Empieza la etapa na plaza xixonesa d’Europa, a la vera de los edificios de lo que yera’l palaciu de Xusticia de Xixón y la llamada Casa Rosada, integrantes entrambos, cola cercana Gota de Lleche, d’un complexu asistencial desenvueltu nesta zona de la ciudá dende primeros a mediaos del sieglu XX.

• Ver ficha: Casa Rosada   

Más alantre, desque se vira a la derecha pela llamada La Cerona (cai Palacio Valdés), testimoniu de la muralla vieya de primeros del sieglu XIX qu’arrodiaba’l centru de Xixón, el Camín va xunto al gran edificiu de la Gota de Lleche.

• Ver ficha: Gota de Lleche  

Sigue’l Camín pela Cerona (cai ancha heredera de la muralla construyida nes décades primeres del sieglu XIX pa facer frente a l’amenaza carlista) hasta llegar, a lo cabero d’esta cai, desque se dexa a mano esquierda la plaza de L’Humedal, a la ilesia de San Xosé, reconstruyida depués de la guerra civil y allugada xusto al pie del edificiu más altu de Xixón, la torre Bankunion, construyida en plenu desarrollismu xixonés de los años 1960.

• Ver ficha: Edificiu de viviendes   
• Ver ficha: Ilesia de San Xosé   

Pásase per delantre de la fachada del templu y túercese depués a la derecha, pela cai Pedro Duro, que lleva hasta la costa, desque se crucia pela cai Marqués de San Esteban y les sos arcaes. Esta cai diseñóse a mediaos del sieglu XIX, a imitación de los grandes bulevares parisinos, comunicando’l centru históricu de Xixón cola estación de ferrocarril del Norte, cabecera de la tercer llinia férrea inaugurada n’España. Nesta cai caltiénense munchos edificios de gran interés, bien d’ellos de primeros del sieglu XX, onde se representen los estilos arquitectónicos que se desenvolvieron nesi momentu: modernismu, eclecticismu, historicismos varios (como’l neorrenacentismu, neobarrocu), l’arquitectura decó y la racionalista.

Al llegar a la costa, a l’antaño zona portuaria de Fomento, vírase a la esquierda, pasando a discurrir pela cai Pedro Rodríguez Sampedro, al traviés del paséu marítimu de la playa d’El Natahoyo, arenal recuperáu nos años 1990, depués de formar parte esti espaciu a lo llargo de más d’un sieglu d’un ámbitu industrial, dedicáu sobre manera a la construcción naval (en decadencia evidente dende los años 1970; na actualidá namás hai un astilleru n’activo y caltiénense los restos de lo que yera Naval Xixón a continuación de la playa). Si se dexa’l Camín y se tuerce a la derecha, llégase al barriu históricu de Cimavilla, declaráu Conxuntu Históricu, orixe de la ciudá de Xixón y onde ye posible contemplar, ente otros munchos monumentos, la capiya de Los Remedios, testimoniu del hospital de pelegrinos qu’hubo na localidá.

La ruta xacobea sigue pel paséu marítimu d’El Natahoyo, pasando la playa y dexando a mano esquierda’l Muséu del Ferrocarril d’Asturies, allugáu na estación vieya del Norte de Xixón, yá na avenida de Xuan Carlos I.

• Ver ficha: Muséu del Ferrocarril   

Más alantre, a la derecha, desque se pasa un edificiu de servicios alministrativos y bloques de viviendes diseñaos con forma de barcu, puen observase les instalaciones, yá en desusu, de los astilleros Naval Xixón. Nesti puntu, ha arrodiase’l cruz de víes que se forma na plaza del Padre Máximo González, pa siguir pela avenida de Galicia, a la derecha, pasando al pie d’una capiya vieya, nes instalaciones de la fundación educativa Revillagigedo.

• Ver ficha: Capiya de Revillagigedo   

Síguese de frente per esta avenida, en plenu barriu xixonés d’El Natahoyo, dexando a mano derecha’l templu de San Esteban del Mar.

• Ver ficha: Ilesia de San Esteban del Mar   

Más alantre pásase al pie d’una zona d’edificios d’una planta, n’estáu d’abandonu. Trátase de lo que yeren ciudadeles o infraviviendes de trabayadores, mui actives nes primeres décades del sieglu XX. Depués, y desque se dexa a mano derecha’l parque de Pedro Sabando Suárez y vistes de les grandes torres de los astilleros tovía activos de la empresa Bazán-Xixón (antigua Juliana Constructora Gijonesa), déxase a la derecha’l templu de San Esteban del Mar.

Llégase a Cuatro Caminos, cruz de víes que proceden d’otros barrios de la ciudá y qu’a la derecha empobinen pal puertu d’El Musel. El Camín sigue de frente, pela avenida de l’Arxentina, nel barriu de La Calzada. Poco depués de garrar esta vía, déxase a mano esquierda l’edificiu del Atenéu de La Calzada, gran centru cultural del barriu, y el colexu Príncipe d’Asturies.

• Ver ficha: Atenéu de La Calzada   

Síguese per esta avenida hasta llegar al edificiu modernu de la ilesia de Fátima, precedíu d’un monumentu a un párrocu qu’hubo nella.

• Ver ficha: Ilesia de Fátima   

Tres de la ilesia, síguese de frente, dexando a mano esquierda una estación de serviciu y llegando aína a la nave de Cristasa, fábrica de fundición de vidru reconvertida na actualidá en centru municipal d’empreses. Poco depués pásase a la vera d’un parque y de la escuela Miguel de Cervantes.

• Ver ficha: Nave de Cristasa   

Crúciase perriba de les víes del tren (que van a un nivel inferior del Camín) y llégase al cruz cola avenida de Los Campones; síguese de frente, per una zona onde les edificaciones residenciales van dexando pasu a instalaciones industriales y de serviciu. Tírase derecho nel cruz de la vía que lleva a La Campa Torres, escontra la derecha, onde hai un castru de dómina astur, tresformáu en dómina romana y que se considera l’orixe del poblamientu de la ciudá actual de Xixón. Xusto namás pasar el cruz, hai una gasolinera a la derecha. Síguese pela cera de la carretera autonómica AS-19 hasta llegar a un pasu eleváu perriba de les víes del tren, sitiu onde desapaecen les ceres, así qu’hai que circular pel arcén de la carretera. Pásase esi cruz, na zona conocida como El Puente Secu, y llégase a una rotonda, con otra gasolinera a mano derecha. Bórdiase la rotonda pela cera y síguese recto, baxando pel arcén de la carretera y llegando, xunto a una filera de cases a la derecha, a un pasu fonderu de l’autovía que desemboca n’otra rotonda. Xusto en travesando’l pasu fonderu, primero d’entrar na rotonda, el Camín ésviase a la derecha, per una sienda estrecha de tierra que xube hasta llegar al Camín de la Estación, una carretera local ensin malapenes tráficu pela que se sigue pel arcén. Esta vía ta a una cota superior de la carretera autonómica, que sigue en paralelo y dexa ver una panorámica del ñudu d’infraestructures y de la capiya de San Martín de Veriña, allugada nun altu a la esquierda; destaca’l campanariu metálicu tan altu que se fixo va pocos años al pie del edificiu. Tamién son visibles yá parte de les instalaciones del complexu siderúrxicu d’Arcelor Mittal, antigua Ensidesa, fábrica llevantada a últimos de los años 60 nel valle de Veriña.

• Ver ficha: Capiya de San Martín de Veriña  

El Camín empobina, dexando a la esquierda un esvíu a la carretera y a la derecha, delles edificaciones, una panera y una central eléctrica, a la estación de ferrocarril de Veriña; sigue ente ésta y el piñu de cases que se llevanten en frente, ente les qu’hai dalguna panera y horru.

• Ver ficha: Veriña   

Báxase dende la estación a un encruz cola carretera autonómica AS-19, onde hai que siguir de frente, en dirección a Puao, desque se crucien les víes del tren (hai un control de barreres pa pasales). Síguese pel arcén d’esta carretera y pásase debaxo d’un gasoductu, amás de cruciar dos veces El Río Aboño. Llégase d’esta manera a un pasu eleváu perriba de les víes del tren. En cruciándoles, síguese a la derecha, camín del pueblu de Muniello, que se traviesa siguiendo la carretera.

• Ver ficha: Muniello   

Al final, una curva zarrada fai virar a la esquierda, xubiendo ente cases y dexando a mano esquierda un esvíu al pueblu, hasta llegar a un cruz de víes onde se garra’l camín de la derecha, el llamáu Camín Revesosu, que xube ente ocalitos y que dexa a mano esquierda la fonte de Cadueñu. Poco depués síguese pa la esquierda, pel camín de Quimarán a Villar, ente praos y per una zona onde la carretera va ente dos turries de tierra mui fondes que lleven a un altu, nel llugar de Zarracina, nel qu’hai unes poques cases y dalgún horru; dende ellí pue acolumbrase una panorámica amplia de la fábrica siderúrxica y de los barrios del sur de Xixón, contrastando esi paisaxe industrial y urbanu coles praderíes que s’esparden a los pies del Camín nesta zona yá rural.

• Ver ficha: Factoría d’Arcelor   

Síguese de frente, ente praos, dexando nuna curva una casa con dos horros y xubiendo pel camín de Quimarán a Villar y depués per El Camín Real, hasta un cruz de víes con delles viviendes alredor onde se tira pa la esquierda. Déxense a mano derecha, más alantre, dos esvíos de caminos y otru a mano esquierda. Hai nesta zona delles cases unifamiliares, dalgunas d’elles con horros, y siguen contra la esquierda les perspectives a la fábrica siderúrxica.

Llégase d’esta manera a otru cruz de caminos, con una isleta vexetal nel mediu; la ruta va pela vía de la derecha, qu’empieza una xubida pindia, ente cases y dalgún horru y panera, con sebes y murios de piedra curiando la ruta, qu’a poco y a poco va estrechando, de la que s’adientra nun monte d’ocalitos y otres especies, camín d’El Monte Areo, yá nel conceyu de Carreño. Poco más alantre, el camín da pasu a una pista de tierra y piedra, pela que se va siguir nos siguientes quilómetros.

El Monte Areo marca la divisoria ente los conceyos de Xixón y Carreño y ye una zona onde se localiza una concentración importante de túmulos de dómina neolítica que conformen una de les principales necrópolis d’esti períodu históricu calteníes n’Asturies, lo que determinó la so declaración como Bien de Interés Cultural. Dende la ruta xacobea salen dellos caminos que lleven a dalguna d’estes estructures tumulares.

• Ver ficha: Necrópolis tumular d’El Monte Areo   

Desque pasa a ser una pista, el Camín va ente ocalitos y llega más alantre a una zona llana onde, amás d’esta especie d’orixe australianu, destaquen los praos amplios. Déxense dellos esvíos a derecha y esquierda, y el Camín sigue en sen Oeste más de 1,5 quilómetros, too ello per un terrén más o menos llano con vistes ocasionales, a mano derecha, pa la costa de Carreño, amás de delles instalaciones industriales qu’hai n’Aboño y el propiu puertu d’El Musel.

Dalguna construcción aislada atópase a mano esquierda del Camín y hai un tramu nel que la ruta estrecha muncho hasta desembocar nuna curva nuna pista; síguese nuna xubida suave escontra la derecha, al pie d’una nave construyida con bloques de formigón. A lo llargo d’unos pocos metros el firme pasa a tar formigoniao y depués vuelve ser una pista de tierra y piedra qu’ente carba y ocalitos empieza a baxar escontra una pista de formigón a la que se xunta’l Camín, continuando a la derecha, ente ivernaderos, nuna zona conocida como Ramos.

Nuna curva, esta pista xúntase a una carretera local y sigue pa la derecha, xunto a les murueques d’una casa a mano derecha y una construcción a la esquierda. N’otru cruz vírase a la esquierda y empieza una baxada mui cuesta per un camín asfaltáu, ente ocalitos, con vistes a la derecha al valle de Quimarán. Esta vía lleva aína a la fonte llavaderu de Les Xanes, a mano derecha, que pa entrar nella hai que baxar unes escaleres. Dende esta zona acolúmbrase una panorámica del pueblu de Santolaya y de les sos caseríes.

• Ver ficha: Fonte llavaderu de Les Xanes   

Sigue la baxada y pásase énte una casería con horru a mano esquierda, nel barriu de Sopeña; el Camín entra nel pueblu de Santolaya, tira recto nun cruz con otra vía perpendicular y vira a la derecha tres d’una casa datada en 1911 de dos plantes con porche central y panera.

• Ver ficha: Santolaya   

Empieza entós una baxada curtia que lleva a la carretera autonómica. Crúciase esta vía y síguese de frente, en dirección a Priendes, pela carretera local CE-5. En cruciando, a mano derecha atópase la ilesia de Santolaya, arrodiada d’un espaciu verde zarráu por una paredina de piedra a la que s’apiega un altar sacramental y una fonte.

• Ver ficha: Ilesia de Santolaya del Valle   

Síguese pela carretera a Priendes, dexando llueu a mano esquierda’l llavaderu de La Ponte Piedra. Crúciase poco depués El Reguiru Reconco per una ponte d’un solu vanu, construyida en bloques de piedra, con praos grandes espardiéndose a derecha y esquierda, nun espaciu llanu que dexa contemplar delles cases aislaes, ente les que destaca, a mano derecha, la gran casa-palaciu de los Díaz Caneja, con orixe nel sieglu XVIII, que tien capiya y ta zarrada por una gran muria de piedra, y, dalgo más a la derecha, otra construcción antigua tamién cola so propia capiya.

Desque se crucia la ponte, síguese de frente, dexando a mano esquierda un esvíu, y llégase al barriu de La Maquila, con delles cases con dalgún horru y panera; dalguna casa ye vieya, de tipoloxía mariñana.

• Ver ficha: La Maquila   

Llégase a un encruz con una carretera y síguese pa la esquierda per Vega a lo llargo de menos de 800 metros, dexando a los dos llaos dellos esvíos. Ye una zona mui llana, ente praos y dalguna vivienda, ente les que destaca la casa vieya de La Torre. Nesti percorríu tamién s’atopa dalguna nave agrícola de grandes dimensiones.

• Ver ficha: La Torre   

Xúbese un poco camín de Los Celleros, otru barriu d’esta parroquia. Depués d’una casa de piedra, gárrase l’esvíu a la derecha y la ruta sigue per un camín asfaltáu con bones vistes, nun percorríu onde hai cada poco xubíes y baxaes suaves. Déxase a mano esquierda un esvíu y más alantre otros dos a la derecha. El paisaxe d’alredor, siempre domináu polos praos, va estrechando poco a poco. Depués del segundu esvíu a la derecha, que nun se garra y qu’enllaza con una carretera que lleva a Llorgozana, déxase a mano esquierda otru esvíu y xúbese un recuestín ente árboles y bardiales.

Síguese de frente, ensin garrar nengún de los esvíos que van apaeciendo, y empieza l’esvíu camín de la parroquia de Tamón, que yá s’acolumbra allalantrones la tuya de la so ilesia de San Xuan. Síguese hasta llegar a un pasu per debaxo del ferrocarril, configuráu como una estructura de piedra con un vanu central per onde se materializa’l tránsitu. A la salida, na zona conocida como Alredor de la Ilesia, apaez de frente, no alto, la ilesia, a la qu’empobina la ruta. Crúciase un reguerín y xúbese una cuesta que desemboca na carretera AS-326, en dexando a mano derecha un horru. El Camín sigue pa la derecha y pue llegase a la ilesia, a la esquierda, depués un percorríu curtiu de malapenes venti metros.

• Ver ficha: Tamón   
• Ver ficha: Ilesia de San Xuan de Tamón   

La ruta xacobea empieza agora un camín llargu a la escontra d’Avilés, coincidente en bona midida col itinerariu de la carretera autonómica AS-326, xunto a l’Autovía del Cantábricu y nuna rodiada cada vez más industrial.

Poco depués de llegar a la carretera AS-326 en Tamón, síguese pela cera qu’hai a la vera del arcén hasta llegar a un pasu fonderu de l’autovía, que se garra virando a mano esquierda. Llégase depués del pasu a una contornada más rural y síguese pela cera hasta atopar un primer esvíu a la derecha, que se garra.

Va agora’l Camín per una carretera estrecha asfaltada que, ente dalguna casa, praos y hasta un potru de ferrar construyíu en madera, lleva a un pasu per debaxo del ferrocarril. Crúciense los llugares de La Calle la Vega y La Velilla, y desembócase nuna carretera que lleva a les rotondes d’incorporación a l’autovía. Pásase esa carretera y síguese de frente, per una vía que xube camín d’una nave grande que tien al llau una panera de construcción recién. En llegando a la nave, tuércese a la derecha y el Camín pasa a la vera d’otra panera y un petuñín de cases. Tres d’una d’elles, la ruta vira de repente a la derecha, enllazando con una pista de tierra que lleva a una pasera peatonal que traviesa l’autovía A-66, hasta enllazar cola carretera autonómica AS-19, onde’l percorríu tira pa la esquierda. Síguese pel arcén d’esta vía, qu’empieza estrechu, pero que va enanchando.

Síguese pel arcén d’esta carretera cuasimente dos quilómetros, en paralelo a l’autovía, que queda a la esquierda, y a les instalaciones industriales de la planta siderúrxica d’Arcelor Avilés, que se van socediendo a la derecha. Esta carretera lleva al conceyu vecín de Corvera. Poco depués de cambiar de conceyu, apaecen a la esquierda dellos establecimientos hosteleros, nel llugar de Silvota. Pásase per un viaductu sobre les víes de l’autovía y llégase al llugar de Gudín, na parroquia de Tresona, coles instalaciones de Fertiberia a la esquierda.

• Ver ficha: Gudín  

En Gudín ye posible siguir el percorríu per una cera más de 600 metros. Na vera derecha del Camín van apaeciendo delles cases d’una y dos plantes, dalgunas d’elles con corredores de madera nel pisu d’enriba. Tamién se caltienen nesti llugar dellos horros y paneres.

El tramu de cera lleva a una rotonda, que se bordia, y la ruta sigue camín d’Avilés. Namás pasar esta rotonda, crúciase la carretera y síguese p’apartase a lo llargo d’unos pocos centenares de metros de la carretera AS-19. Asina, el camín va per una vía asfaltada perpendicular a la carretera autonómica, que depués de 60 metros tuerce a la derecha y pasa a dir pel barriu d’El Pedréu, ente cases de dos plantes (delles de dalguna antigüedá, construyíes ente murios de piedra, con corredor na planta d’enriba) y dellos horros y paneres, que dalgunos presenten decoración tallada nes colondres.

• Ver ficha: El Pedréu   

Esti percorríu per El Pedréu acaba volviendo xuntase, depués de dexar a mano derecha una gasolinera, cola carretera AS-19, nel llugar de San Pelayo, xunto a la ilesia parroquial de Tresona (el cementeriu ta al otru llau de l’autovía y éntrase a él per una pasera peatonal sobre ésta).

• Ver ficha: San Pelayo   
• Ver ficha: Ilesia de San Vicente de Tresona   

Delantre del templu hai un espacín verde, con árboles entrellaciaos, que conecta cola capiyina de San Pelayo.

• Ver ficha: Capiya de San Pelayo   

Síguese per una cera, traviésase un reguerín y llégase a un pasu per debaxo de l’autovía (con decoración a base de paneles pintaos alusivos a dellos bienes patrimoniales d’esta parroquia del conceyu de Corvera). Crúciase, dexando a la esquierda’l pasu fonderu, y síguese derecho per una cera arrodiada de construcciones y coles instalaciones d’Arcelor Avilés a la derecha.

Nesti percorríu va circulándose xunto a los bloques de viviendes de La Marzaniella y a dellos equipamientos como un consultoriu médicu allugáu nun edificiu d’estilu montañés.

• Ver ficha: La Marzaniella   

Depués d’estos edificios, síguese pela cera y llégase al conceyu d’Avilés. Pásase per debaxo de trés viaductos y llégase al pobláu de Garajes; llueu apaez, a la esquierda, l’esvíu a Llaranes.

• Ver ficha: Garajes   

Síguese de frente y llégase al que foi Hospitalín d’Ensidesa.

• Ver ficha: Hospitalín d’Ensidesa   

Pasáu l’Hospitalín, síguese de frente, per una cera paralela a les víes del tren (a mano derecha) y naves y viviendes a la esquierda, na zona llamada El Cruce. Llégase a un ñudu de comunicaciones, yá na entrada de la ciudá d’Avilés, col esvíu a la derecha pa la zona portuaria de la ría. La ruta sigue de frente, debaxo del viaductu qu’hai nesti ñudu (primero de llegar a él ye menester cambiar de cera, pasando de la derecha a la esquierda, pa poder siguir pela cera habilitada pa pasar esti ñudu de comunicaciones). Llégase a una esplanada onde hai una gasolinera y un aparcamientu grande de vehículos, y síguese, con vistes al centru cultural Óscar Niemeyer a la derecha, de frente, yá na ciudá d’Avilés, pela avenida del Marqués de Suances.

• Ver ficha: Centru Cultural Internacional Óscar Niemeyer   

Síguese per esta cai y llégase a la plaza de los Oficios, qu’en pasándola gárrase l’avenida de Cervantes, que lleva a lo que foi la fábrica de farina El Águila, güei albergue de pelegrinos municipal.

• Ver ficha: Fábrica vieya El Águila   

Nesti puntu, al pie d’un cruceru de piedra de construcción recién, vírase a la derecha y la ruta sigue pela cai de Ribero, que xube ente cases soportalaes camín del centru históricu avilesín y onde en 1513 se fundó un hospital de pelegrinos, llamáu de la virxe de l’Asunción, a iniciativa del clérigu Pedro de Solís, que llegó a tener capiya y cementeriu propiu pa enterrar los pelegrinos que teníen la desgracia de fallecer nesta villa, lloñe del so llugar d’orixe. Na cai socédense los edificios con soportales, munchos d’ellos construyíos nel sieglu XVIII, cuando esta vía se convirtió nuna prolongación del caseríu primitivu d’Avilés.

Nel so percorríu, déxase a mano esquierda la entrada al parque de Ferrera, el gran pulmón verde del centru de la ciudá, amás de la fonte de Los Caños de Ribero y la capiya del Cristu.

• Ver ficha: Los Caños de Ribero   
• Ver ficha: Capiya del Cristu de Ribero   
• Ver ficha: Parque de Ferrera   
• Ver ficha: Palaciu de Llano Ponte   

Más arriba, a mano derecha, atópase’l que foi palaciu de los Llano Ponte, yá cerca de la plaza d’El Parche, presidida pola Casa Conceyu y puntu final d’esta etapa. Nesta plaza documentóse la existencia na Edá Media d’un hospital d’enfermos y pelegrinos dedicáu a San Xuan.

• Ver ficha: Casa Conceyu d’Avilés   
• Ver ficha: Palaciu del Marqués de Ferrera   
• Ver ficha: Avilés