Camín de la Costa

Etapa 12: Viḷḷamouros - Outur

Etapa de 20,39 quilómetros que discurre dafechu pel conceyu de Valdés, ente los llugares de Viḷḷamouros y Outur. Nun hai grandes desniveles nel percorríu: les incidencies más destacaes son les baxaes hasta’l fondu de los valles de los ríos Esva y Negru y les consiguientes xubíes posteriores, con dalguna cuesta empinada, mui puntual. En dalgunes zones el Camín viose mui tresformáu va poco, como consecuencia de les obres de construcción de l’Autovía del Cantábricu; coincide dalgún d’esos puntos de xubíes y baxaes pronunciaes col discurrir peles pistes de reposición de la ruta xacobea per esos sitios modificaos.

En términos xenerales, el Camín presenta un firme asfáltico en más de la metá del percorríu, anque tamién ye importante’l porcentaxe de siendes de tierra o grava.

Crúciense munchos núcleos de población, villines y llugares, como San Cristuébanu, Queirúas, Caneiru, Barcia o Taborcías, amás de los puntos d’orixe y destín, toos ellos caracterizaos por presentar bien d’exemplos d’arquitectura tradicional propia d’esta zona occidental asturiana, con cubiertes de llosa, cases de tipoloxía de casa bloque, zarrada y de grandes proporciones, y onde apaez xunto a los horros y paneres otru tipu peculiar de graneru, el cabazu o horru a la manera gallega, qu’a partir d’agora va acompañar al pelegrín cuasimente hasta les puertes de Santiago de Compostela.

El Camín crucia la villa de Ḷḷuarca, capital del conceyu de Valdés, que tien un emplazamientu privilexáu na desembocadura d’El Ríu Negru, nuna parte de la costa de muncha guapura. La ruta va pel cascu vieyu de la localidá, xunto a dalgún de los monumentos principales de la villa, como’l palaciu del marqués de Ferrera, declaráu Bien d’Interés Cultural. Un poco depués de dexar Ḷḷuarca, la ruta va pasar al llau de les murueques de la ilesia románica de Santiago, en Taborcías, nun sitiu d’una guapura especial, un prau a la vera d’un regueru.

Les referencies documentales al pasu de pelegrinos per esta etapa son munches. Consta la existencia d’hospitales en Cadavéu (cerca del empiezu de la etapa), en Casieḷḷas (na parroquia de Caneiru), quiciás tamién en Barcia (onde ún de los sos barrios llámase L’Hospital), y en Ḷḷuarca (villa mentada, amás, en dellos rellatos de pelegrinos de dómina moderna). N’Outur, puntu final d’esta ruta, existió un prioratu de monxos benedictinos onde tamién consta que pasaron la nueche dalgunos pelegrinos a Santiago.

Descripción de la etapa

Principia la etapa en Viḷḷamouros, na nacional 634, xunto al enllaz d’esta vía col camín que vien de San Playu Teona, na zona conocida como Los Umeirales.

Vase unos pocos metros pel arcén de la carretera nacional. Primero de llegar a una casa moderna, rematada nuna torre, cruciase la vía y tírase pa la derecha, per una pista de formigón que pasa énte la casa de la torre y qu’en pocos metros conviértese nuna pista de grava qu’empieza un percorríu descendente ente ocalitos y praderíes. De primeres, caltiénse a mano esquierda la carretera nacional, nuna cota superior, y depués d’una curva empieza a dexase atrás esta vía y sigue l’itinerariu ente praos.

Xúbese hasta un altucu onde hai casa moderna, a la derecha del Camín. Enllázase equí, siguiendo derecho nun primer cruz (que contra la derecha lleva al llugar d’El Carbayu), con una pista de formigón. Continúase per esta vía dalgo menos de 180 metros, dexando a mano derecha una panera sola nun prau, y éntrase en Quintana, na parroquia de Caneiru.

Llégase a otru cruz, nel llugar de Cuetu, y tírase de frente, pa pasar, depués d’unos pocos metros y desque se dexa a mano derecha una casa, a circular per una pista de tierra y piedra. Síguese derecho per esta pista, ente praos. Déxase a mano derecha l’edificiu d’un centru cultural y un horru a la esquierda, y llégase a otru cruz, onde se tira de frente, nel llugar de La Cruz (si nel cruz síguese pa la derecha, llégase nunos 400 metros a la capiya de la Virxe de la Esperanza).

La ruta xacobea sigue de frente, ente praos a derecha y esquierda zarraos con estaqueres de madera a lo llargo d’unos metros, hasta que depués d’una curva apaez a mano esquierda, a una cota superior, un conxuntu de naves agrícoles. Xúbese pela pista y llégase al llugar de San Cristuébanu, conformáu por unes poques cases unifamiliares y dalguna nave agrícola.

Síguese de frente y desque se crucia’l llugar per un camín asfaltáu, vuelve garrase una pista de tierra y piedra que va dexando atrás esta población y que pasa a dir ente praos y cotollales. El camín tien a la esquierda una turria reforzada con una muria de piedra. Empieza asina una baxada escontra una zona arbolada onde la ruta (equí llamada El Camín de la Venta) pasa a tar, en dalgún puntu, encaxonada. Al volver empezar la xubida, llégase a un biforcu de pistes y síguese’l camín pela de la esquierda, pa poco depués, n’otru cruz, siguir pela pista de la derecha, adientrándose a poco y a poco nuna plantación d’ocalitos, col camín discurriendo per una pista de tierra ente turries. La ruta pasa a dir pelo llano ente árboles y xube hasta dar nuna carretera asfaltada. El percorríu dende San Cristuébanu a esti puntu tuvo un llargor aproximáu de quilómetru y mediu.

La carretera a la que se llega ye una vía vinculada a la carretera nacional 632 que da serviciu al llugarín de La Venta, con cases a la vera del camín. Síguese, entós, pa la derecha, pasando per delante d’esta tira de cases (ente les que se llevanta un horru). Desque se dexa atrás la última construcción, enllázase cola carretera nacional, torciendo a la derecha y pasando a dir pel arcén d’esta vía, que lleva al pueblu de Queirúas, que se traviesa siguiendo menos de 700 metros el percorríu de la carretera nacional, dexando a derecha y esquierda les construcciones, cases y horros que formen esti nucleu. Pásase al llau d’un sitiu abiertu, a la derecha, llamáu El Campu de Pascua, onde ta la capiya de Santana, a malapenes 70 metros de la carretera.

Desque se pasa’l llugar de Queirúas, llégase, pel arcén de la carretera, a una zona de rotondes de conexón d’esta vía cola Autovía del Cantábricu. Llégase pela nacional a la primer rotonda, qu’hai que bordiar pel arcén de la carretera hasta circular debaxo de l’autovía, per un pasu fonderu que depués conecta con otra rotonda. Crúciase la carretera namás dexar el pasu debaxo de l’autovía y bórdiase la rotonda, dexando a mano derecha un primer esvíu y garrando’l segundu, per una pista de grava que llueu pasa a tar formigoniada, que se sigue dalgo más de 100 metros escontra El Chanu, hasta llegar a un biforcu de caminos ente los que se localiza una construcción alta de soporte telefónicu.

Nesti puntu síguese pela vía formigoniada de la esquierda, ente cases y praos. Depués de malapenes 180 metros, esta vía conecta con una carretera local. Llevántase a mano derecha un edificiu de cases de cuatro pisos y enfrente, al otru llau de la carretera, una tira de dos cases, una de planta allargada d’un nivel y otra con dos pisos. Crúciase nesti puntu la carretera y síguese por una pista estrecha, en parte formada por pasos de formigón, que lleva en cuesta abaxo a una pista de formigón que se crucia; enllázase con un camín de tierra que baxa hasta’l llugar d’El Ventorrillu y pásase per un sitiu que tien a los llaos dos cases.

Desque se dexen atrás estes cases, tírase per una pista que, depués de 140 metros de xubida, crucia la carretera nacional 632 y sigue de frente per una pista de formigón que, ente árboles, lleva a la ilesia de San Miguel de Caneiru.

El camín dexa atrás la ilesia y cementeriu de Caneiru, dexando a la derecha les murueques de la casa rectoral vieya, obra de los sieglos XVII-XVIII. Adiéntrase per una pista de tierra y piedra que va pel monte Las Arribas, ente fresnos y lloreos, y que tres de 600 metros desemboca na carretera nacional 632. Tírase contra la derecha pel arcén poco más de cien metros hasta llegar a un ñudu de comunicaciones formáu por dos rotondes. Antes de llegar a la primer rotonda, pásase la carretera nacional 632 pa la nacional 634, pa depués, yá pel arcén d’esta vía, bordiar les rotondes y empobinar escontra la ponte de Caneiru enriba d’El Ríu Esva, que se crucia. Primero de la ponte, a mano derecha, ta la Casa del Barcu, perinteresante, que los sos oríxenes daten del sieglu XVIII y que-y llamen asina porque nella había un serviciu de barcaxe pa cruciar El Ríu Esva. 

Desque se crucia’l ríu pela ponte, síguese pel arcén de la carretera nacional 634, contra la derecha, más o menos en paralelo a El Ríu Esva, que queda a mano derecha, y ente praos y arboleda. A lo fondero pue vese un gran viaductu de l’autovía.

Depués d’unos 600 metros, llégase, nuna curva, al edificiu d’un establecimientu hoteleru, que xusto primero d’él gárrase un esvíu a la derecha, per una pista asfaltada que baxa una cuesta empinada contra’l regueru d’El Forcón y que poco depués enllaza con una pista de tierra, pela que se sigue ente árboles y dexando llueu un esvíu a la esquierda. Xúbese per una sienda estrecha, que nun segundu cruz de caminos sigue pa la derecha, en xubida, ente ocalitos nesti casu, con tramos nos qu’asoma en camín la peña madre, configurando auténticos empedraos naturales. Esti camín de tierra acaba llevando, depués d’un percorríu de dalgo más de 350 metros, a la carretera N-634. Crúciase esta vía y síguese de frente, per una sienda estrecha de tierra que xube una cuesta ente la vexetación y que, depués d’unos 300 metros, xúntase con una vía asfaltada paralela a l’Autovía del Cantábricu.

Gárrase esta vía y síguese, contra la esquierda, unos 900 metros, primero al llau mesmu de l’autovía, con ocalitos a la esquierda, y depués ente una mata de pinos y urcies, dalgo más apartada de l’autovía. Tres d’una curva, acaba cruciándose una pasarela enriba l’autovía na qu’hai ceres separaes por guardarraíles, a entrambos llaos de la vía.

Desque se crucia l’autovía, síguese pel arcén de la carretera asfaltada contra la esquierda, malapenes 100 metros, hasta garrar el primer esvíu qu’apaez a la esquierda, una pista de tierra y piedra que, nuna llinia recta perfecta trazada ente praderíes grandes y llanes, lleva a una mata. Al llau derechu d’esta pista queden les murueques d’una venta vieya, güei tomaes dafechu pola vexetación.

Doscientos metros más alantre, la pista dexa pasu a una sienduca de tierra, que baxa contra una arboleda y, depués de dos curves pronunciaes, desemboca na carretera nacional 634. Pásase la carretera y síguese de frente, per una pista de formigón que va ente ocalitales, dexando a mano derecha un depósitu d’agua. Vuelve llevar, depués de malapenes 320 metros, a la carretera nacional. Pel arcén, contra la derecha, síguese unos 100 metros, nuna zona en curva, y pásase depués a circular per una pista de tierra que s’abre a la derecha y que va ente sebes, bardiales y árboles unos 250 metros, confluyendo al final cola carretera nacional. Pel so arcén síguese a la derecha, cerca del cementeriu musulmán de Barcia, que queda a mano esquierda.

Síguese pela carretera nacional menos de trescientos metros, dexando a la esquierda l’esvíu al cementeriu. Gárrase’l primer esvíu a la derecha, na zona de La Rampla,y síguese per una carretera asfaltada que va en perpendicular a la nacional, que se va dexando atrás. A lo fondero, acolúmbrase la costa d’esta parte del conceyu de Valdés.

Pasaos 40 metros, gárrase’l primer esvíu qu’apaez a la esquierda, per una pista de tierra qu’a la derecha tien un zarru vexetal de parceles, dalgún d’ellos a base de cipreses altos, mentes qu’una gran pradería espárdese a mano derecha. En dalgún puntu d’esti percorríu, el Camín circula pente praos, siempre derecho, hasta llegar a una parcela zarrada por una sebe de tuyes. Pásase pela vera y la ruta tuerce a la derecha y depués a la esquierda, y llégase a un camín asfaltáu xusto énte la entrada a la parcela y a la casa qu’hai dientro.

Desque pasa a ser una vía asfaltada, el percorríu sigue 150 metros, ente praos, maizales y dalguna casa, hasta llegar a un primer cruz, con un horru a la derecha, onde hai que siguir de frente, ente cases tradicionales, horros y praos, yá en Barcia, pueblu que se va dir pasando pelos sos barrios.

Llégase a otru cruz de caminos, nun espaciu abiertu delimitáu nuna parte pol edificiu de les escueles de Barcia, nel barriu de Las Güelgas. Delantre d’elles hai una esplanada asfaltada amplia, arrodiada por una filera d’árboles.

Nesti puntu hai un bifurcu de caminos, con una isleta vexetal ente les dos víes que confluyen nel espaciu n’abertal. El Camín sigue pel de la esquierda, ente cases y les sos muries de zarramientu, a base de bloques de formigón, que dan pasu depués a una zona onde la carretera va ente turries de tierra a entrambos llaos, dexando a mano derecha un esvíu, nel barriu de La Fraugua. Un poco más alantre, llégase a la fonte d’El Pulgu y al barriu d’El Pontigón, con un llavaderu techáu de 1882, restauráu nel 2000, al llau del Camín, que pasa perriba del regueru d’El Pontigón.

Síguese derecho, ente cases con paneres arrodiaes de mandiles y llevantaes enriba de bodegues o construcciones auxiliares. Llégase al mediu del pueblu de Barcia, nel barriu d’El Cruceiru, onde hai munchos testimonios d’arquitectura tradicional asturiana, con cases de corredor.

Desque se pasa’l llavaderu, síguese recto hasta otru cruz, onde hai que torcer a la derecha, escontra la ilesia parroquial, que ta depués d’un espaciu abiertu.

Pásase a la vera de la ilesia y síguese derecho, dexando’l templu atrás, amás d’unos cuantos esvíos a entrambos llaos, que lleven a delles caleyes del pueblu, qu’en dalgunes llevántense otros llavaderos y munches cases y horros y paneres no que ye un nucleu de gran interés etnográficu.

Siguiendo recto, al llegar a una curva, síguese de frente, xunto a una panera, per una sienda estrecha col firme a base de llábanes de llosa y que lleva ente muries de piedra y dalguna construcción a un espaciu abiertu, con güertes de frente y un pocín a la derecha, al que se baxa per unos pasos de piedra. Nesti puntu tuércese a la esquierda y acaba llegándose a un camín asfaltáu, pel que se sigue contra la esquierda, volviendo travesar les construcciones del pueblu de Barcia. Síguese de frente, ensin garrar nengún de los esvíos qu’apaecen a derecha y esquierda, y llégase a la zona de L’Hospital; depués, a un cruz con otra carretera local, que se garra. La ruta ésviase contra la derecha, circulando ente les últimes cases del pueblu, ente les que destaca una d’estilu netamente racionalista, a mano derecha.

Síguese per esta carretera hasta dexar atrás les últimes cases de Barcia. Pásase perriba d’un regueru y llégase al barriu de La Madalena, dexando a mano derecha un esvíu que nun se toma, nuna curva.

Xúbese hasta les cases de La Madalena, que depués d’elles hai una curva zarrada a la derecha que da pasu a una baxada empinada con árboles a los llaos. Síguese derecho, ensin tomar un primer esvíu a la derecha, y apaez un poco más alantre, tamién a la derecha, un depósitu d’agua. Llégase en xubida pela llamada Cuesta del Mingón a una zona onde hai naves grandes y depués cases con dalgún horru y dalguna panera. Depués de les naves, síguese recto nun cruz de caminos y llégase a otru cruz, con dos cases apegaes, de trés pisos, a la derecha, yá nel llugar de Barceḷḷina, nel barriu de Viḷḷar.

Síguese derecho, pel arcén de la carretera local VA1, qu’aína da pasu a una zona con ceres, ente cases unifamiliares, dalgunes d’elles de grandes dimensiones y de promoción indiana. Depués d’un prau a la esquierda, onde se llevanta solitaria una panera, llégase a un cruz; nél hai que siguir de frente, ente muries altes de piedra, pa zarrar les tierres, a entrambos llaos del Camín.

Pásase depués delantre de delles cases indianes, dalgunes d’elles cayíes, y vuélvese a circular per una cera, que lleva yá a la villa de Ḷḷuarca, que’l so hospital déxase a mano derecha. Ye un centru que medró alredor d’un nucleu formáu por una construcción de primeros del sieglu XX, nuna parcela zarrada con una muria de piedra.

A la esquierda apaecen los primeros bloques de viviendes, dalgunos d’ellos de promoción oficial de los años del franquismu.

Síguese recto y desque se dexa a mano derecha l’edificiu del colexu José García Fernández, promovíu por esti benefactor local en 1911, tuércese a la esquierda, na cai de La Carril, dexando de frente la carretera que lleva al cementeriu y al faru de Ḷḷuarca.

Na baxada contra’l centru de Lḷuarca per La Carril y la so continuación Puerta de la Villa, puen contemplase vistes espectaculares, a la derecha, del puertu. Vase ente cases de tipoloxía marinera, de dos y tres pisos, con balcones de madera y fierro fundío.

N’acabando esta cai, tuércese a la derecha, pela cai Olavarrieta (lo que yera la cai de La Zapatería) camín del palaciu de los marqueses de Ferrera, güei casa de cultura y comisaría de la Policía Nacional.

Báxase per esta cai, pasando debaxo del Arcu Bayón, que comunicaba delles estancies del palaciu, xunto a la so capiya y con vistes, a lo fondero no alto, a la capiya de San Roque, que domina la villa dende la otra oriella d’El Ríu Negru. Desque se pasa’l palaciu, síguese per una zona d’escalones, hasta enllazar con otra cai. Tuércese entós a la esquierda y báxense unos pasos que lleven hasta la plaza de los Güevos o de la Ponte Vieya y el paséu fluvial. Crúciase pela ponte de fierro, dende la qu’hai a mano derecha bones vistes de la Casa Conceyu de Valdés.

Desque se crucia la ponte, llégase al antiguu cruceru de Ḷḷuarca, síguese pela cai del Cruceiru hasta llegar a la cai Uría y la plaza de Los Pachorros, na zona del enanche de la villa de primeros del XX, onde se caltienen dellos edificios d’interés notable d’esi tiempu.

Dende la plaza de Los Pachorros vase, a la derecha, a la plaza d’Alfonso X el Sabiu, presidida pola Casa Conceyu y onde se localiza tamién el palaciu de los marqueses de Gamoneda.

El Camín sigue de frente, pela cai La Peña, qu’en xubida empinada y depués de delles  curves zarraes, ente cases tradicionales y bones vistes a la villa, llega a una placina dende la que se pue garrar, a mano derecha, un esvíu que lleva a la capiya de San Roque.

Nesti puntu, el Camín de Santiago sigue pa la esquierda, pel llamáu Camín Real, pel arcén d’una carretera local, ente cases unifamiliares y muries de piedra. Nun se garra nengún esvíu a la derecha de los que van apaeciendo, y llégase al barriu de La Corripa, con vistes a la derecha de la gran casona de San Xustu, en L’Outeiru.

Nesta zona, n’acabando la recta que se vien siguiendo dende la salida de Ḷḷuarca, llégase a un biforcu de caminos onde se garra’l que sigue pa la derecha. Depués de cien metros aproximao, llégase a otru cruz, quedando a la esquierda l’edificiu rectangular de les escueles vieyes y a la derecha, la casona con capiya que se describió enantes.

Gárrase l’esvíu a la esquierda, pasando énte les escuelas, que na actualidá acueyen una Casa d’Alcuentros, y síguese per una carretera asfaltada que baxa, con una muria alta de piedra a la derecha llevantada enriba d’un turria de peña tallada hasta garrar forma de paré vertical. Per esta carretera llégase depués d’un percorríu curtiu a les murueques de la ilesia vieya de Santiagu, de dómina medieval.

Pasada la ilesia, crúciase El Ríu del Oḷḷa per una ponte de piedra, d’un vanu namás, y síguese pela carretera local, encaxonada ente turries de tierra y con praderíes a entrambos llaos. Síguese recto y llégase depués d’un cruz a una zona de naves ganaderes, yá nel pueblu de Taborcías.

Pásase a la vera de les naves, que queden a mano esquierda del camín, y de delles cases a la derecha, ente les que ta’l primer cabazu que s’atopa nel itinerariu del Camín de Santiago costeru d’Asturies.

Síguese derecho, ente praos, dalguna casona y cases modernes, y xúbese hasta una ponte pa travesar les víes del ferrocarril Xixón-Ferrol, pa depués siguir recto, ente más praderíes y cases aislaes, hasta pasar al pie de la fonte de San Isidro en La Calea.

Más alantre, siguen socediéndose, aislaes, cases modernes, otres vieyes (delles con galeríes de madera), amás d’horros, paneres y cabazos. A mano esquierda ye posible contemplar, acullá de los praos, la torre de la ilesia moderna de Santiagu. Pásase depués al llau del pueblu de Taborcías, a mano esquierda, con munchos exemplos d’arquitectura tradicional. Depués d’él, siempre en llinia recta, llégase a una casona que ta en frente del percorríu y pela so derecha xúbese hasta la carretera nacional 634, nel llugar de Viḷḷuír.

Crúciase la carretera y síguese en dirección a Costancios, per una vía local asfaltada, ente cases unifamiliares d’últimos del sieglu XX les más d’elles, nel llugar d’Acalcabu. Tres dalgo más de 300 metros, llégase a un cruz de caminos, onde queda a mano esquierda l’edificiu de les escuelas.

Síguese de frente, hasta llegar a otru cruz precedíu d’unes cases. Nesi cruz gárrase l’esvíu a la derecha, que va ente praos, hasta llegar a otru cruz onde se sigue de frente, dexando un esvíu a la derecha. Síguese asina, ente praos, pela zona de Las Pontigas, otros 280 metros, hasta llegar, depués d’otru cruz onde se sigue recto, a una casa con horru (¿quiciás una venta vieya?). Desque se dexa atrás, el camín asfaltáu da pasu a una pista de tierra y piedra, que sigue nuna xubida llixera, non mui lloñe de l’autovía, que, en paralelo, va a la esquierda. Pásase al llau d’una parcela habilitada como circuitu de carreres de coches y poco depués incorpórase a un camín asfaltáu. Síguese recto, ensin garrar nengún esvíu, hasta llegar menos de 300 metros depués a un cruz onde hai qu’escoyer el camín que sigue pela esquierda, mentes que’l de la derecha lleva a un petuñu de cases.

Sigue’l percorríu per esta carretera local, siempre derecho y ensin garrar esvíos, pudiendo apreciarse yá llueu, a la derecha, l’edificiu de la ilesia d’Outur, asitiáu al pie de la carretera nacional. Pásase debaxo de cases soles y al llau d’una panera puesta enriba d’un cuerpu de dos pisos d’altura, fechu en piedra. Crúciase poco depués un regueru, nel barriu de Carral, que depués d’él xúbese a la zona conocida como El Palaciu. Más alantre, llégase al barriu de La Casona, crúciase otru regueru y déxase a mano derecha un conxuntu de casa, panera y delles instalaciones agrícoles.

Síguese recto, hasta otru cruz que, a la derecha, lleva a la carretera nacional 634 y a la ilesia d’Outur, que pa llegar a ella ye menester esviase del Camín (que nesti puntu sigue recto) alredor de medio quilómetru.

Nesti puntu, na zona alta d’Outur, acaba esta etapa.

Compartir

Share on facebook
Share on twitter
Share on linkedin
Share on pinterest
Share on email
Scroll to Top