Camín de la Costa

Etapa 4: Priesca - Casquita

Ye ésta una etapa curtia, de malapenes 12,89 quilómetros, que va toa ella pel conceyu de Villaviciosa, pasando per valles enllenos de pueblinos, como Priesca, Sebrayu, Tornón, El Fresnu, Cardu o Casquita, amás de la propia capital, una de les villes asturianes más riques tocante al patrimoniu arquitectónicu que guarda nel so cascu vieyu. Otres xoyes a la oriella del percorríu del Camín de Santiago nesta etapa, amás de la ilesia prerrománica de Priesca asitiada al empiezu mesmu del percorríu, son ilesies romániques como les de la propia capital maliaya o la de San Xuan d’Amandi, aparte d’una arquitectura popular abondosa, reflexada en forma de decenes de horros y paneres que tovía caltienen la función d’almacén de productos agrícoles y que tienen dacuando una decoración tallada bien rica. Pontes de fechura tradicional, capiyines d’ánimes y dalguna gran casona completen el catálogu d’elementos patrimoniales que se disponen alredor de la sienda xacobea nel so discurrir per esti conceyu de Villaviciosa.

La ruta apártase pasu ente pasu de la costa, cediendo la mar el protagonismu a La Ría de Villaviciosa, un ecosistema natural de munchu interés, que conecta la capital del conceyu col Cantábricu y que configura nel so percorríu un paisaxe mui peculiar de marismes y praderíes ganaes al agua. Nel so percorríu per Villaviciosa, el Camín de Santiago va cruciar munches pumaraes y va pasar bien cerquillina d’una de les empreses corchadores de sidra más emblemátiques, la famosa “El Gaitero”.

Esta etapa acaba nel llugarín de Casquita, onde hai un biforcu del Camín costeru asturianu, pudiendo siguise pa Xixón, pelos valles de Pión y El Curviellu, o pa la capital asturiana, al traviés de los conceyos de Sariegu y Siero, pa enllazar n’Uviéu col camín Primitivu.

No más d’él, el Camín ta asfaltáu o formigoniáu, con un porcentaxe significativu del percorríu en que se caltién el firme de tierra o piedra.

Dende la so fundación en 1270, la puebla de Villaviciosa (de primeres llamada Maliayo), convirtióse nun referente pa los pelegrinos que facíen el Camín de Santiago costeru. Dende’l sieglu XV cuntó con un hospital de pelegrinos, llamáu Sancti Spiritus, d’entidá y dotación notables, vinculáu de mano al monesteriu de Valdediós y que progresivamente pasó a tar xestionáu pola propia villa. Esti albergue persistió hasta primeros del sieglu XIX. Existen, amás, otres referencies documentales qu’atestigüen el pasu de pelegrinos per Villaviciosa, casu d’informaciones relatives a la muerte de pelegrinos en llugares como Amandi o al agospedamientu de los romeros nel monesteriu de Santa María de Valdediós, güei lloñe de la ruta oficial pero centru importante d’acoyida de pelegrinos dende la so fundación en 1220, nun sitiu onde yá existía dende’l sieglu IX la ilesia prerrománica de San Salvador, últimu gran exemplu de l’arquitectura prerrománica del reinu d’Asturies.

Descripción de la etapa

La etapa empieza a la vera de la ilesia de San Salvador de Priesca, nel llugar de La Quintana. Esta ilesia prerrománica forma parte dende’l 2015 de la Llista de Patrimoniu Mundial. La ruta arrodia l’edificiu pel ábside, en coincidencia cola carretera local VV-15, que se dexa desque se completa’l percorríu alredor de la ilesia pa garrar una sienduca de tierra y piedra que sal a la derecha. Empieza entós una baxada per un camín arrodiáu d’árboles, que dacuando igüen galeríes auténtiques enriba de la vía. Hai munchos ocalitos y exemplares de vexetación autóctono como castañales.

Al poco d’empezar la baxada, apaez a mano derecha una capiya d’ánimes, reflexu de la relixosidá popular y de l’antigüedá del camín pel que se circula, conocíu localmente como El Caminón nesti puntu.

Sigue tres de la capiya d’ánimes la baxada, per una sienda de tierra (con empedraos puntuales na parte del mediu) encaxonada ente turries del dalguna altura y arrodiada d’ocalitos. Déxense a mano derecha dos esvíos siguíos y la sienda continúa per una contornada onde los ocalitos van dexando pasu un trechu a les castañales nuna zona onde la ruta llania. Poco depués vuelve aumentar la cuesta de baxada y vuelven apaecer los ocalitos, dexando de nueves a mano derecha otru esvíu; apaez llueu, a la derecha, nun recuestu, un bebederu, fonte y llavaderu, nel paraxe conocíu como La Fuente Santágueda.

Poco depués desembócase nuna carretera local y síguese pel so arcén el percorríu del Camín, yá cerca del pueblu de La Vega, que se traviesa siguiendo l’itinerariu de la carretera. A entrambos llaos hai delles cases tradicionales, con horros y espacios de güerta. Tamién se caltién, a mano esquierda del Camín, un potru vieyu de ferrar caballos. Llégase al final del pueblu a la gran casona blasonada de L’Agüera, con capiya apegada y con una propiedá arrodiada por una muria alta de piedra con almenes.

Síguese pela carretera hasta dexar atrás esti palaciu, esviándose xusto depués per una sienda de grava y tierra que s’abre a la esquierda. Empieza equí un percorríu pel camín real vieyu, que circula en paralelo a El Ríu Priesca, que llega a formar saltinos d’agua naturales na zona intermedia, conformando un entornu natural de muncha guapura. A mano derecha, no alto, déxase’l nucleu de Los Casares, al que nun se llega a entrar; depués el Camín pasa a dir per una contornada natural dafechu, arrodiáu d’árboles. Tres d’unos 800 metros dende l’esvíu, llégase a una capiya d’ánimes, nuna curva onde la ruta, nun biforcu, sigue escontra la derecha. Esta zona conozse como El Pozu les Procesiones.

Tres de la capiya, sigue llaniándose xunto a una pradería con una pumarada, diendo en paralelo al ríu que vien acompañando la ruta xacobea dende l’esvíu depués del pueblu de La Vega. Al poco puen vese los grandes pilares que sofiten ún de los viaductos de l’Autovía del Cantábricu, que’l Camín pasa per debaxo. Llégase aína a una pontuca de piedra, d’un arcu namás, que salva El Ríu Ñabla o Carrión, tamién conocíu como Sebrayu, nuna rodiada de praderíes mui guapa. Desque se pasa la ponte, nel biforcu de caminos que s’abre depués, síguese derecho, escontra’l pueblu de Sebrayu, dexando a la esquierda l’esvíu a la ilesia de Santa María de Sebrayu, del sieglu XIII, a la que se pue llegar siguiendo una sienda que s’esvia unos 450 metros del Camín de Santiago.

Tirando depués de la ponte camín de Sebrayu, una sienda ancha lleva tres de malapenes 150 metros de distancia a les primeres cases d’esti pueblu, que van dir espardiéndose a entrambos llaos de la ruta.

Hai munches viviendes tradicionales, d’una o dos plantes, dalgunes d’elles con horros y con zarramientos de tierres a base de piedra. Les escueles vieyes, una edificación de los años 1960 llevantaes según el prototipu daquella del Ministeriu d’Educación, de dos pisos, queden a mano derecha del Camín y acueyen dende va años ún de los primeros albergues de pelegrinos surdíos na costa asturiana a últimos del sieglu XX.

Desque se pasen les cases de Sebrayu, el camín sigue a la derecha, nun biforcu de caminos qu’atopamos no cabero del pueblu, que lleva, nuna baxada suave, a otru piñu d’edificaciones; en pasándoles, síguese tamién a derecha n’otru esvíu. Esti camín, asfaltáu, va ente pumaraes y praos, hasta llegar, mediu quilómetru más alantre, a un pasu debaxo d’un viaductu de l’Autovía del Cantábricu. Crúciase esi viaductu y llégase a un biforcu onde hai que garrar la vía que lleva, a la derecha, al pueblu de Tornón. Empieza entós una xubida per una vía asfaltada, paralela de ralo en ralo a les víes de l’autovía, que depués d’unos 350 metros lleva al llugarín d’El Fresnu, pasando xunto a una casona vieya mui remocicada, que caltién nel pisu d’embaxo una portalada de piedra con una inscripción na clave de la puerta, amás d’una ventana de saetera.

Sigue xubiéndose al pie d’otres cases y dalgún horru y llégase a una vuelta mui zarrada onde hai que siguir pela vía de la esquierda, que lleva a una zona onde tán les murueques d’una vivienda, llamada casa Marica’l Caseru, y dende la que ye posible acolumbrar una panorámica bárbara de La Ría de Villaviciosa y de la so desembocadura na mar, ente Tazones y Rodiles. Síguese pela carretera y poco depués gárrase un esvíu a la derecha, per una sienda de piedra y tierra qu’empieza una baxada empinada ente castañales, carrascos y otres especies autóctones, con bones vistes a la ría y al molín de La Enciena.

Esta sienda de baxada, dacuando con muries de piedra en seco a los llaos, sigue dalgo menos d’un quilómetru, ente arboleda a veces mui mesto y dexa estremar, a mano derecha, les carriles de l’autovía, que’l so itinerariu discurre más o menos paralelu al de la sienda. Depués d’esi quilómetru, desemboca nuna carretera, que se crucia, y síguese per un camín de tierra y piedra que baxa hasta una rotonda que se bordia per un camín paralelu d’asfaltu, pa siguir per una vía al par de l’autovía. Esta rotonda ta nun puntu conocíu tradicionalmente como La Fuente los Pelegrinos, y per ellí cerca va un reguerín del mesmu nome.

Circúlase per un camín asfaltáu, cuesta arriba. Déxase a mano esquierda un esvíu a La Barzaniella y llégase a un pasu superior perriba de l’autovía. A mano esquierda ta la llamada Casona de La Torre, gran construcción con escudu xunto a la que se localiza un horru col lliñu decoráu con motivos xeométricos tallaos na madera.

Nesti puntu, pásase l’autovía pel pasu cimeru, pudiendo contemplase de frente les instalaciones de la fábrica de sidra El Gaitero, amás de pumaraes mui grandes.

Síguese pela carretera asfaltada, llegando a la vera d’una gran nave precedida de dos silos cilíndricos de gran altura. Nesti puntu, síguese pela vía asfaltada de la esquierda, nuna xubida que lleva, tres d’un esvíu a la esquierda nel primer sitiu onde ye posible, a la ilesia de Santa Olaya de Carda, al llau d’otru pasu perriba de l’autovía.

Crúciase l’autovía y xusto depués gárrase un camín a la derecha, qu’acaba xuntándose a una vía de tierra y piedra paralela a l’autovía, a una zona conocida como La Llosa. Pue vese llueu cómo l’autovía, per un túnel, pasa per debaxo de tierra (pa resalvar más alantre’l pasu per La Ría de Villaviciosa), mentes que’l Camín de Santiago llega, depués d’un xubiduca, a una carretera que se crucia y que lleva yá a Villaviciosa, villa declarada Conxuntu Históricu en 1992.

L’accesu a la villa faise per una zona de viviendes tradicionales de poca altura, munches d’elles con corredor nel pisu d’enriba y con dellos horros. Síguese pela cai de Les Caleyes hasta llegar mediu quilómetru depués a los barrios modernos de les afueres de la capital; continúase pela cai Jesús de la Piedra, hasta desembocar no que yera la carretera xeneral, güei llamada cai Cervantes y nel parque de Les Vallines, ún de los parques urbanos d’Asturies más interesantes, incluyíu nel Inventariu del Patrimoniu Cultural d’Asturies y vecín de la Casa Conceyu de Villaviciosa y la so plaza.

Dexando atrás l’edificiu de les cases consistoriales, síguese de frente pela cai peatonal Valle-Ballina y Fernández y dende equí a la cai histórica del Sol, una de les trés cais que conformen el cascu históricu de la villa, amuralláu na Edá Media, y con un refileru a los llaos de casones con escudu y grandes palacios urbanos que faen del centru de Villaviciosa un paraísu pa los amantes del patrimoniu cultural.

Ye una contornada urbana d’un interés patrimonial escepcional onde se pue ver bayura de balcones, galeríes y corredores. Pásase al llau de places como la de Balbín y la de Carlos I, presidida pol monumentu a esti monarca, rei que fixo’l so primer desembarcu en tierres españoles nel puertu de Tazones, ellí cerca, y que pasó en Villaviciosa delles nueches, agospedáu na Casa de los Hevia, qu’entá caltién la estancia onde tuvo’l soberanu, a mui pocos metros del Camín de Santiago.

Siguiendo pela cai del Sol llégase a la plaza d’Obdulio Fernández, col teatru Riera a la esquierda y a la derecha, les escueles graduaes (nel solar onde antaño se llevantaba l’hospital de pelegrinos de Sancti Spiritus), too ello dominao pol edificiu románicu de la ilesia de Santa María de la Oliva; nel mediu de la plaza hai un conxuntu escultóricu llamáu La Mazanera, obra de Mariano Benlliure.

Nesti puntu’l Camín xira pa la esquierda, trescurriendo al pie de la fachada principal del templu (en pasándola alcuéntrase, a mano esquierda del Camín, la pequeña Casa de la Oliva de la fundación Cardín), siguiendo pela cai Cabanilles. Síguese de frente per esta vía, dexando a mano esquierda una gran casa d’estilu montañés allugada nuna parcela zarrada con muriu de piedra y rexería y col accesu al traviés d’una gran portalada que ta nel chaflán d’accesu al conxuntu.

Nesti mesmu puntu déxase a la derecha l’esvíu a Valdediós y síguese derecho hasta la empresa sidrera El Escanciador, qu’ocupa lo que yera’l palaciu de la Torre de la Pedrera, cola so capiya de la Concepción a la esquierda (esviada del itinerariu del Camín unos pocos metros).

La ruta sigue a la derecha, pela cera de la carretera As-255, ente naves industriales y viviendes cada vez más rales. Llégase al grupu de viviendes promovíes pol patronatu Francisco Franco en 1955, esviándose’l Camín escontra elles y siguiendo depués per una sienda paralela a El Ríu Güetes, nel parque de L’Alameda.

La ruta pasa nesti puntu a ser un camín de tierra y piedra, con fileres d’árboles a los llaos, a la vera del ríu. Al final una rampla empobina a una pontina que traviesa’l ríu y que nun se garra, sinón que se sigue derecho, enllazando cola carretera y siguiendo pela so cera. Déxase a la esquierda nesti puntu la fonte de Los Caños, yá na parroquia d’Amandi, nel nucleu d’El Palaciu. Síguese pela cera de la carretera autonómica, ente cases baxes, llevantaes a primeros del sieglu XX, y que llueu dexen ver a la esquierda, nun altu, l’edificiu de la ilesia románica de San Xuan d’Amandi.

La entrada a esti templu pue facese, desque se pasa l’edificiu d’unes escueles vieyes construyíes en 1923 (donaes polos condes de la Mesada, según consta nuna placa puesta na fachada del edificiu), xubiendo un camín que s’esvia a la esquierda de la ruta xacobea y que depués de malapenes 100 metros lleva al monumentu. Poco depués del esvíu a Amandi, el Camín llega a un cruz de carreteres, dexando a mano derecha una vivienda blanca de dos pisos con galeríes mui desarrollaes a cada llau de la construcción. Nesi cruz de víes, el Camín de Santiago sigue pela que ta más a la derecha, una carretera local que sal d’una construcción de dos plantes destinada a un negociu hosteleru con pórticu na baxa sofitáu en trés columnes d’estilu dóricu y planta cimera con una galería nel centru.

El camín sigue pela carretera local, baxando escontra la capiya y ponte de San Xuan, a lo cabero d’una ruta con cases de dos altures a los llaos con dalgún horru mui alteriáu ente elles. La capiya tien planta rectangular y ta precedida por un cabildru encontáu en dos columnes sobre plintu de piedra de cantería, arrodiáu con una cerca de madera. La entrada al edificiu faise, pasáu’l cabildru, per un gran vanu d’arcu de mediu puntu con marcos de cantería. Una espadaña con una campanina y una cruz de piedra nel picu remata la construcción, que na parte trasera tien apegada una fonte. L’espaciu n’abertal onde ta la capiya ta domináu pol edificiu de La Casona, construcción de dos altures, del sieglu XVIII, tresformada nel sieglu XX y que tien una galería nún de los llaos.

El camín sigue per delantre d’esta casona, per un camín formigoniáu qu’empobina a una ponte de fábrica de piedra d’un vanu namás y que tien una vivienda apegada a ún de los llaos.

Desque se pasa la ponte sobre El Ríu Viacava, el Camín sigue pela carretera local, llegando depués d’una costapina curtia al pueblu de La Parra, con dalguna gran casona con palmeres a los llaos y que lleva a la carretera autonómica AS267.

Nesti puntu tuércese a la esquierda y síguese pel arcén de la vía poco más de 160 metros, hasta que depués d’una filera de viviendes a mano derecha, gárrase l’esvíu a la carretera local VV-10, tamién a la derecha. Poco depués de garrar esta vía, déxase a la derecha una fonte y síguese pel arcén de la carretera, ente praos y dalguna construcción (una d’elles a la derecha, de grandes dimensiones, con una palmera y trés altures, la cimera configurada a manera de galería continúa); tres d’unos 800 metros lleva al pueblu de Casquita. Al pie de la so capiya acaba esta etapa.

Compartir

Share on facebook
Share on twitter
Share on linkedin
Share on pinterest
Share on email
Scroll to Top