Camín primitivu

Etapa 9: Grandas de Salime - El Garabocho

Última etapa del Camín Primitivu n’Asturies, que pasa dafechu pel conceyu de Grandas de Salime, dende la so capital hasta la llende provincial con Lugo, nel altu d’El Garabocho, que llamen O Acebo dende Galicia.

El percorríu, de malapenes 13,19 quilómetros, realízase nuna ascensión siguida y poco pronunciada (quitando la xubida final al altu), salvándose na distancia un desnivel d’unos 600 metros.

Síguese lo más d’él per siendes de tierra o grava y ye escasu’l porcentaxe de caminos asfaltaos (namás 2,91 quilómetros del total). Traviésense los pueblinos de Cereixeira, Castro, Xestoselo y Penafonte, y ente ellos espacios naturales amplios nos que ye frecuente que’l camín pase pente auténtiques galeríes vexetales, bien prestoses de pasiar.

El patrimoniu cultural ta formáu na so mayor parte por capiyines (como les de Malneira y Padraira), ilesies parroquiales de gran interés como la de Penaseita, y bones casones típiques de l’arquitectura tradicional de la zona. Destaca, igualmente, nel pueblu de Castro, el gran xacimientu arqueolóxicu d’El Chao Samartín, declaráu Bien d’Interés Cultural nel 2014 y al que se vincula un centru d’interpretación modernu nel que s’espón bona parte de les pieces d’interés alcontraes nes distintes escavaciones arqueolóxiques realizaes nel castru.

Les referencies históriques al pasu de pelegrinos céntrense nos hospitales que-yos dieron auxiliu en dómina medieval y moderna. Ta documentada la existencia d’un hospital n’A Cuía, xusto primero d’algamar l’altu d’El Garabocho y del que nada resta na actualidá.

En pasando l’altu d’El Garabocho, el Camín Primitivu adiéntrase na provincia de Lugo, onde la so gran parada siguiente ye la localidá d’A Fonsagrada.

Descripción de la etapa

Empieza la etapa delantre de la Casa Conceyu de Grandas de Salime y sigue escontra la colexata de San Salvador, que s’arrodia, pela cai estrecha del Carme, ente’l cabildu del templu a la derecha y edificios a la esquierda.

Depués llégase, na xubida per esta vía, a la capiya de la Inmaculada, construyida en piedra y que caltién la espadaña con campana, apegada a una construcción de planta allargada, con escudu y portalada a base d’un arcu de mediu puntu. Trátase de la Casa Román.

Sigue xubiéndose pela cai hasta que conecta cola carretera xeneral. Crúciase y continúase de frente, per un camín asfaltáu, bordiáu a la derecha por un muriu de piedra de zarru de parcela, ente praos y dalguna casa sola; a la derecha, a más altura, hai un horru. Un pocu más p’alantre, a mano derecha (y en dexando a la derecha un esvíu per otru camín), alcuéntrase la capiya del Carme, precedida por un pórticu fondu y que guarda dientro un retablu bien interesante del XVIII.

Pasada la capiya, síguese unos 60 metros per una pista formigoniada, ensin esviase, hasta dexar atrás unes poques cases; la última d’elles ye de dalguna antigüedá, como denota’l fechu de que cunte con un fornu apegáu a la construcción, visible dende fuera.

En dexando atrás esta casa, síguese recto, ensin garrar un esvíu a la derecha, per un camín que ta unos metros formigoniáu, pero que depués dexa yá pasu a una sienda de tierra, que va ente praos, llendada en dalguna zona por carba y n’otra (más p’alantre, debaxo d’una vivienda a mano derecha, allugada a más altura), por murios de piedra. Tres d’unos 450 metros, allégase a la carretera autonómica, cola que nun se llega a conectar, sinón que se sigue pela sienda, contra la esquierda, en paralelo a la calzada de la carretera, que queda a mano derecha a una cota superior. Síguese per esta sienda, llendada de ralo en ralo por turries de tierra y murios de piedra, nunos 350 metros, ente una arboleda mesta, hasta enllazar cola carretera AS-28. Tírase pa la esquierda, per una sienda estrecha de tierra paralela a la calzada de la vía, hasta cruciar, nuna esviadura, la calzada de la carretera que lleva a Escanlares y Robledo; depués, yá pel arcén del AS-28, síguese nunos 140 metros, hasta pasar per delantre d’una industria láctea, allugada a mano esquierda de la carretera nel sen nel que va’l Camín de Santiago, nel llugar d’A Farrapa.

En dexando atrás esta industria, crúciase l’AS-28 y síguese unos 170 metros per una carretera d’asfaltu que dibuxa una curva pa volver enllazar más p’alantre cola vía autonómica. Correspuéndese col trazáu vieyu d’esta carretera, nuna zona na que se regularizó y por eso dexó de tener usu.

De vuelta a la carretera, síguese a la derecha, pel arcén de la vía, unos 80 metros; en pasándolos, gárrase un esvíu a la derecha, per una sienda de tierra que xube y que va dir ente arboleda y carba, entre praos, pa llegar 480 metros depués a una casería, nel llugar de Xuntacasa, pasar per delantre les sos construcciones y siguir derecho, ensin garrar un esvíu a la esquierda contra la carretera. Sigue’l camín per una sienda estrecha de tierra, ente praos y bardiales, qu’en baxada suave lleva doscientos metros depués a les primeres cases del pueblu de Cereixeira.

Nesti puntu’l camín pasa a tar asfaltáu y incorpórase a una carretera local, sigue’l percorríu pel arcén d’esta vía, contra la esquierda, y llega más p’alantre, depués de les cases caberes, al enllaz de la carretera cola autonómica AS-28; tírase pel so arcén unos 200 metros, déxase atrás un aparcamientu a mano esquierda y, a la derecha, una construcción de planta allargada y dedicada a la hostelería.

Tres d’esos doscientos metros de percorríu, crúciase la carretera, nel sitiu onde sal una carretera en dirección a Vilarello. Xusto al llau del principiu d’esa carretera, empieza una sienda de tierra, pela que sigue’l camín de Santiago, de primeres en paralelo a la carretera AS-28, separtáu d’ella por prau, nuna zona conocida como A Pezoa.

Sigue la marcha per esta sienda, a lo primero ente árboles y depués travesando praderíes estenses, col Camín llindáu, a entrambos llaos, por estaques de madera y alambre. Depués de poco más de mediu quilómetru, gárrase’l primer esvíu a la esquierda, síguese ente praos primero pa más p’alantre adientrase na galería que conformen los árboles existentes a entrambos llaos del camín, que tamién ta llendáu en dalgún puntu por murios de piedra. Llégase a la capiya de la Esperanza de Malneira.

En pasando la capiya, crúciase una carretera local y síguese de frente (queda a la derecha l’accesu al pueblu de Malneira, al que’l Camín nun llega a entrar), per una pista de tierra ente árboles, que depués d’un percorríu d’unos 160 metros dexa a mano derecha una casona abandonada y llega a un encruz de caminos; hai qu’escoyer el de la esquierda, una pista de tierra que pasa ente carbayos, murios de piedra y dalgún zarru a base de llábanes de llosa fincaes.

Desque percorríos daqué más de 500 metros, pásase a una zona de praos y la pista conviértese nuna carretera asfaltada, tres d’un esvíu a la esquierda que lleva a la carretera AS-28. De frente llégase en pocos metros al pueblu de Castro, que se traviesa en sen Este Oeste, ensin garrar nenguna esviadura, pasando primero debaxo d’unes naves ganaderes pa, de siguío, adientrase nel mediu de la población, pasando énte la capiya de San Martín y Santa Bárbara.

Depués de pasar la capiya, síguese’l percorríu per un camín formigoniáu bordiáu por murios de piedra, con praos a entrambos llaos, y de siguío, ente viviendes d’una y dos altures; desque se pasen, nun encruz, tírase a la esquierda, encarando yá la salida del pueblu, ente les sos últimes construcciones, y llégase a un tramu onde’l camín tien al llau, a mano derecha, un muriu de piedra y a la esquierda, una filera de piedres fincaes. Llégase depués a una carretera qu’a la esquierda lleva a la carretera AS-28 y a la derecha, al centru espositivu vinculáu al castru d’El Chao Samartín, al que se llega, siguiendo esti camín depués de malapenes 160 metros.

Esti centru ye’l puntu de partida perfectu pa una visita a un castru tan escepcional como’l d’El Chao Samartín, declaráu Bien d’Interés Cultural y ún de los grandes bienes patrimoniales vinculaos al Camín de Santiago nel occidente asturianu.

Nesa intersección cola carretera, la ruta xacobea sigue de frente, per una pista de tierra encaxonada a lo primero ente murios de piedra que bordien dambos llaos del camín y depués ente praos a la esquierda y carbayos a la derecha. Ensin garrar nengún esvíu de los qu’a la esquierda lleven a pueblos como Padraira, síguese recto, pasando per zones onde’l camín presenta una caxa marcada fuertemente polos desniveles llaterales de tierra sobre los que se disponen n’ocasiones murios de piedra. Depués de 1,2 quilómetros per esta sienda, llégase a la capiya de San Lázaro de Padraira, de grandes dimensiones y con un pórticu.

Desque pasada la capiya, síguese derecho, pela sienda pela que se venía, ente árboles y dalgún prau, y llégase depués d’otros 850 metros a enllazar cola carretera autonómica; síguese a la derecha per una sienda estrecha de tierra paralela a la so calzada, unos 85 metros, pa depués esviase a la esquierda per una carretera yá ensin usu que lleva hasta una casa. Vase depués de frente, ensin garrar l’esvíu a la esquierda que sal d’esa casa, y vuelve enllazase depués de 280 metros cola carretera AS-28; síguese entós contra la esquierda.

Empieza equí un percorríu de mil seiscientos metros, aproximao, al pie de la carretera, lo más d’él (sacante a la fin d’esti trayectu) per una sienda estrecha separtada de la calzada polos guardarraíles. Déxense atrás los esvíos a Monteseirín Grande y Pequeno y a Pelóu, y continúase nuna ascensión siguida que va llevar al pueblu de Penafonte, últimu nucleu de población que va travesar el Camín de Santiago Primitivu al so pasu per Asturies.

Al llegar a esta población, gárrase l’esvíu a la derecha que lleva per carretera al llugar, pa, de siguío, tomar la primer esviadura posible a la derecha, énte unes cases de dos altures, per una pista de formigón que, nuna xubida empruna, empobina al cementeriu y, tres d’él, a la ilesia de Santa María.

La ilesia preside un espaciu n’abertal y tien delantre un llavaderu de 1932. Tres de la ilesia, a lo fondero, llevántase la llamada Casa da Pena, allugada xusto al llau del peñón que da nome al pueblu.

Desque se dexa atrás la ilesia, síguese de frente, travesando’l nucleu de Penafonte, pa más p’alantre, nun biforcu de caminos (el de la esquierda lleva a la carretera AS-28), gárrase’l de la derecha, que xube per una pista de formigón pa, en pasando les últimes cases del pueblu, siguir de frente per una sienda estrecha de piedra, en xubida empinada pela fastera del monte d’El Zarro, y qu’unos 100 metros más p’alantre sigue de frente n’otru cruz de caminos.

Xúbese ente pinales y vistes cada vez más amplies de los cordales peñascosos d’esta zona estremera ente Asturies y Galicia, onde son frecuentes los parques eólicos. El camín ta bien llindáu por turries llaterales de tierra, na oriella derecha. Depués de 1.200 metros enllázase con una pista, más ancha, d’accesu al parque eólicu d’A Curiscada, que queda a mano derecha. Síguese per ella, contra la esquierda, y llégase 80 metros depués a la carretera AS-29.

Crúciase la carretera y continúase de frente, nuna zona d’encruz de carreteres. Namás pasar al otru llau, gárrase un esvíu a la derecha, per una sienda estrecha de tierra y piedra a la que se llega en pasando una portiella. Empieza equí l’últimu tramu asturianu del Camín Primitivu, que va llevar al altu d’El Garabocho y a Galicia.

Síguese pela sienda, xubiendo ente carba y cotolles, y baxo l’alliniación del cordal na que se llevanten los molinos de vientu d’un parque eólicu. Tres d’una curva a la esquierda, el Camín caltiénse en paralelo a la llinia de cume d’esti cordal, pa, 750 metros depués d’empezar el percorríu, llegar a otra portiella que se crucia; xúntase’l camín a una pista que se sigue pa la esquierda, unos 200 metros, pa, de siguío, n’otra xuntura de víes, torcer a la derecha y, ente pinos, xubir hasta l’altu d’El Garabocho y enllazar cola pista de serviciu del parque eólicu, que tien los molinos a derecha y a esquierda del Camín de Santiago.

Traviésase esa pista y síguese de frente, per un camín de tierra y piedra que pasa ente pinos y que 360 metros depués dexa a la derecha un esvíu. Malapenes 200 metros depués, xusto desque se dexa a mano esquierda una esviadura, llégase a la llende ente Asturies y Galicia; dende equí’l Camín Primitivu yá va per tierres de la provincia de Lugo.

Compartir

Share on facebook
Share on twitter
Share on linkedin
Share on pinterest
Share on email
Scroll to Top