Camín de la Costa

Etapa 3: Ribeseya - Priesca

Etapa con una llargura de 29,02 quilómetros que va pela zona occidental del conceyu de Ribeseya amás de pelos de Caravia, Colunga y una parte pequeña del de Villaviciosa. Ye una etapa que combina xubíes y recuestos de dalguna entidá, como los que lleven a Abéu, Berbes y Priesca, con percorríos cuasimente llanos en plena costa cantábrica ente los que destaca’l tramu marítimu tan llargu del conceyu de Caravia, per una contornada natural dafechu, ensin construcciones a la vista.

El Camín va en bona parte per tramos de vía asfaltada, anque cuasi una tercer parte del percorríu faise per pistes de tierra y piedra. Pásase per grandes núcleos de población, como les capitales de Ribeseya y Colunga, y per un bon piñu de pueblinos y llugares onde se caltienen testimonios escelentes de l’arquitectura tradicional popular d’Asturies. Son abondos los horros y paneres, los dos elementos más definitorios de les construcciones auxiliares de sofitu al llabor campesín y ganaderu qu’a lo llargo de tantos sieglos supunxo’l sustentu fundamental de la xente d’Asturies.

El paisaxe natural ye en dellos puntos d’esta ruta interesante sobre manera, al dir el Camín a la vera de playes del interés de la de Vega en Ribeseya o les de L’Arenal de Morís y La Espasa, nos conceyos de Caravia y Colunga. De la mesma manera, la ruta adiéntrase en zones más altes, non mui lloñe de la mar, al pie de les xerres d’El Fitu y El Puertu Sueve, que faen posible pasar en pocos quilómetros del contactu visual directu col Cantábricu a paisaxes arispios chiscaos de pueblinos. Un puntu bramente guapu de fusión ente la naturaleza y la construcción humana atópase en Büeñu, coles dos pontines, llamaes romanes, resalvando’l regueru que llueu va desembocar na costa de La Isla, en Colunga. El patrimoniu cultural atópase na ilesia de San Salvador de Priesca, a lo cabero de la ruta, el so testimoniu más relevante. Esta ilesia prerrománica, caltenida nun estáu perbonu, forma parte dende’l 2015 de la Llista del Patrimoniu Mundial de la UNESCO.

Les referencies documentaes del pasu de pelegrinos pel percorríu xacobéu que garra esta etapa son mui abondosos, y van dende les noticies relatives a la existencia d’hospitales de pelegrinos en llugares como la propia Ribeseya, San Esteban, Berbes o Colunga, hasta las menciones frecuentes que se faen en documentos eclesiásticos a la muerte de pelegrinos de procedencies mui variaes en dellos de los llugares que s’atopen nesta etapa. Tamién hai referencies al pasu de pelegrinos per sitios que güei queden lloñe, más o menos, de la ruta oficial, casu del monesteriu vieyu de Santiago de Caravia (fundáu en 1040), Llastres o la ilesia de Santiago de Gobiendes.

Descripción de la etapa

La etapa empieza en plenu centru del cascu históricu de Ribeseya, énte la ilesia parroquial de Santa María Madalena. Dende equí síguese pela cai Manuel Fernández Juncos, lo que yera la cai Mayor de la villa, que presenta un trazáu irregular, propiu del momentu en que se fixo, en plenu Medievu. Caltiénense a los llaos d’esta vía construcciones vieyes, delles llevantaes ente cortafueos de piedra, qu’en xeneral tienen una fachada estrecha, frutu de la disposición característica del parcelariu (finques estreches y mui llargues) propia del urbanismu medieval. Nún d’esos inmuebles nacieron los hermanos Uría-Aza (Bernardo, Antonio y Celestino), artistes locales destacaos que dexaron lo meyor de la so obra na ilesia parroquial de Ribeseya, ellí cerca, mentes qu’un poco más alantre, nel númberu 18, nació’l gran pintor Darío de Regoyos, en 1857, nun edificiu curiosu del sieglu XVIII onde destaca la calidá de la piedra de cantería caliar colo que se construye la fachada, presidida por un gran escudu de los marqueses de Collado.

Esta cai lleva a un parquín na plaza de Villar Valle o del Mercáu de Ganáu y hai que torcer a la esquierda, pela cai Manuel Caso de la Villa, qu’empobina derecho al puertu de Ribeseya, onde apaez primero l’edificiu racionalista de la Rula.

En dómina medieval y moderna, había que pasar la Ría de Ribeseya en barca. Salíen del puertu (concretamente del sitiu conocíu como la Rambla de la Barca) les embarcaciones que dexaben al pelegrín siguir la ruta pela sienda costera camín de Compostela. En 1869 construyóse una primer ponte enriba del Sella y canalizóse dende entós per equí la conexón a pie ente les dos orielles del calce fluvial, lo que facilitó tamién la medría urbana de Ribeseya acullá de los sos llímites medievales, produciéndose la urbanización del arenal de Santa Marina, que se convirtió na gran playa urbana del llugar.

El Camín de Santiago sigue’l percorríu pa la esquierda de la rula, pela oriella de la ría, pel paséu marítimu Reina Letizia, hasta llegar a la ponte, que tien cera a entrambos llaos del so tableru, colo que se posibilita’l tránsitu peatonal seguru. Esta ponte ye’l puntu final del famosu Descensu Internacional del Sella, una de les competiciones mundiales principales de piragüismu que cada añu celébrase la primer fin de selmana del mes d’agostu.

Nel sen de la marcha, dende la ponte vese a la derecha la desembocadura del Sella, amás de la playa de Santa Marina, y, p’atrás, el cascu vieyu de Ribeseya. Dende’l llau esquierdu de la ponte ye posible contemplar una panorámica bárbara del valle que conforma El Ríu Sella, y tamién La Moría d’Ardines, relieve de formación kárstica que dientro d’él desenvuélvese un sistema de cavidaes mui revesosu ente les que destaca la d’El Pozu’l Ramu, el gran santuariu asturianu del arte rupestre paleolíticu. Esta cueva incluyóse nel 2007 na Llista del Patrimoniu Mundial de la UNESCO y ye una visita obligada pa cualquier amante del arte y de la historia de la Humanidá. Dende’l Camín de Santiago hasta l’accesu a la cueva hai una distancia de malapenes 400 metros, de percorríu fácil pel arcén de la carretera local RS2.

Desque atraviesa la ponte sobre’l Sella, el Camín tuerce a la derecha y inmediatamente depués a la esquierda, pela cai de Darío de Regoyos, hasta que, menos de 200 metros depués, vuelve torcer a la derecha pela cai Avelina Cerra, que na vera esquierda tien una fonte d’agua potable, amás de localizase equí tamién l’institutu d’educación secundaria del mesmu nome. Esta cai desemboca na de Dionisio Ruisánchez, paralela al paséu marítimu de la playa de Santa Marina, que la ruta xacobea oficial nun llega a pisar.

Síguese per esta cai 1,8 quilómetros aproximao. Nel tramu de la cai paralelu al paséu marítimu, socédense los grandes palacetes promovíos por aristócrates y burgueses a primeros del sieglu XX, nel momentu en qu’empezó a urbanizase l’arenal de Santa Marina, colo que se convirtió nún de los grandes sitios de branu de les clases acomodaes nel Cantábricu. Grandes viviendes unifamiliares y xalés como Villa Rosario, Villa Argentina o’l Xalé d’Uría-Aza apaecen na cai nel primer trechu, pa dar pasu poco a poco a xalés racionalistes y a viviendes de construcción más recién y, a la final, a la gran urbanización Astursella, conformada por viviendes unifamiliares pariaes y de más desenvolvimientu n’altura.

A partir d’una rotonda, llamada plaza de Miguel Ángel, la cai pasa a llamase Carretera de San Pedru, na zona onde yá ye dominante la presencia de construcciones más de recién.

Esti percorríu tan llargu lleva a la salida de Ribeseya, na zona conocida como Somos, y enllaza depués d’una rotonda cola carretera local que lleva al pueblu de San Pedru; la ruta va pel arcén d’esta vía. Empieza entós una cuesta empinada que resalva un desnivel aproximáu de 100 metros ente la capital del conceyu y el pueblu d’Abéu.

Síguese pela carretera local alredor d’un quilómetru hasta llegar a San Pedru. Nesa xubida déxase a mano derecha un autocine y a mano esquierda un camping, xusto a la salida de Ribeseya, na zona conocida como Los Porqueros. Más alantre, déxase a la esquierda un esvíu y llégase yá al nucleu de San Pedru, que se traviesa siguiendo la propia carretera local. A derecha y esquierda tán les construcciones d’esta población.

Pásase al pie d’una fonte y llavaderu. La ilesia del llugar, del sieglu XVIII, queda a mano esquierda del Camín, nuna cota inferior de la lladera onde s’alluga’l pueblu, que tien dellos bonos exemplos d’horros y paneres, dalgunos d’ellos con talles decoratives nes trabes, les vigues de madera que conformen la caxa de la construcción.

Déxase atrás San Pedru y síguese pela carretera local, con árboles a los llaos. La pendiente aumenta y llégase a otru pueblu, Abéu, depués de malapenes un quilómetru de percorríu. A la salida de San Pedru hai, a mano esquierda, una construcción vieya de piedra, de dos pisos, que tien un aleru mui sacáu con teyadín na cubierta.

El percorríu del Camín per Abéu faise pela propia carretera local, pel barriu d’El Cantarillón; nun s’entra en pueblu, que queda a mano derecha de la ruta xacobea.

Síguese pela carretera hasta un cruz de caminos que lleva, a mano esquierda, a la ilesia de San Esteban, d’aniciu románicu, y al albergue de pelegrinos que tien al llau, herederu del qu’equí existió en dómina moderna. Nos llibros rexistru de la ilesia existen testimonios que confirmen el pasu de pelegrinos pel llugar, que dos d’ellos, d’orixe francés, diben tener la desgracia de morrer nesti llugar nos años 1742 y 1764.

Pa llegar a San Esteban hai que s’esviar unos 300 metros de la ruta, nun cruz de caminos onde, pa siguir col camín a Santiago ha tirase de frente, pel llamáu Camín Real. Ye ésta una ruta formigoniada que va a media lladera per una rodiada natural dafechu, ente árboles y, en dellos sitios, con muries a los llaos, y con perspectives amplies de valles y picos contra la esquierda. Esti Camín Real xube hasta’l sitiu conocíu antaño como El Mansu, un altucu onde hubo cuantayá una venta, de la que nun se caltienen restos.

Depués d’un quilómetru y mediu aproximao llégase a un biforcu de víes. La que tira pa la esquierda va al pueblu de Barréu, mentes que’l camín de Santiago va pela derecha, pa Vega, pueblu al que se llega en malapenes 350 metros, per un camín formigoniáu en baxada con panorámiques amplies de la playa de Vega contra la esquierda. Éntrase a Vega pel barriu de La Sertal.

El Camín traviesa’l pueblu de Vega, ente cases de dos o trés altures, con corredores y galeríes, y a la vera de munchos horros. Pásase al pie de la capiya de María Madalena, construyida en 1922, y déxase a mano derecha una fontiquina y a mano esquierda, una casa mui llamativa que tien pintaes na fachada trompe-l’œil que reproducen les galeríes d’arcos d’una cai d’Avilés o escenes famoses de la historia del arte, como La llechera de Vermeer.

El camín per Vega desemboca na carretera local RS4 y nesti puntu síguese pa la derecha, pel arcén de la vía que lleva directamente a la playa de Vega. Crúciase una pasarela moderna que resalva’l regueru de L’Acebu y que dexa ver, a mano esquierda, les murueques de la ponte vieya de piedra, de la que namás se caltién l’arranque del estribu esquierdu que tenía pela construcción, porque una llena asocedida n’agostu de 1988 arrampló colos demás elementos d’esta infraestructura.

El Camín sigue de frente, desque se pasa’l ríu, per una vía empedrada, que lleva a un biforcu de siendes onde se tien que siguir la que tira pa la esquierda, que va escontra’l sur, dexando a mano derecha la playa. Síguese per esta sienda empedrada con piedra de cantu y llégase a otru biforcu onde la ruta sigue pel camín de la derecha, too ente praderíes. Continúase per una sienda estrecha de tierra, con dalgún tramu que sigue empedráu, que xube nuna cuesta empinada la lladera d’El Cuetu l’Aspra, dexando contemplar, a mano derecha, perspectives amplies de la costa cantábrica.

Nesta zona desenvolviéronse hasta va poco llabores mineros d’esplotación de fluorita y fíxose la restauración ambiental de parte de los terrenos, con rellenos de tierra que configuraron la traza actual del paisaxe.

La pista de tierra desemboca nun camín anchu de grava y síguese per él contra la derecha. Depués de menos de 400 metros conecta cola carretera nacional N-632, que nun se llega a algamar porque xusto enantes gárrase un camín de formigón que tira pa la derecha y que lleva directamente al pueblu de Berbes, última población del conceyu de Ribeseya pela que va’l Camín de Santiago costeru y onde hubo un hospital de pelegrinos en dómina moderna, fundáu en 1678 por Alonso Covián Ganancia y que desapaeció en 1702 depués d’una existencia curtia.

A lo llargo de los cuasi 2,5 quilómetros de percorríu hasta llegar al paséu marítimu de la playa de La Espasa, el Camín de Santiago va ente praos y cola presencia de contino de la mar como compañera del viaxe, amás de ser posible tamién contemplar bones perspectives d’El Puertu Sueve, no que constituye una panorámica escepcional que combina la mar y el monte. Va ser frecuente la presencia de vaques y gües pastiando, y hai que cruciar delles portielles d’accesu a finques con guarida de pasu pa la ruta xacobea. N’otros casos, atópense llendadores eléctricos peles veres del percorríu del Camín, pa que’l ganáu nun escape. Nun puntu de cruz de caminos, onde hai una fonte y un bebederu, ha dexase a mano esquierda l’esvíu a la capital del conceyu de Caravia.

Más alantre, a la vera de la playa de Veciella, crúciase una pontiga de madera enriba del regueru del mesmu nome, conocíu tamién na documentación histórico como regueru de los Romeros pola so vinculación col Camín de Santiago y que cerca d’él taba’l monesteriu vieyu de Santiago de Caravia.

Esti monesteriu fundóse en 1040 pol conde Nuño Rodríguez, que-y llamaben “el Can”, y pasó en 1176 a tar baxo’l control de la catedral d’Uviéu (por determín del rei Fernando II), hasta la so desapaición a últimos del sieglu XVI. Esti centru atraxo en dómina medieval munchos pelegrinos gracies a les reliquies que guardaba, ente otres de la propia Virxe y de San Miguel. Hai fontes documentales que lleguen a señalar que nesti monesteriu hubo una posada rexentada por caballeros de la orde de los Templarios.

Agora existe nesti puntu un área de descansu con meses y bancos habilitaos nuna contornada escepcional, énte la mar. Poco depués, y tres d’un tramu empedráu, llégase de frente a ún de los llaos de la ensenada onde se localiza la playa de La Espasa, colo que se pue contemplar una panorámica bárbara d’ella, cola presencia a lo fondero del pueblu de La Isla.

Esta sienda marítima lleva al paséu de La Espasa, yá nuna contornada onde apaecen construcciones unifamiliares. El paséu presenta un firme empedrao primero, y depués adoquinao, que lleva a la propia playa y a la zona d’El Visu, onde existen dellos equipamientos, como restaurantes, zona d’aseos y aparcamientu de vehículos.

Síguese pel paséu y al final d’él, na zona del aparcamientu, xúbese una rampla y llégase a la carretera d’accesu a la playa. Crúciase y accédese a la ponte sobre El Ríu Espasa, que tien una cera pa peatones separada del tráficu rodao. Dende la ponte pue contemplase la desembocadura na mar d’esti ríu, amás del edificiu de la venta vieya de La Espasa, construcción histórica yá documentada nel sieglu XVIII, asitiada yá nel conceyu de Colunga y que na actualidá tien una dedicación agropecuaria.

Desque se crucia’l ríu, síguese la ruta per una cera al llau de la carretera nacional 632. Llueu, gárrase’l primer esvíu a la derecha, per un camín asfaltáu que sigue en sen perpendicular la carretera unos metros pa depués torcer a la esquierda, escontra’l barriu d’El Barrigón, del llugar costeru de La Isla. El Camín va ente cases y dexa a la derecha un caleyón estrechu que lleva a la playa de La Isla. Esta vía vuelve llevar a la carretera nacional y síguese a la derecha per una cera, xunto a dalguna casona curiosa.

Nel primer cruz de caminos que s’atopa, ha cruciase la carretera y siguir pa la esquierda, per un camín paralelu a esta vía que dexa apartase d’ella unos pocos metros, per una zona acabante urbanizar. Depués d’otru entronque cola carretera nacional, síguese a la esquierda, per una cera que se va dexar malapenes 270 metros depués, pa garrar una sienda de tierra y piedra que s’abre a la esquierda y que supón que’l Camín s’aparte del nucleu de La Isla, pel que nun va’l Camín de Santiago oficial, anque hai nél un albergue de pelegrinos que ta nunes escueles vieyes.

Depués del esvíu de la nacional, el camín, configuráu nesti puntu como un senderu estrechu de tierra, va ente vexetación mesto, dexando atrás al poco un trechu curtiu de cera tres d’unes viviendes unifamiliares. Déxase a mano derecha un esvíu a la nacional y a La Isla, y síguese per un camín rural dafechu, que lleva a La Riega Bueñu, que se pasa gracies a trés pontines de piedra, que llamen los “puentes romanos”, anque en realidá daten d’una dómina mui posterior, como atestigua’l so perfil oxival típicu de dómina gótica.

Desque se pasen, síguese per una sienda ente árboles que dacuando llega a iguar un pasillu vexetal auténticu; debaxo d’él va, nun pocoñín de xubida, el Camín, hasta llegar al palaciu de Bueñu y la so capiya, puntu onde la ruta pasa a tener firme de formigón y lleva al pueblu de Bueñu.

Crúciase’l pueblu, ente cases, y a lo cabero d’elles, nun sitiu abiertu, hai una fonte. Dalguna casona vieya, con escudu, va chiscando’l percorríu de la ruta xacobea de la que pasa per esti llugar.

A la salida del pueblu, nun biforcu de caminos, síguese pel de la derecha, asfaltáu y con un poco de cuesta, con una muria de piedra pela vera derecha. De la que se xube per esta ruta puen acolumbrase bones perspectives del tramu costeru d’esti puntu de Colunga, amás d’El Puertu Sueve. Déxase a mano esquierda dalguna construcción en ruina y el llugarín de Covián, con viviendes unifamiliares.

Empieza equí una baxada que va llevar a una zona de cases de construcción mui recién y dalguna pumarada. Llégase a una carretera local que se crucia pa siguir per una sienda de tierra que desemboca poco depués nesa mesma carretera, pela que se sigue hasta dar na carretera autonómica AS-260. Crúciase y síguese per un camín asfaltáu qu’empobina, depués de malapenes 400 metros, a les primeres construcciones de la villa de Colunga, capital del conceyu del mesmu nome. A mano derecha remanez aína la escuela Braulio Vigón. Más alantre llégase a la capiya de Loreto y al espaciu verde qu’hai énte ella; dende’l so mirador ye posible acolumbrar delles de les casones de promoción indiana qu’aguapien la entrada a Colunga, casu del llamáu xalé montañés, de los años 1920, y que destaca pola torre que presenta na so fachada principal, na esquina.

Dende equí, báxase pal centru de Colunga y desembócase na Avenida d’Asturies, pela que se sigue a la esquierda, pasando per delantre d’un gran xalé de 1901 d’estilu modernista y llegando yá llueu cerca de la ilesia parroquial, nun sitiu onde se xunta l’Avenida d’Asturies cola carretera AS-257 que va a Llastres y el Muséu del Xurásicu d’Asturies. Xusto na confluencia, llevántase’l gran edificiu del café La Esquina.

Crúciase la carretera AS-257 mesmamente énte’l café La Esquina y llégase a la ilesia parroquial de San Cristóbal.

Déxase atrás la ilesia y al llau ta la casa de los Alonso de Covián, que delantre d’ella tien un xardinín con una fonte. Pásase a la vera d’esta casa y xúbese pela cai Grande Covián (antigua cai Real), que lleva a la plaza del Xeneral Vigón y a la capiya de Santa Ana y San Hilarión. Esta capiya de Santa Ana ye tolo que queda del hospital vieyu de pelegrinos de Colunga, creáu nel sieglu XVI pola cofradería de Santa Ana, vinculada al gremiu de mareantes del puertu de Llastres. Nesti tránsitu pel centru históricu de Colunga va pasase xunto a edificios de gran interés, d’estilos variaos, como la modernista Casa de los Pablos o delles edificaciones tradicionales, como la llamada Casa de los Soportales, d’estilu barrocu, que tien nel pisu d’embaxo soportales formaos por arcaes de mediu puntu y que se remata la construcción con una galería acristalada.

Cerca de la capiya puen vese dellos testimonios interesantes de construcciones populares, datables nos sieglos XIX y XX, con galeríes de madera y teyadinos. Un exemplu ye l’edificiu, mui reformáu, del hostal El Mesón, xunto a la capiya de Santa Ana, construyíu en 1856.

Al llegar a lo cabero d’esta cai, na plaza’l Mercáu, síguese pela derecha, baxando pela cai del Carril, conformada como una rampla llarga que llega a la carretera nacional, que se crucia, enllazando cola carretera AS-258 y siguiendo pela cera. Pásase El Ríu Llibardón per una ponte moderna de formigón (heredera de la ponte histórica d’El Sorriberu) y síguese per una cera hasta un primer cruz de caminos, onde hai que garrar el de la derecha, correspondiente a la carretera local CL-1.

Síguese per esta carretera local 1,6 quilómetros aproximao, pasando pelos barriucos d’El Llechazu, La Calzada, El Charcón, Zafra, Tras la Miranda y El Tarrerón, na vega de los ríos Sales y Llobones. Ye ésta una zona más o menos llana, onde se van viendo estos barrios pequeños con munches construcciones unifamiliares en xeneral de va poco. Ente los núcleos hai praderíes y dalguna pumarada.

Al llegar a La Venta Peón, onde tovía existe l’edificiu, mui alteriáu, de la venta vieya, gárrase un esvíu a la esquierda, per un camín formigoniáu que va llaniando y que lleva a un pasu fonderu de l’autovía, desque se crucia El Ríu Llobones per una pontina.

En pasando l’autovía, síguese derecho pel arcén de la carretera autonómica AS-258, nuna cuesta empruna pel monte de La Viesca, que lleva hasta l’esvíu al nucleu de La Corraliega, onde yá la ruta vuelve dir pelo llano. Poco depués déxase a mano esquierda l’esvíu a El Conyéu y síguese equí pela carretera local. Déxase a la esquierda otru esvíu, nesti casu a Casablanca, y síguese nuna contornada de llombuques y valles, chiscaos por dalguna construcción y casería. Desque se dexa a la esquierda l’esvíu al pueblu de Beldréu, xúbese per un camín asfaltáu que tien a la vera derecha, nel sitiu conocíu como La Cruz de Beldréu, una capiyina d’ánimes, construyida en 1955 y que caltién dientro una representación de la Virxe María n’azulexu.

Síguese pela carretera local unos 600 metros hasta llegar al esvíu a Villascusa, a la esquierda, que se garra, y llégase al poco a la ilesia y cementeriu de San Pedro de Pernús. Éntrase entós nel llugar travesando ún de los sos barrios y síguese pela carretera local CL1, dexando a mano derecha l’esvíu a la fonte d’El Llovéu.

Depués d’unos pocos metros de xubida pela carretera, llégase a un nucleu pequeñu, La Vega, onde destaca una casona vieya con planta en forma de L asitiada nel mediu del llugar. Síguese en xubida pela carretera local CL-1, hasta llegar a una pista de tierra que parte de la vera esquierda d’esta vía. Gárrase y per ella llégase al pueblu de La Llera. Pásase per delantre de la ilesia, de 1792, qu’al llau d’ella llevántense dellos horros y paneres de muncha antigüedá y bayura de decoración tallada. Tamién se pasa énte les murueques d’una construcción.

A la salida del pueblu, nun cruz de caminos, síguese pel de la esquierda, dexando a la derecha l’esvíu a Los Valles.

Síguese en xubida, pudiendo contemplase a la esquierda, abaxo, el pueblu de La Llera, na parte d’él que yá correspuende al conceyu de Villaviciosa.

Síguese pela carretera local, dexando a la derecha l’esvíu a Muñones, llugar domináu por una gran casona con capiya y horru, nuna propiedá asitiada enriba d’una turria del terrén que debaxo d’ella pasa’l Camín de Santiago; equí empieza una baxada y acolúmbrase dende esti puntu, pela primer vez, la Ría de Villaviciosa.

El camín sigue hasta’l pueblu de Quintana, presidíu pola so ilesia prerrománica de San Salvador de Priesca, construyida nel sieglu IX, qu’atesora dientro pintures interesantes d’esta dómina, y que dende’l 2015 forma parte de la Llista del Patrimoniu Mundial de la UNESCO como bien patrimonial destacáu vinculáu a la ruta xacobea costera. Xunto a la ilesia atópase lo que yera la casa rectoral.

Compartir

Share on facebook
Share on twitter
Share on linkedin
Share on pinterest
Share on email
Scroll to Top