigón. Báxase a la carretera AS-14 y crúciase, siguiendo de frente. Déxase a mano esquierda un llavaderu cubiertu y poco depués tuércese a la esquierda, llegando a l’avenida del Ferreiro, que va pasar ente viviendes d’una y dos altures y a la vera del Muséu Etnográficu de Grandas de Salime, allugáu no que yera la casa rectoral de la capital grandalesa.

En dexando atrás el muséu, síguese la xubida pela avenida del Ferreiro y llégase depués d’unos 140 metros al espaciu central de la capital, formáu pol edificiu del conceyu y el de la colexata de San Salvador, no que ye’l puntu final d’esta etapa.

Compartir

Share on facebook
Share on twitter
Share on linkedin
Share on pinterest
Share on email
Scroll to Top