Camín de la Costa

Etapa 7: Casquita - Xixón

Etapa llarga de 26,7 quilómetros que conecta Casquita con Xixón, al traviés de los conceyos de Villaviciosa y Xixón. Nel so percorríu, el Camín de Santiago traviesa dos cordales importantes, el de Pion y el d’El Curviellu, lo que determina que seya ésta una etapa de desniveles fuertes na so primer metá, sobre manera entre Ñévares y l’altu de Pion, cuando en malapenes dos quilómetros salva un ascensu de más de 300 metros. En pasando l’altu d’El Curviellu, abondo menos prominente, empieza una segunda parte de la etapa muncho más suave, en baxada llixera camín de la ciudá de Xixón y la mar.

Circúlase mayormente per firme d’asfaltu: son malapenes 6 los quilómetros que tienen suelu de tierra o grava. L’entornu pel que se transita nesta etapa ye rural dafechu, dende’l principiu nel pueblín de Casquita, pasando per pueblos pequeños como El Mayorazu, Ñévares, Pion, El Curviellu o La Olla, amás de peles parroquies xixoneses de Deva, Cabueñes y Somió, yá cerca de la gran ciudá costera, que se percuerre’l so cascu urbanu d’Este a Oeste al traviés de l’avenida de la Costa (que coincide l’itinerariu col del antiguu Camín Real de Vizcaya a Galicia), pa terminar la etapa na céntrica plaza d’Europa, puntu tradicional d’accesu a la ciudá histórica de Xixón, onde tuvo munchu tiempu la llamada Puerta la Villa.

El patrimoniu cultural de calter etnolóxicu ye abondo ricu nesta etapa. El Camín pasa per pueblos onde se caltienen bonos exemplos de caseríes o quintanes tradicionales, amás de munchos horros y paneres y dalgún molín. Tamién l’arquitectura nobiliaria, con exemplos destacaos como’l palaciu de Ñévares, tien representación nesti percorríu. De la que la ruta va averándose a Xixón, van ser más les tipoloxíes patrimoniales que vaigan apaeciendo, ente les que destaquen les casones de tipoloxía indiana, edificios d’espectáculos como la plaza de toros d’El Bibio o exemplos destacaos de l’arquitectura del sieglu XX, ente los que sobresal el complexu de l’antigua Universidá Llaboral de Xixón, güei Llaboral Ciudá de la Cultura, asitiada a pocos metros del Camín de Santiago. Nel so percorríu xixonés, la ruta va pasar al pie de dellos centros museísticos d’interés notable, casu de la Fundación Muséu Evaristo Valle en Somió, el Muséu del Pueblu d’Asturies y el Muséu Nicanor Piñole, allugáu nel puntu final del percorríu.

A lo llargo de la historia xacobea, sobre manera na Edá Media, esti percorríu xugó un papel secundariu en comparanza col enllaz que dende Casquita comunicaba’l camín costeru con Uviéu, una y bones la capital asturiana yera per se un centru perimportante d’atracción de pelegrinos, dada la riqueza de les reliquies qu’atesoraba la so Cámara Santa. Sicasí, existen referencies documentales qu’acreíten el pasu de pelegrinos per esti camín, sobre manera nos sieglos modernos. Xixón cuntó, amás, con un hospital de pelegrinos, denomináu dende’l sieglu XVIII Hospital de los Remedios, del qu’entá se caltién la so capiya, en plenu barriu altu de Cimavilla.

Descripción de la etapa

La etapa empieza al pie de la capiya de San Blas de Casquita, nel puntu onde’l Camín se biforca pa siguir escontra Uviéu (a la esquierda) o escontra Xixón (de frente). Síguese nesti casu de frente, pela carretera local VV-10, pela que continúa’l percorríu daqué menos de 400 metros, ente cases cada vez más soles y praos, en descensu llixeru. Pásase delantre de dalguna construcción de della antigüedá, desenvuelta ente murios de piedra y con galeríes o corredores nel pisu d’enriba.

Tres d’esa distancia, déxase la carretera local y gárrase un esvíu a la esquierda, per un camín de tierra que bordia les ruines d’una antigua manteguera.

Pasada la fábrica, crúciase una ponte sobre El Ríu Grases (tamién llamáu Valdediós) y síguese per un entornu natural dafechu, xunto al ríu y ganando altura pasu ente pasu pela lladera del monte d’El Castiellu, lo que dexa contemplar, a mano derecha, perspectives amplies de los valles de Grases y Les Vallines y de los pueblos que se van asitiando nesta zona (como Maoxu, Grases y Grases de Riba). Realízase un percorríu paralelu en parte al de la carretera local, que queda a mano derecha.

La primer construcción que s’atopa a la vera del Camín va ser, tres más de 1.200 metros de percorríu (nos que se sigue recto, ensin garrar un esvíu qu’apaez a mano derecha), un molín, una construcción de dos plantes que caltién la boca del infiernu y la canal.

Poco más p’alantre, tamién a mano derecha, apaez una casa sola con un horru na parcela posterior, pudiendo contemplase más na distancia una quintana grande a lo cimero d’un recuestu, con dos palmeres y una capiya pequeña nel estremu del conxuntu.

Menos de mediu quilómetru depués del primer molín, llégase a un conxuntu de construcciones nel llugar d’El Mayorazu y el Camín sigue per una pasera que crucia la riega de La Cumbre, énte l’edificiu del molín.

Continúase de frente tres d’esi cruz, dexando un esvíu a mano derecha; la vía va en paralelo al ríu que vien de Valdediós, que más p’alantre vuelve cruciase per un pasu de formigón, y va xubiéndose poco a poco, ente perspectives amplies de praos y montes a lo fondero. Llégase cerca d’una gran nave agrícola y acaba llegándose a una pista de formigón paralela al percorríu de l’Autovía del Cantábricu, dexando a mano esquierda, nel llugar llamáu Siana, un complexu agropecuariu integráu por una casa, delles naves agrícoles y una panera.

Síguese per esa pista de formigón poco más de mediu quilómetru, pa enllazar depués con una carretera local, que se sigue virando a la derecha y pasando debaxo de dos viaductos de l’Autovía del Cantábricu. Empieza entós un ascensu pel arcén de la carretera, dexando nuna primer curva, a la esquierda, una casa y delles naves de ganáu, na zona conocida como Casares. Sigue la xubida, ente praos y dalgún árbol bordiando’l Camín. Tres d’otra curva a la esquierda, síguese hasta llegar al piñu de cases de L’Arbeyía, con parceles arrodiaes por murios de piedra y por sebes, hasta desembocar na carretera local, pela que se sigue contra la derecha, en dirección a Villaviciosa, n’ascensión hasta llegar a un pasu eleváu sobre l’autovía.

Crúciase l’autovía, dexando a mano esquierda un esvíu a La Llana; la xubida sigue pel arcén de la carretera, dexando una vivienda (conocida como Casa’l Roxu) a mano esquierda más p’alantre, hasta desembocar nun encruz cola carretera local VV-9, que se toma, torciendo a la esquierda en dirección a El Pedrosu y Pion.

Sigue’l Camín de Santiago pel arcén de la carretera, en cuesta mui empruna. A mano derecha pue contemplase’l conxuntu del palaciu de Ñévares, mentes qu’a la esquierda la carretera arrodia una construcción vieya medio esbarrumbada y una casa con corredor.

Nuna curva la ruta ésviase pa la esquierda, per una carretera que xube una cuesta y que se dexa pocos metros más arriba, nel primer encruz a la derecha, hasta enllazar con una pista formigoniada que traviesa’l pueblu de Ñévares, formáu por un petuñu de viviendes unifamiliares, esplotaciones ganaderes, güertos y dalgún horru; la ilesia de Santa Olaya ta na parte fondera del llugar.

A la salida del pueblu, en dexando atrás les últimes cases de Ñévares, síguese per una pista formigoniada y empieza una ascensión llarga pel monte La Parexana, ente ocalitos y praos. Depués d’una curva a la esquierda, llégase a una casa sola, con horru, na zona denominada La Piñera, momentu nel que la pista pasa a ser de tierra, con dalgún tramu puntual d’afloramientos de la peña del terrén, ente carba y árboles.

Xúbese asina, pel cordal de Pion, hasta que depués de mediu quilómetru aproximao llégase a una filera d’edificios, llugar nel que’l Camín vuelve convertise nuna pista formigoniada. Dexando atrás eses construcciones, sigue l’ascensión ente ocalitos que dexen acolumbrar de ralo en ralo perspectives amplies del valle de Ñévares.

Desembócase a la fin na carretera VV-8 y déxase a mano esquierda nesi puntu un esvíu a la esquierda per una pista de tierra. Síguese pela carretera hasta llegar al altu del cordal de Pion, el llamáu Altu la Cruz, y continúase, yá baxando, pel arcén cuasi dos quilómetros y mediu, con bones vistes al valle de Pion y a los montes que lu arrodien.

La baxada faise pela carretera, ente praos y con vistes puntuales a la esquierda a l’Autovía del Cantábricu. En dexando a mano derecha la primer casa sola qu’apaez nesti percorríu, gárrase un esvíu a la esquierda, per una pista de tierra que baxa empinada ente árboles y turries de tierra a entrambos llaos de la ruta nos primeros metros, y que va dar tres daqué más de 300 metros nun camín formigoniáu, pel que se sigue baxando, ente cases y dalgún horru y panera, hasta xuntase con otru camín, pel que se tira a la derecha.

Va agora la ruta ente murios de piedra (en dalgún tramu de formigón), cases soles, güertes y dalguna pumarada; pue vese llueu, a la esquierda, l’edificiu de la ilesia parroquial. Síguese recto, dexando a entrambos llaos entronques con otros caminos y accesos a finques particulares, hasta llegar a la carretera local VV-8, que se sigue escontra la esquierda, en baxada. Nel siguiente encruz ye posible garrar un esvíu a la esquierda que, depués d’unos 170 metros, lleva a la ilesia parroquial y al cementeriu de Pion, precedíu pol edificiu de les escueles.

Siguiendo pel arcén de la carretera local, y en cruciando un regueru, déxase a mano derecha un gran edificiu allargáu perteneciente a un establecimientu hosteleru y acaba enllazándose cola carretera autonómica AS-331 en dirección a L’Infanzón y Xixón, nel barriu de Bárcena, en Pion, onde hai munches cases a entrambos llaos de la carretera. Destaca pola so antigüedá y interés patrimonial dalguna d’eses construcciones, ente murios de piedra y corredor na planta d’enriba, amás de dalgún horru qu’hai a la vera del Camín.

Tres d’un percorríu d’unos 360 metros per esti barriu de Pion, y en dexando atrás l’encruz a Candanal y La Pola Siero, déxase la carretera pa siguir per una pista de tierra que se garra a mano derecha de la carretera xusto depués d’una casa moderna de dos plantes que tien apegada, al pie de la pista, una construcción d’un nivel únicu, construyida con mampostería de piedra (antes d’una curva que fai la carretera local a la derecha, dexando a mano esquierda un horru, nun prau).

Síguese per esa pista, en sentíu perpendicular a la carretera, travesando un regatu y llegando a un encruz onde se tira pa la esquierda per una pista de formigón. Poco depués, n’otru encruz onde se llevanten delles cases y un horru a mano esquierda, y que en frente ta arrodiáu por un muriu de piedra, síguese pa la derecha, bordiando la parcela de la Escuela d’Agricultura de Pion, yá nel barriu d’El Requexu.

Xúbese per una pista asfaltada, dexando un poco más arriba a mano esquierda un edificiu pequeñu correspondiente a un depósitu d’agua y la vía d’entrada a una casa y un camín de tierra paralelu a ella. Sigue l’ascensión pela finca y dexa n’otra curva otru accesu a una vivienda a mano esquierda; la vía va ente murios de piedra, ocalitos y dalguna pumarada. Una panera solitaria, nun prau, enriba d’un muriu altu de contención, domina’l paisaxe nesta zona, con panorámiques amplies sobre’l valle de Pion. Síguese derecho, dexando a mano esquierda una casa sola y, poco depués, un camín que baxa pal valle.

Sigue la xubida, con murios de bloques de piedra a la derecha, hasta llegar a un piñín d’edificaciones, a mano derecha del Camín; en dexándoles atrás, nun cruz de víes, tírase pela de la derecha, n’ascensión, y poco depués pásase per delantre d’una casa y, en dando una curva zarrada a la derecha (pela que sigue l’accesu a una vivienda), el camín asfaltáu conviértese nuna sienda de tierra y piedra.

Xúbese per esta pista, ente ocalitos y bardiales, dexando a entrambos llaos dalgún accesu a parceles. Nun primer cruz vírase pa la derecha, xubiendo per un camín estrechu de piedra y tierra, ente ocalitos, que depués acaba enllazando con una carretera local que depués va dar a l’autonómica AS-331, nel llugar d’El Curviellu, colo qu’acaba equí l’ascensión al cordal del mesmu nome y empieza, pel arcén d’esta vía, la baxada camín del conceyu de Xixón. Llueu va poder contemplase una vista primera de Xixón y de la mariña.

Sigue la ruta pela carretera AS-331 unos 800 metros. Dalguna casa sola, delles con horros (polo xeneral mui tresformaos), van apaeciendo al pasu, hasta llegar a un gran edificiu con capiya correspondiente a un establecimientu de restauración, que queda a mano esquierda del Camín, a más altura. La carretera bordia esti establecimientu y, namás pasar una curva que se traza a los pies del mesmu, déxase y síguese contra la derecha per una pista de tierra y piedra que baxa, yá nel conceyu de Xixón, na parroquia de Deva.

Aína apaecen les primeres viviendes unifamiliares y dalgún horru. Al llegar al primer encruz ente’l Camín y la carretera de Castañera, la ruta pasa a tar asfaltada y síguese pela vía de la esquierda, llamada carretera de Samiguel. Síguese ente viviendes unifamiliares d’últimos del sieglu XX les más d’elles, ente les que se caltién dalgún horru, hasta llegar a un esvíu a la esquierda, que se garra. Ye’l llamáu Camín del Charcu, pel que se va siguir d’equí p’arriba y que traviesa cuasi tola parroquia de Deva, hasta llegar a la vecina de Cabueñes. Nun primer momentu, El Camín del Charcu baxa en cuesta empinada, ente praos y con El Ríu Llorea a mano esquierda siguiendo en paralelo a la vía, tovía formigoniada. En travesando un pasu sobre unos túneles de l’autovía A-8, xúbese, siguiendo recto ensin garrar dos esvíos a derecha y esquierda qu’apaecen poco depués de cruciar la vía. En pasando’l segundu esvíu, el camín vuelve ser una pista de tierra y grava. Déxense atrás unes viviendes unifamiliares de construcción recién y el Camín sigue ente praos, bordiáu por sebes y dalgún árbol.

Llégase a un encruz con El Camín del Colate, na zona conocida como El Mirador, y síguese pel d’El Charcu, con una filera de cases nel espaciu que dixebra dambes víes. Pocos metros más p’alantre, El Camín del Charcu va dar a la carretera AS-331 y síguese escontra la esquierda, pel arcén. Depués d’unos pocos metros y delantre d’un edificiu modernu destináu a restaurante, gárrase’l primer esvíu a la derecha, xunto a unes viviendes unifamiliares de construcción recién, per un camín de tierra y piedra que baxa. Ye’l llamáu Camín Antiguu de Pion, qu’a los pocos metros del percorríu adiéntrase na parroquia de Cabueñes, pasando a siguir pente un ocalital per una pista forestal ensin garrar nenguna de les esviadures que van surdiendo. Depués de cuasi 1200 metros, acaba dándose, en curva, na carretera nacional N-632, dexando a mano esquierda’l camping municipal de Deva (que, a pesar del nome, alcuéntrase yá en Cabueñes).

Síguese pa la esquierda pel arcén de la carretera nacional y depués d’unos pocos metros, en pasando una tira de viviendes abandonaes, gárrase la vía de la derecha, el llamáu Camín del Estancu, pel que sigue’l percorríu, ente los zarros de viviendes unifamiliares aislaes, con vistes contra la esquierda del gran complexu monumental de la Universidá Llaboral de Xixón.

Déxase a mano derecha’l parque de La Mangada, con una zona infantil y de descansu, onde s’alcuentra una fonte. Un pocu más p’alantre, nun encruz con isleta vexetal central na qu’hai un árbol, síguese de frente siempre per El Camín del Estancu. Unos metros depués, va dexase a mano derecha un exemplar escepcionalmente bien calteníu de casa mariñana, que perteneció a Nicanor Piñole, afamáu pintor asturianu d’empiezos del sieglu XX; una estatua del pintor apaez énte a la casa mariñana, dientro de la so parcela.

Síguese’l el percorríu per Cabueñes pela cai del Cuadrante, dexando a mano derecha dos esvíos y teniendo siempre presente a la esquierda’l complexu de la Universidá Llaboral y l’Hospital Universitariu de Cabueñes. La ruta xacobea pasa ente xalés y dalgún edificiu más vieyu, amás de dellos horros y paneres, dalguna de gran tamañu y decoración rica, propia del estilu Carreño. Tamién se pasa xunto a una vivienda reconvertida pol so propietariu nun homenaxe a la mitoloxía asturiana, con distintes escenes y personaxes tallaos en piedra, alredor d’una fonte. Tres d’esta casa llégase a un encruz onde se sigue pa la esquierda, entá pela cai del Cuadrante, en dirección a la parroquia de Somió. Llueu pásase xunto a un edificiu blancu modernu, construyíu a base de módulos cuadraos, qu’agospeda al centru de la organización Aspace en Xixón. Tamién se pasa al pie d’urbanizaciones modernes, yá nel barriu de La Pontica, en Cabueñes. Tres d’esi edificiu, nuna curva, síguese pa la derecha, dexando la cai del Cuadrante, que sigue de frente pa la ilesia parroquial de Cabueñes, distante malapenes 150 metros del percorríu oficial del Camín de Santiago.

Tírase derecho pela llamada Caleya del Conde, ente zarros de parceles y entraes a urbanizaciones, y llégase a la plazoleta Rubiera, un encruz de caminos con una isleta vexetal nel mediu. Gárrase’l camín a la esquierda, El Camín de la Frontera, qu’acaba llevando a la parroquia de Somió, en pasando ente grandes villes y xalés unifamiliares, como Villa Concha, Los Cerezos, Los Mirabeles o La Quinta Pola.

El percorríu pela parroquia de Somió sigue per El Camín de Cabueñes, nuna zona de praos na parte d’El Piqueru, con bones vistes a la Universidá Llaboral, que da pasu más p’alantre a una zona de concentración d’urbanizaciones de va poco (como La Quintana, Los Agapantos o Las Campanas), ente la que tamién s’alcuentren dos merenderos del Xixón rural, La Fontaine y Casa Suncia.

En pasando esti últimu merenderu, llégase a La Carbayera Candenal, que se bordia, dexando a mano esquierda esti espaciu verde, amás d’un centru comercial pequeñu. Síguese pel Camín de les Azalees, ente viviendes unifamiliares y espacios verdes, per una carretera qu’en parte tien cera y que lleva hasta’l gran edificiu d’una residencia d’ancianos, yá n’El Camín de los Claveles. Síguese ente cases, dalgunes d’elles de gran porte y interés, siguiendo per El Camín de Foxanes, que lleva a la plaza de Villamanín, centru neurálxicu de la parroquia de Somió, que tien en mediu una estatua dedicada a Dionisio Cifuentes y que nún de llaos alcuéntrase’l Muséu Evaristo Valle.

Síguese de frente, pela cai del profesor Pérez Pimentel, dexando a mano derecha un espacín verde con una fonte, y llégase a un cruz de víes onde hai otra zona verde con un altar sacramental adosáu al muriu altu de piedra qu’arrodia esti espaciu. El Camín sigue pa la esquierda, cola ilesia de San Xulián de Somió a 150 metros a la derecha d’esti puntu.

Síguese pela cera de la cai Pérez Pimentel y aína apaez a la esquierda la imponente Villa María.

Síguese de frente ente grandes propiedaes de distintos estilos (modernistes, racionalistes y tamién estilu tradicional asturianu) hasta llegar a la placina de La Guía, dexando a mano derecha una capiyina de construcción recién y dellos xalés de primeros del sieglu XX de gran interés patrimonial.

Continúase de frente y crúciase la rotonda qu’hai enriba d’El Río Piles, na zona antaño conocida como El Puentín. Contra la derecha nesti puntu pue esviase pa visitar el Muséu del Pueblu d’Asturies.

Tras cruzar el río, a mano derecha aparece el estadio de fútbol de El Molinón. 

Se prosigue de frente por la avenida de La Costa, que permite atravesar el casco urbano de Gijón/Xixón desde el Este hasta el pleno centro, a lo largo de sus casi 2,5 kilómetros de recorrido, coincidentes con el trazado oficial del Camino de Santiago en esta localidad. 

El tránsito por la Avenida de la Costa permitirá pasar junto a modernos barrios de la ciudad, como el de Vieques, El Bibio, L’Arena o Los Campos, así como a monumentos y edificios de interés, caso del colegio de la Asunción con su iglesia neogótica, a mano izquierda, la plaza de toros de El Bibio, los chalets de Manuel del Busto, la moderna iglesia de los Capuchinos y el parque de Begoña. La presente etapa termina en la plaza de Europa, uno de los espacios centrales de Gijón/Xixón, al que se llega tras haber dejado a mano derecha el edificio del antiguo asilo Pola, hoy sede del Museo Nicanor Piñole. Al otro lado de los jardines se levanta el edificio del histórico Mercado del Sur, construido en 1899. 

Compartir

Share on facebook
Share on twitter
Share on linkedin
Share on pinterest
Share on email
Scroll to Top