Camín de la Costa

Etapa 10: Muros de Nalón - Soto de Luiña

Etapa curtia, de 15,47 quilómetros, que va pelos conceyos de Muros y Cuideiru, pela rasa costera del occidente asturianu, y que s’avera a la mar namás puntualmente, cerca de la playa de La Concha Artéu. Ye ésti un percorríu rural sobre manera, onde les dos mayores poblaciones tán al principiu y al final de la etapa: Muros y Soutu Lluiña. Ente medies, espacios amplios de típicu poblamientu rural asturianu, onde coexisten pueblos y llugares de cases mui espardíes conviviendo con praos y mates. Por too esto, hai una gran presencia, tocante al patrimoniu cultural, de l’arquitectura tradicional, y el Camín va ente quintanes, casones tradicionales, horros y paneres. Sicasí, tamién va tenese la oportunidá de pasar per ún de los pueblos asturianos onde más marcada ye la influencia de l’arquitectura de calidá promovida pola burguesía nel tránsitu del sieglu XIX al XX: El Pitu, llugar del conceyu de Cuideiru onde s’asienta ún de los grandes conxuntos palaciegos d’Asturies, el de los Selgas, llamáu dacuando’l Versalles astur pola magnificencia de la colección artística que se guarda dientro y pola estensión y cuidáu de los sos xardinos. Al principiu y al final de la etapa, la ruta xacobea va pasar delantre d’otros dos grandes finxos del heriedu patrimonial asturianu: la portada renacentista del palaciu de Valdecarzana, en Muros, y la ilesia barroca de Santa María de Soutu Lluiña, incluyida nel 2015 na Llista del Patrimoniu Mundial de la UNESCO por ser monumentu d’un valir escepcional vinculáu al Camín de Santiago costeru.

Na etapa hai de contino xubíes y baxaes non mui cuestes; la incidencia más notable ye la baxada siguida y empinada dende El Rellayu hasta El Ríu Uncín, cerca de la playa de La Concha Artéu, qu’obliga a resalvar, en dos quilómetros y mediu, un descensu d’unos doscientos metros.

Existe documentación histórico que confirma’l pasu de pelegrinos per esti tramu de la ruta xacobea en dómina medieval y, sobre manera, moderna; son delles les alusiones que s’atopen al fallecimientu de pelegrinos estranxeros en tierres de Muros y Cuideiru, casu de la recoyida nos llibros de difuntos de la parroquia de Muros en 1661, relativa a un pelegrín flamencu, o la qu’en 1669 se rellacionaba con un pelegrín francés. Tamién se caltienen testimonios del pelegrinaxe a lo llargo d’estes tierres de viaxeros ilustres, como’l venecianu Bartolomé Fontana, hacia 1538, o’l francés Guillermo Manier en 1726. Consta la existencia d’hospitales de pelegrinos o de ventes na villa de Cuideiru (güei lloñe del Camín oficial), en La Madalena y, sobre manera, en Soutu Lluiña, que la so primer alberguería (llamada del Llugar) remóntase polo menos a 1516; fundóse amás un centru nuevu en 1713 por iniciativa d’Antonio de Bances y baxo l’advocación de la Virxe del Rosariu. Esti hospital, que’l so edificiu tovía ta al llau de la ilesia parroquial, ye ún de los grandes testimonios de fundaciones serondes de centros d’apoyu al pelegrín en tol Camín Costeru español, razón pola que lu incluyeron, cola ilesia, na Llista del Patrimoniu Mundial nel 2015.

Descripción de la etapa

Principia la etapa na plaza del marqués de Muros, énte la ilesia, y xunto al edificiu de la Casa de Cultura del Conceyu. La ruta xacobea sigue pela cai Gerardo González, que sal detrás de la fachada principal del templu. Nos sos primeros metros dispón d’un espaciu públicu con dos fileres d’árboles, delantre d’un conxuntu de cases de dos pisos con galeríes y balcones pervistosos, construyíos ente últimos del XIX y primeros del XX.

Síguese derecho per esta cai hasta desembocar, yá na avenida de Galicia, nun espaciu verde onde destaca la portada d’accesu al que yera palaciu de Valdecarzana, únicu elementu que se caltién d’esta construcción tan destacada.

Desque se pasa la portada del palaciu, síguese xunto a la zona verde qu’arrodia lo que yera la muralla perimetral de la parcela del palaciu. Pásase a la vera d’una fonte y déxase a mano derecha un esvíu a la playa d’Aguilar. Traviésense les víes del tren per un pasu perriba y xusto depués síguese pela derecha, pela cai Francisco Cabal, paralela a les víes del tren, ya nel barriu de Villar. Tres d’unos pocos metros, gárrase la esviación a la esquierda, pel camín de L’Escorial, ensin llegar a la estación de ferrocarril de Muros, allugada un poco más alantre, de frente.

El camín de L’Escorial lleva a unos bloques de viviendes promovíos polos sindicatos verticales en 1957-58. Tírase depués pa la derecha, per esti camín-carretera, al traviés de les cases del barriu de L’Escorial, ente les que se llevanten dalgunos horros y paneres. A la esquierda, un poco esviada del Camín, hai una fonte. Más alantre llégase a un cruz de caminos y hai que siguir de frente, pel camín d’El Salgueiru. En dellos puntos, cuando dexen les sebes de les parceles qu’atiesten col Camín, pue vese a la esquierda, allalantrones, delles de les construcciones principales del pueblu de Somáu, famosu poles sos casones indianes, como la de La Torre, que ye posible acolumbrar dende esti puntu.

Tres del cruz anterior, y desque se pasa una última vivienda, el camín conviértese nuna pista de tierra que traviesa una ponte enriba de les víes del ferrocarril y que se mete nuna zona arbolada, ente ocalitos, con tramos nos que’l vial ta llimitáu por una tayada vertical del terrén, xunto al regueru de Remuelas.

Esti camín baxa, dexando un primer esvíu a la derecha, hasta llegar, desque se pasa una curva mui zarrada, al regueru de Santolaya, qu’al llau d’él hai un depósitu d’agua. Traviésase’l ríu per una ponte de piedra d’un vanu namás, y empieza una xubida ente ocalitos per una pista de tierra y piedra, que se sigue ensin garrar nengún de los esvíos qu’apaecen a mano derecha. Nesti puntu faise’l pasu dende’l conceyu de Muros al de Cuideiru.

Depués de dir pelo llano dalgo más de 600 metros, llégase a un pasu per debaxo de les víes del tren, travesando una ponte de formigón d’un vanu, y síguese per un camín de tierra, que llueu conecta con otru. Continúase pa la derecha, ente praos y ocalitos, hasta desembocar nun camín asfaltáu. Nesti puntu síguese’l percorríu escontra la derecha y llégase aína a les primeres cases del barriu d’Arancés, na parroquia de Piñera, el primer llugar del conceyu de Cuideiru que traviesa’l Camín de Santiago costeru.

Síguese derecho per esta vía, ente cases unifamiliares, dalgún horru y zarros de parceles, ensin garrar nengún esvíu a la derecha, hasta desembocar na carretera local CU-2, yá nel pueblu d’El Pitu.

Síguese pa la derecha, camín de Cuideiru, per una zona onde hai cera. Poco depués del cruz, a mano derecha, apaez el gran edificiu de les Escueles Selgas, con un espaciu verde delantre presidíu pol monumentu a la familia Selgas, obra del escultor Víctor Hevia.

Un poco más alantre, ta’l palaciu de los Selgas. Dende la puerta monumental abierta na muria que zarra la parcela, pue vese una panorámica bárbara del xardín francés, con estatues, que precede al edificiu del palaciu.

Siguiendo pela cera de la carretera local, y tres pasar dellos establecimientos hosteleros, llegase a la ilesia parroquial d’El Pitu, coles sos dos torres altes nos estremos de la fachada principal. Esti templu allúgase dientro d’una gran parcela zarrada por una muria de piedra y rexería de fierro, con una filera alta d’ocalitos na vertiente que da al Camín de Santiago. La entrada al espaciu verde que precede la ilesia faise per un espaciu que tien a los llaos dos ánxeles de mármole. L’edificiu de la ilesia ta arrodiáu d’un xardín, llimitáu nel estremu norte pol edificiu del cuartel de la Guardia Civil. A la derecha, al otru llau de la carretera, ta la entrada principal del palaciu de los Selgas.

Desque se dexa atrás el cuartel de la Guardia Civil, el Camín ésviase a la esquierda, per una carretera local que baxa ente cases, delles mui vieyes y adscribibles a la tipoloxía de la casa Vidíu.

Poco a poco les cases van dexando espaciu a les praderíes, y depués d’una última vivienda en ruines, precedida d’una panerona, pásase a circular per una pista de tierra y piedra, que baxa ente ocalitos y otros árboles, dexando llueu un primer esvíu a mano derecha. Traviésase El Ríu Piñera y xúbese hasta enllazar con una carretera asfaltada, tuércese a la esquierda y llégase depués d’una xubida curtia a un barriu con unes poces cases, na zona d’El Ventorrillu; una d’eses cases tien una gran galería de madera, pintada d’azul, nel pisu d’enriba.

Nuna curva, el camín sigue pa la esquierda, ente dos cases, y baxa ente murios altos de piedra per un camín asfaltáu, que llueu da pasu a una pista de tierra ente árboles. Depués de 300 metros circulando per esta pista, llégase a una carretera asfaltada, nuna curva, y síguese pa la esquierda. Xúbese hasta una vivienda unifamiliar, llégase a otru encruz de carreteres, síguese pela carretera que sigue de frente, per una recta que, desque se pasa una zona d’infraviviendes, llega a un pasu fonderu de les víes del tren, resueltu con una ponte de piedra. Esa llinia férrea llega aína a la estación de ferrocarril de San Xuan de Piñera, a la esquierda del Camín.

En cruciando les llinies del tren, xúbese ente praderíes estenses a un altu domináu por una casa sola de construcción recién que, a mano derecha, llevántase como un faru, forma a la que recuerda la torre circular que tiene apegada. Desque se pasa la casa, gárrase’l primer esvíu a la derecha, per un camín formigoniáu que se va en sen perpendicular a la carretera pela que se venía (y que de frente lleva al nucleu de San Xuan, al que’l Camín nun llega a entrar).

La ruta sigue contra la esquierda hasta’l barriu de Belandres, depués d’un primer cruz, ente praos, dalguna casa unifamiliar y zarros de finques (dalgunos con sebe y otros con estaquera). Déxase a mano esquierda un esvíu y xúbese ente praos, pudiendo vese a mano derecha una panerona mui grande.

Más alantre síguese derecho n’otru cruz y llégase a una carretera. Síguese pela derecha, hasta que pocos metros depués tuércese a la esquierda y crúciase la carretera nacional N632.

Síguese de frente per un camín asfaltáu encaxonáu ente turries de tierra a entrambos llaos, na falda del monte Montarés. Esta vía xube hasta’l barriu d’El Mantu, con edificaciones unifamiliares y dalgún horru, hasta que más alantre, nun cruz de víes, síguese a la esquierda, dexando atrás una fonte apegada a una muria de piedra. Síguese pel camín asfaltáu, en xubida, dexando a entrambos llaos dellos petuños d’edificaciones, con dalgún horru nellos, hasta llegar (tres de dexar a mano derecha un esvíu) a circular en paralelo a l’Autovía del Cantábricu dalgo más de 200 metros.

Crúciase depués un pasu fonderu de la autovía y tuerce depués la ruta pa la derecha, per una pista de grava que s’adientra nun ocalital, en paralelo a l’autovía, a una mayor cota d’altitú. Percuérrese esta pista más de 900 metros, hasta desembocar notru pasu fonderu de l’autovía que, desque se crucia, da pasu a una pista de formigón que sigue, a la esquierda, xunto a una gran esplanada, pa dir depués ente ocalitos y otros árboles y desembocar nuna vía asfaltada ente cases unifamiliares, nel llugar d’El Rellayu.

Desque se pasen estes cases, llégase a un llavaderu de piedra, construyíu en 1948 según indica la inscripción que lu preside. Esti llavaderu da’l llombu al Camín, que sigue pa la esquierda, per una pista de formigón que tien a la derecha una muria alta. Pocos metros depués, nun biforcu de caminos, síguese pela derecha, per una pista de tierra que va, nuna baxada empinada, pente un ocalital. N’otru biforcu de víes, seíguese pela derecha, hasta llegar a pasar a la vera d’ún de los 16 pilares que sostienen el viaductu imponente (de 106 metros d’altura) que nesti puntu dexa a l’autovía resalvar el valle de La Concha Artéu.

Desque se pasa la primer vez esti viaductu, síguese per una pista estrecha de tierra y piedra, que poco depués tuerce a la derecha nuna curva mui zarrada, empezando una baxada fuerte, pasando xunto a otru pilar del viaductu y desembocando nun pasu fonderu de la carretera nacional, per un túnel rectangular de formigón. En cruciándolu, llégase a la carretera nacional N632a. Crúciase y pásase per delantre de les instalaciones d’un hotel y al llau del apeaderu del ferrocarril, yá nel nucleu de La Madalena.

Empieza la baxada, per una pista formigoniada, escontra la playa de La Concha Artéu. Depués d’una vuelta mui zarrada a la esquierda, llégase a La Madalena, pasando ente cases, horros, l’edificiu de les escueles vieyes de los años 1950, la llamada Casona y un llavaderu techáu y una fonte de 1958. Nel cruz de caminos siguiente tírase a la derecha, baxando una cuesta mui empruna qu’acaba nun encruz de víes que, a la esquierda, lleva a pocos metros a la capiya de La Madalena.

El Camín sigue de frente, per un camín de tierra ente praos, qu’a los pocos metros dexa ver, a la derecha, la esplanada del aparcamientu de vehículos de la playa. Poco depués, crúciase El Ríu Uncín per una ponte y síguese per una pista de tierra a la esquierda, en paralelo a esi calce fluvial y dexando atrás la playa.

Esta pista xube ente árboles a la derecha y praos a la esquierda, cola vista al fondu de los viaductos de l’autovía. Xúbese hasta unes cases y horros del barriu d’El Ribete, pasando’l firme a ser de formigón, y llégase en curva a la carretera local CU-6.

Síguese esta carretera local unos pocos metros hasta cruciala y siguir per una pista de grava que s’abre a la esquierda, pasando debaxo de los viaductos de l’autovía y sigue depués el percorríu ente ocalitos, en paralelo a l’autovía más de 600 metros, hasta que depués d’esa distancia tuerce a la esquierda, y yá con un firme de tierra y piedra adiéntrase nun ocalital que lleva, depués de más de mediu quilómetru, a les primeres construcciones del pueblu d’Umayor, que se traviesa siempre en sen oeste, dexando a mano esquierda hasta trés esvíos.

El discurrir ente les cases, horros y paneres d’Umayor allárgase unos 800 metros, lo que dexa contemplar non solo exemplos perinteresantes d’arquitectura tradicional asturiana y d’elementos etnográficos como payares, sinón tamién perspectives amplies a la esquierda, escontra los valles de les Lluiñes y los pueblos que van apaeciendo nesti territoriu.

Desque se pasen les últimes cases, empieza una xubiduca que dexa contemplar una visión de tol valle que s’acaba de dexar atrás, pa llegar al petuñu de cases de Campubaxu, dispuestes en filera na vera derecha del Camín.

Escontra la esquierda ye posible contemplar una panorámica amplia del valle de les Lluiñes, y endílgase perbién el pueblu de Samartín de Lluiña, presidíu pola torre alta de la so ilesia parroquial, declarada Bien d’Interés Cultural en 1996.

Desque se pasa esta filera de cases, el Camín tuerce en Campucima a la esquierda per una pista de tierra encaxonada ente turries altes, arrodiáu too d’ocalitos y otres especies d’árboles na lladera del monte San Andrés. Esti camín acaba desembocando, depués de más de 1.300 metros ensin esviase a nenguna de les pistes que s’abren a los sos llaos, na carretera N-632, siguiéndose a la derecha pel arcén d’una vía qu’a una distancia mui curtia lleva al pueblu de Soutu Lluiña.

Déxase a mano derecha una gran casona con palmera, pasando un poco depués a discurrir la ruta per una pista de grava paralela a la carretera nacional, a la que vuelve a xuntase nuna ponte sobre El Ríu Esqueiru. Desque se crucia, llégase yá al nucleu del pueblu, diendo per una cera dispuesta xunto al arcén de la carretera, al llau d’una tira de cases de dos y trés altures, que depués d’un pedacín lleva a la plaza central del pueblu, presidida pola ilesia de Santa María de Soutu Lluiña, declarada Patrimoniu Mundial nel 2015, como monumentu destacáu vinculáu al Camín de Santiago costeru, y final d’esta etapa.

Compartir

Share on facebook
Share on twitter
Share on linkedin
Share on pinterest
Share on email
Scroll to Top