Camín de la Costa

Etapa 15: A Veiga - Abres

Esta etapa, de malapenes 6,89 quilómetros, constituye en realidá’l tránsitu ente’l Camín costeru asturianu y Galicia, enllazando la última capital de conceyu del Principáu, A Veiga, cola provincia de Lugo.

El percorríu tien dos partes clares, la primera d’ascensu dende la villa d’A Veiga hasta l’altu de Bustelo, que resalva nunos cuatro quilómetros un desnivel de daqué menos de doscientos metros, mentes que de siguío empieza’l descensu contra El Río Eo n’Abres, onde se llega xusto a la llende ente les comunidaes autónomes d’Asturies y Galicia.

La metá del percorríu va per víes asfaltaes y lo demás correspuende a pistes de tierra y grava. Pásase pelos pueblinos d’A Cruz, Grandamiá y Abres, de calter agrícola dafechu y con presencia destacada de cabazos y otres estructures auxiliares de los llabores de la tierra y la ganadería. Bona parte del itinerariu va ente pinales y ocalitales.

Ente’l patrimoniu cultural vinculáu directamente al Camín de Santiago nesta etapa destaquen dellos edificios de la capital d’A Veiga, como la ilesia parroquial o’l palaciu urbanu de Villamil, anguaño casa de cultura. Nel itinerariu pásase al pie de los restos del mesón d’A Sela de Murias, y cerquillina de la ilesia parroquial de Santiago d’Abres, obra barroca del sieglu XVIII, onde ta documentada l’acoyida a pelegrinos yá na dómina moderna. El final de la etapa y del percorríu asturianu del Camín de Santiago costeru márcalu la ponte d’O Fornacho sobre El Río Eo, herederu de la histórica A Ponte Vella, qu’ellí existió hasta primeros del sieglu XIX.

Descripción de la etapa

Empieza la etapa énte la Casa Conceyu d’A Veiga, edificiu construyíu nel sieglu XIX nel llamáu Campo de Medal, zona ganada a El Río Suarón. Destaca nesta plaza una fonte con una estatua d’una musa enriba, obra del escultor francés Mathurin Moreau.

Síguese pel parque de Medal (que foi tiempu atrás campu ferial d’A Veiga) y pásase al pie del quioscu de música pa llegar yá llueu a la ilesia parroquial, de mediaos del sieglu XIX.

Enfrente d’ella, un piñu de viviendes conformen la cai mayor veigueña, con edificios d’ente dos y cuatro plantes nos qu’abonden los balcones de fierro fundío y les galeríes de madera.

Énte la ilesia asítiase tamién la Casa la Cultura, nun edificiu que foi propiedá de la familia Villamil.

El Camín sigue frente a esti equipamientu pela cai Alameda hasta llegar a una ponte sobre El Río Monxardín, que nun se llega a cruciar, porque primero hai que virar a la esquierda pa siguir la ruta pel paséu fluvial de la cai Milagrosa, con bloques d’edificios a la esquierda (a la derecha, al llau del ríu, hai dalgunes güertes y viviendes de planta baxa). Vase entós per esti paséu hasta llegar a la siguiente ponte, nun sitiu onde a la esquierda hai un edificiu acondicionáu como albergue de pelegrinos. Cerca d’él, a la esquierda, llevántase una ilesia de mediaos del sieglu XX, precedida por una visera de formigón, de notable interés.

El Camín crucia la ponte sobre El Río Monxardín, dexando a mano derecha un gran llavaderu cubiertu. Desque se resalva’l ríu, xírase a la derecha, contra una pista de formigón que xube la cai d’A Pandela, depués de dexar pa la derecha un cruz con otra cai. De la que se xube ente viviendes unifamiliares d’últimos del sieglu XX, ye posible acolumbrar una panorámica bárbara de la villa amás d’A Ría del Eo y la ponte de los Santos, yá a lo fondero.

En dexando atrás los últimos xalés, el camín pasa a ser una pista de tierra que s’adientra nun ocalital. Depués de percorrer unos 130 metros, sigue contra la esquierda, nuna curva onde hai un biforcu de caminos. Sigue xubiéndose, ente árboles y zones con una fuerte turria de tierra a mano esquierda, hasta desembocar nuna zona más llana, con praderíes a la esquierda y ocalitos a la derecha, y enllazar con una pista que provién de la esquierda, pela que se sigue derecho en dirección a Miou, la siguiente localidá al pie de la que pasa’l Camín de Santiago (anque ensin entrar nella) y que yá empieza a vese a mano derecha.

Depués d’aproximao 250 metros, gárrase una curva zarrada contra la derecha, que lleva directamente a les primeres viviendes d’A Cruz. Equí, el camín pasa a tar formigoniáu.

Nel primer cruz de caminos, tuércese contra la esquierda, ente viviendes, y pásase al pie d’un cabazu allugáu enriba d’una estructura alta de mampostería de piedra. Esta cai lleva a un espaciu n’abertal, nel que se sigue de frente, per un camín asfaltáu qu’al poco dexa pasu a una pista de tierra abierta ente turries altes de tierra a entrambos llaos de la ruta. Empieza equí’l percorríu pel llamáu camín d’Os Arrieiros, más o menos en paralelo al regueru de Louteiro, travesando nun percorríu bien llargu un gran monte d’ocalitos. 

Tres del encaxonamientu primeru del Camín, pásase de siguío a una zona onde’l paisaxe ábrese daqué, con praos a mano derecha, pa depués volver a pasar ente turries de tierra y ocalitos. Déxase atrás un depósitu d’agua y llégase a un biforcu de caminos onde se sigue de frente, pel mediu d’un auténticu ocalital. Síguese derecho, y más alantre llégase a otru biforcu de siendes onde se tien que siguir la que tira pa la derecha, que baxa ensin garrar esvíu nengún y pasa ente cortafueos (franxes de terrén ensin árboles pa evitar posibles quemes), y llega al regueru de Louteiro, que se traviesa per un pasu a base de delles piedres.

Empieza entós una xubida, en paralelo al calce del ríu, ente ocalitos y una turria alta de tierra a la derecha, qu’acaba llevando a les murueques de lo que foi mesón d’A Sela de Murias, a mano derecha.

Al poco, desembócase nuna carretera asfaltada que se sigue pela vera derecha hasta llegar, depués d’unos 60 metros, a un cruz de caminos, onde hai que garrar el de la esquierda, que lleva a Abres.

Báxase per esta carretera y, tres percorrer daqué más de 900 metros y pasar delles curves zarraes, llégase a Grandamiá, un petuñín de cases. Hai entós un biforcu de víes onde se garra la de la derecha, qu’aína va dexar atrás un llavaderu p’adientrase nun conxuntu d’edificios ente los que destaquen dellos cabazos.

Desque se pasa esti nucleu, el percorríu sigue pela carretera en baxada hasta llegar, tres unos 450 metros y pasada una curva bien zarrada, a les primeres viviendes d’Abres. El Camín va travesar dellos de los sos barrios nos sos últimos quilómetros de percorríu asturianu.

Síguese contra la esquierda nel primer biforcu de caminos qu’apaez, xubiendo per un camín asfaltáu contra’l barriu d’O Pebidal. Poco depués, pue vese a mano derecha’l palaciu de Miranda, del sieglu XVII.

Desque se pasa’l palaciu, síguese ente cases unifamiliares, con bones vistes a la derecha del conxuntu del pueblu d’Abres, presidíu pola ilesia parroquial de Santiago, al pie de la que, sicasí, el Camín de Santiago nun va llegar a averase.

Nel llugar d’O Rego de Casal, desque se pasa una curva zarrada y se dexa a mano derecha un depósitu d’agua, síguese pela carretera de la esquierda, que baxa, dexando a mano derecha una gran casería con cabazu.

El camín adiéntrase agora nel mediu del pueblu, nel barriu d’A Rúa, y pasa al pie d’una gran nave ganadera y una tira de viviendes pa, tres d’una curva, bordiar la fachada principal del palaciu d’A Rúa, güei dedicáu a xeres agrícoles y que caltién na so parte posterior l’edificiu de la capiya vieya, qu’al llau d’ella pasó’l Camín.

Desque se pasa’l palaciu, síguese de frente. Déxase a mano derecha un esvíu, pa depués virar contra la derecha (nuna zona onde taba la histórica A Ponte Vella, que resalvaba l’Eo y enllazaba con Galicia), ente cases baxes y muries de piedra que separen parceles. Pásase al pie del edificiu de les escueles, que depués d’él, y nun cruz de caminos, tuércese contra la esquierda. Bórdiase entós una vivienda que na parte trasera tien dos cabazos y enllázase cola carretera local que lleva a A Veiga y que, tres de malapenes 150 metros, lleva a la ponte d’O Fornacho sobre l’Eo, llende ente Galicia y Asturies y final de la ruta y del Camín costeru al so pasu pel Principáu.

Compartir

Share on facebook
Share on twitter
Share on linkedin
Share on pinterest
Share on email
Scroll to Top