Empieza esta etapa na plaza d’El Parche d’Avilés, xunto al edificiu del conceyu. La ruta sigue pela cai Ferrería, asitiada a la derecha de les cases consistoriales. Ye ésta una de les víes más característiques d’Avilés, que traviesa’l recintu cercáu medieval. Consta la realización d’obres d’empedráu d’esta vía yá ente 1676 y 1680. Nella existen dellos tramos de viviendes con portalaes, debaxo de les que se caltienen en dellos casos zones pequeñes de firme realizáu a base de regodones menudos. La parcelación dominante a entrambos llaos de la cai ye estrecha y allargada, con inmuebles d’ún a trés pisos. Exemplos destacaos de cases d’interés nesta cai son la Casa de Cuervo-Arango, del sieglu XVII (nel númberu 10) o l’eclécticu edificiu del númberu 29, d’a primeros del sieglu XX.

Depués d’unos metros apaez a mano esquierda l’edificiu del palaciu de Valdecarzana, d’epoca gótica y güei convertíu nel archivu históricu municipal.

• Ver ficha: Palaciu de Valdecarzana o Casa de Baragaña   
• Ver ficha: Casa con corredor   

La cai desemboca na plaza de Carlos Lobo, presidida pola ilesia de los Padres, cola so capiya amestada a la de los Alas. Enfrente, el Muséu de la Ciudá d’Avilés.

• Ver ficha: Casa de Carlos Lobo   
• Ver ficha: Ilesia de los padres franciscanos   
• Ver ficha: Capiya de los Alas   
• Ver ficha: Muséu d’Avilés   

La cai de La Ferrería desemboca nel parque del Muelle, que se bordia, pasando al pie de la fachada posterior del palaciu de Camposagrado, nuna zona pela qu’antaño pasaba El Río Tuluergo, que facía de llende ente Avilés y el pueblu pesqueru de Sabugo, al que s’aportaba per una ponte qu’había equí.

• Ver ficha: Parque del Muelle   
• Ver ficha: Palaciu de Camposagrado   

En dexando atrás el palaciu, sigue bordiándose’l parque del Muelle y llégase a un encruz, na plaza de Pedro Menéndez, con una fonte historicista en mediu. Síguese per esta cai, dexando a mano esquierda la plaza de Les Aceñes, construyida ente 1873 y 1879, na zona del enanche burgués d’Avilés.

• Ver ficha: Plaza de los Hermanos Orbón   

Continúa la ruta pela cai de la Estación, que n’ascensión lleva a la ilesia románica de Sabugo. Esta cai garró la configuración actual ente los sieglos XIX y XX, y foi la escoyida por munchos indianos pa llevantar edificios que diben destinar sobre manera al arriendu. Caltién dos edificios con portalaes, de dómina anterior, y inmuebles interesantes, como’l de l’antigua Ferretería y Quincalla Fernández y compañía o’l xalé na esquina cola cai Carreño Miranda

• Ver ficha: Edificiu de viviendes de 1914   
• Ver ficha: Edificiu de viviendes de 1923   

El camín tuerce pa la esquierda, diendo a la vera de la ilesia románica de Sabugo y llegando a la plaza del Carbayo, arrodiada d’edificios vieyos, dalgunos de dos plantes namás con corredores de madera na cimera.

• Ver ficha: Ilesia de Sabugo   
• Ver ficha: Edificios de la plaza d’El Carbayo   

En pasando la plaza, síguese escontra la derecha pela cai Marcos del Torniello y nel siguiente encruz síguese en dirección esquierda, enllazando cola avenida d’Alemaña, nuna zona yá moderna d’Avilés con bloques altos de viviendes. A la esquierda ye posible contemplar l’edificiu de la ilesia nueva de Sabugo, presidíu poles dos torres altes que bordien la fachada.

Continúase pela avenida d’Alemaña y empieza depués d’una rotonda la xubida a San Cristoba, al pie d’un pobláu de viviendes de marineros a la derecha, nel barriu del Nodo.

• Ver ficha: Cases del Nodo   

Más p’alantre déxase a mano derecha un centru de formación pal empléu y l’edificiu del colexu d’educación especial de San Cristoba. Dende esta zona alta pue acolumbrase una bona panorámica del puertu d’Avilés.

• Ver ficha: Puertu d’Avilés   

Llégase a Valdreo y la xubida sigue per una contornada yá cada vez más rural onde los bloques de viviendes van dexando pasu a los praos y a dalgún horru. Déxase a mano esquierda l’edificiu de la residencia d’ancianos de Santa Teresa de Xesús Jornet y l’ascensión remata nel barriu de La Sablera.

La ruta sigue recto, dexando a mano derecha un esvíu al club de tenis d’Avilés y atopándose poco depués, a mano derecha, una fonte. Esta ye yá una zona rural dafechu, con viviendes unifamiliares pequeñes, dalguna d’elles con corredor na planta cimera. Tres del edificiu de l’asociación vecinal La Talaya dexa d’haber cera y pasa’l Camín pel arcén de la carretera. Llégase d’esta manera, ente praos, cases y dalguna casería vieya colos sos horros y paneres, al encruz conocíu como El Campo’l Conde, onde hai una placina de planta triangular énte una tira de viviendes d’una y dos altures.

• Ver ficha: El Campo’l Conde   

A la derecha d’esti espaciu sigue una carretera que lleva a Salinas y La Fundición, mentes que’l Camín sigue pela carretera de la esquierda, hacia El Cotu Carcéu, pel arcén de la vía, ente viviendes.

Tres d’una curva, síguese de frente, dexando a mano esquierda un esvíu per carretera. Un poco más abaxo, n’otru encruz, síguese de frente, dexando dos esvíos a derecha y esquierda, y empieza la baxada, pel arcén de la carretera, camín de la urbanización El Cotu Carcéu, a la que nun se va llegar. En dexando atrás una esviadura a la esquierda, a una finca privada, y depués de doscientos metros aproximao de descensu, gárrase una pista, a mano esquierda, que tres d’unos pocos metros iniciales con firme de formigón pasa a ser de tierra y piedra. Nesti puntu faise’l tránsitu dende’l conceyu d’Avilés al de Castrillón.

Empieza nesti momentu un camín ente muncha vexetación, que circula más o menos paralelu, a lo primero, a los bloques de viviendes de la urbanización que, nuna cota más alta, desenvuélvese a mano derecha de la ruta. Depués de daqué más de mediu quilómetru llégase a un pasu inferior de la carretera autonómica que se resalva per un túnel conformáu por un arcu de formigón. Síguese depués en baxada ente la vexetación, pasando un reguerín per una pasarela de formigón con dos vanos pequeños pa la circulación del agua, empezando poco depués la xubida escontra les cases del llugar de La Plata.

• Ver ficha: La Plata   

Déxase a mano derecha una pista forestal y xúbese per una vía que llueu pasa a tar formigoniada y que da a la carretera autonómica AS-320. Síguese pa la derecha, pel so arcén, dexando más p’alantre a la esquierda l’esvíu a Ferralgu, nuna curva zarrada. Continúase pela carretera, pásase per debaxo d’un viaductu de l’autovía y llégase al nucleu de Samiguel.

Poco depués, déxase un esvíu d’una carretera a mano esquierda. A mano derecha apaez llueu una casa con un horru y llégase depués a un pasu inferior per debaxo les víes del ferrocarril, conformáu por un túnel de piedra, na zona conocida como El Ventorrillu.

Al cruciar el túnel síguese pel arcén de la carretera autonómica, equí en recta y que, en dexando a mano esquierda unes viviendes, enllaza cola sienda fluvial que xunta Salinas con Piedrasblancas; gárrase la sienda, esviándose polo tanto de la carretera a la esquierda, per una pista, primero de grava y depués formigoniada, que n’ascensión ente viviendes y dalgún horru y panera, lleva a la carretera N-632.

• Ver ficha: Piedrasblancas   

Crúciase esta vía, teniendo en frente una vivienda antigua de dos altures, con una galería de madera nel pisu cimeru; en pasándola, tuércese a la derecha, xúbese una cuesta ente edificios, yá nel nucleu de Piedrasblancas, que lleva a la cai onde ente los bloques de viviendes entá se caltién, aisláu, dalgún horru y una casa de dos plantes construyida en piedra, con recercos de sillería nos vanos y bistechos na cornisa. Tres d’esta casa vírase a la derecha, pasando pela fachada trasera de la Casa Conceyu vieya de Castrillón, y llegando a una plaza con un espaciu pequeñu arboláu nel mediu.

• Ver ficha: Casa Conceyu vieya   

Síguese a la esquierda, bórdiase l’edificiu del colexo Infanta Leonor, y llégase a la plaza d’Europa, centru neurálxicu de la capital de Castrillón, onde ta’l templu parroquial, el centru cultural Valey y les cases consistoriales.

• Ver ficha: Escuela Infanta Leonor   
• Ver ficha: Ilesia de Piedrasblancas   

En pasando la Casa Conceyu, a mano esquierda, gárrase’l primer esvíu a la derecha, camín de la escuela. Síguese per esta cai, ente viviendes unifamiliares y dalgún horru, hasta qu’a la fin d’ella hai un biforcu onde hai qu’escoyer la vía que tira a la derecha, una carretera local yá ensin ceres que depués d’una curva, onde pue vese un horru nel mediu d’un conxuntu d’edificaciones agropecuaries, síguese a la esquierda nel siguiente encruz y xúbese a la parte trasera de la escuela; puen contemplase nesi percorríu bones vistes a la esquierda del nucleu urbanu de Piedrasblancas.

Xusto depués de dexar a mano esquierda l’edificiu de planta circular de la escuela infantil, gárrase l’esvíu a la derecha, pela carretera local que lleva al barriu de La Cruz, nuna cuesta pindia ente viviendes unifamiliares a la esquierda y praos y dalgún ocalitu a la derecha. Pásase al pie d’un área pequeña de descansu, con bones vistes sobre Piedrasblancas, y nel siguiente biforcu de víes, yá nel barriu de La Cruz, óptase pol camín de la esquierda, con murios de formigón de zarrar parceles bordiando la ruta. Nel siguiente encruz, nun nucleu pequeñu de viviendes, síguese pela esquierda, pasando poco depués al pie de un depósitu d’agua qu’en pasándolu llégase a otru biforcu de caminos onde la ruta continua pel de la derecha, pasando entós el firme a ser de grava nun percorríu arrodiáu d’ocalitos.

• Ver ficha: La Cruz   

Depués de malapenes doscientos metros, n’otru encruz con una carretera local, síguese de frente, pela pista, ente praos, ocalitales y dalgún tramu de zarru de parcela a base de sebe. Déxase a mano esquierda, más p’alantre, otru esvíu y síguese nuna xubida suave, y con bones vistes a la derecha; allalantrones, Muros de Nalón. Llégase al cogollín de cases que ye’l barriu d’El Cordel, pasando nesta zona’l camín a tar formigoniáu. Circúlase pel antiguu Camín Real de la sierra d’El Cordel, que tenía na dómina medieval y moderna tramos empedraos, como consta en referencies recoyíes nel catastru d’Ancón de 1753.

• Ver ficha: El Cordel   

Depués de les viviendes vuelve la pista a ser de grava y nun encruz de caminos síguese pel de la esquierda, ente praos, dalgún ivernaderu y ocalitos, con dalguna vivienda sola nesti percorríu pel monte de La Lloba.

Esti camín conecta con otra vía, síguese a la derecha, per una pista de grava que pasa ente carba y ocalitos. 900 metros depués llégase a una pista de formigón y déxase a mano esquierda unes instalaciones d’una compañía de xardinería, ente les que se ve una panerona, y a la derecha a lo cimero, el pueblu. Síguese recto, ente sebes, dalgún árbol y praos a entrambos llaos, dexando delles esviadures a mano esquierda, y desembócase nuna curva onde hai que garrar la pista de grava que sal a la derecha, ente ocalitos.

Esta pista baxa mediu quilómetru, hasta cruciar El Ríu la Ferrería pela llamada ponte de Santiago, nun sitiu conocíu como La Pontona. Ye esta una ponte de trés güeyos, construyida en mampostería y piedra de cantería. La ponte, delles veces reconstruyida y remocicada, dexa pasar a una zona na que’l Camín va ente praos y llega llueu a les primeres cases d’El Monte, nel barriu de La Ventaniella; a la esquierda apaez tamién un gran viaductu de l’Autovía del Cantábricu.

• Ver ficha: El Monte   

Llueu la pista de grava xúntase con una carretera local y síguese a la derecha nesi alcuentru. Pásase per una zona onde hai una cera nun llau de la carretera, pa siguir depués pel arcén, ente murios de piedra de llende de parceles y viviendes, con munchos horros y paneres. Pásase xunto a una fonte-llavaderu y llégase a la capiya de los Remedios, de planta rectangular, precedida por un pórticu sosteníu por dos columnes d’estilu toscanu. Remata l’edificiu con una espadaña con una campana.

• Ver ficha: Capiya de los Remedios   

En pasando la capiya, nuna curva, síguese a la esquierda, pasando per delantre d’una casa con un corredor llargu na planta d’enriba, hasta dar, nuna curva, na carretera CT-1; queda a mano derecha, antes de la carretera, una casa con una galería blanca pervistosa na planta cimera.

Crúciase la carretera y síguese de frente per una vía que lleva al cementeriu. Esta vía conduz a un espaciu n’abertal onde se llevanta un llavaderu cubiertu; ellí síguese escontra la derecha. Va caleyándose ente cases zarraes por murios de piedra y, en dexando un esvíu a la esquierda, acaba llegándose, yá nel barriu de La Banda, a la ilesia parroquial de Santiagu’l Monte, cola so fachada principal coronada por un campanariu altu.

• Ver ficha: Ilesia de Santiagu’l Monte   

En pasando la ilesia y el campusantu (y el carbayu centenariu que s’alza ente ellos) llégase, depués d’una xubida curtia pero cuesta y en dando una curva mui zarrada, a la carretera N-643 (qu’a la derecha lleva al cercanu aeropuertu d’Asturies). Crúciase y síguese pela carretera AS-318 que va a Ranón, dexando a mano derecha un horru.

L’ascensión pel arcén d’esta carretera va dexar acolumbrar, a mano esquierda, bones perspectives del valle de Santiagu’l Monte que’l Camín acaba de travesar.

El camín adiéntrase nuna zona onde va tar arrodiáu d’ocalitos. Déxase un esvíu a la derecha y síguese ente praos y unos cipreses que zarren una parcela, hasta que se llega a un pasu per debaxo de l’autovía. Síguese de frente, dexando a mano derecha un esvíu al llugar de Panizales. Poco más p’alantre, nuna curva, salse de la carretera pa internase nun ocalital per una sienda de tierra y piedra, produciéndose nesti momentu la transición ente los conceyos de Castrillón y Sotu’l Barcu y empezando’l percorríu pela sierra d’El Cueplu.

Poco depués d’incorporase a esta vía, el Camín vuelve esviase a la esquierda, adientrándose dafechu nel ocalital. Más p’alantre déxase a mano derecha un esvíu y unes balses d’agua a la esquierda. Conéctase con otra pista y síguese a la derecha hasta coronar el monte La Granda y empezar la baxada al pueblu d’El Castillu, pudiendo contemplase de ralo en ralo, ente la masa d’árboles, vistes de la ría del Nalón y, al fondu, del puertu de San Esteban.

Depués de poco menos de trés quilómetros per esti ocalital, llégase a les primeres viviendes de La Florida y la pista pasa a tar formigoniada.

Déxase a mano esquierda una casa con capiya y cruceru y a la derecha, unes escueles vieyes, de 1860; hai una vista perbona, de frente, de la torre d’El Castillu y del pueblu surdíu alredor d’ella.

A la fin d’esta baxada llégase al fondu del valle y crúciase una ponte de piedra ensin pretil, tomada dafechu pola vexetación, sobre El Ríu Caseras. De siguío, pásase la carretera SB-3 y síguese de frente, nuna cuesta empinada per un camín de formigón que lleva al pueblu d’El Castillu. Vase per esti nucleu diendo pela cai del Pelegrín, anque pue tirase a la derecha p’averase a la torre.

• Ver ficha: El Castillu   
• Ver ficha: Torre de San Martín   

Ye El Castillu un pueblu de cases baxes, con galeríes munches d’elles nel pisu d’enriba. Dende’l mirador qu’hai a lo cabero de la cai del Pelegrín pue contemplase una panorámica escelente del conxuntu de la torre y les edificaciones que la arrodien, amás de la revuelta que fai El Ríu Nalón nesti tramu final del so percorríu, ensin escaecese de la ponte de La Portiella, que lu traviesa conectando Sotu’l Barcu con Muros de Nalón. Embaxo, nel ríu, pue acolumbrase los atracaderos de madera que faen d’esti sitiu ún de los más pintorescos de tol percorríu del Camín costeru asturianu. Nesti puntu facíase’l tradicional pasu en barca de la ría, primero de que fixeren la ponte.

Escontra esa ponte va agora’l Camín, pa lo que va haber que bordiar primero’l ríu y travesar el conceyu de Sotu’l Barcu.

La ruta sigue per un camín paralelu al ríu, pel que se dexa El Castillu. El camín empedriáu dexa pasar a una carretera local que lleva a Sotu’l Barcu, pasando al pie de delles viviendes y un depósitu d’agua. Esta carretera conecta cola local SB-3 y desemboca nuna rotonda, que se bordia, prosiguiendo hacia la esquierda, camín de Sotu, pel arcén de la N-632, hasta llegar a una segunda rotonda, yá nel mediu del pueblu. Gárrase entós el primer esvíu a la derecha, per una carretera que lleva al pueblu de La Madalena, ente dalguna casona antigua, d’estilu indianu, como Villa Carmen.

• Ver ficha: Sotu

Déxase a mano derecha lo que yera’l palaciu de La Madalena, güei establecimientu hosteleru. En dexándolu atrás, llégase a una zona con bones vistes, a la derecha, del destín d’esta etapa, la villa de Muros de Nalón.

• Ver ficha: Palaciu de La Madalena. Casa de Rodrigo Llano y Ponte   

Llégase al nucleu de La Madalena, d’arquitectura mui guapa, onde pue contemplase casones d’estilu tradicional asturianu, con corredores y galeríes, y otres d’influencia indiana y estilu modernista, neoclásicu y racionalista. Traviésase’l pueblu pela cai de La Vallosa.

• Ver ficha: La Madalena   
• Ver ficha: Casa Maribel   
• Ver ficha: Casa d’Ana Fierro   
• Ver ficha: Villa los Cedros   
• Ver ficha: Casa de Manuel Pintado   

En dexando atrás La Madalena, síguese de frente pela carretera, con bones vistes a la esquierda de la isla d’El Ríu Nalón, colos sos plantíos de quivis. Na recta déxase a mano esquierda un esvíu y un pobláu d’infraviviendes. Más alantre, nuna curva zarrada a la derecha, empieza la baxada a la ponte del Nalón y pásase xunto al monolitu que recuerda que nesta zona llamada La Cantera del Puente hai una fuesa común de víctimes de la represión franquista.

• Ver ficha: Fosa de la Cantera del Puente   

Dende la carretera llégase a la ponte de La Portiella sobre’l Nalón, coincidente col percorríu de la carretera nacional 632. Hai a entrambos llaos de la ponte pasos peatonales estrechos, dende los que puen contemplase vistes perbones del cursu fluvial y de los atracaderos de madera.

• Ver ficha: Ponte de La Portiella   

En cruciando’l ríu, yá nel conceyu de Muros de Nalón, síguese pel arcén de la carretera nacional, hasta que, en bordiando una rotonda, na zona conocida como La Casilla, gárrase un esvíu a la esquierda, per un camín de tierra, con dalgún tramu empedráu, qu’ente ocalitos lleva nuna cuesta empruna a Era, pela rodiada del nucleu de Muros de Nalón, depués d’un percorríu de daqué más de 350 metros.

• Ver ficha: Era   

Esta pista de tierra acaba conectando (nun puntu con vistes escelentes a la derecha de los pueblos de San Esteban y L’Arena, y de la desembocadura del Nalón nel mar Cantábricu) con una carretera local formigoniada que se sigue de frente, ente cases unifamiliares y horros.

Llégase a un encruz onde hai una fonte y síguese contra la derecha, baxando una pista que dexa a mano derecha un horru y que depués de pocos metros enllaza cola carretera N-632; pel so arcén síguese unos 65 metros hasta cruciar y enllazar con una pista que s’abre a la derecha, y que pasa en sentíu perpendicular a la carretera.

Esta pista, primero de piedra y tierra y depués de formigón, va pel barriu de La Pumariega, pasando xunto a una casona blanca de trés altures, con una galería vistosa de madera nes dos plantes d’enriba que sigue na gran bufarda rematando un conxuntu que se completa con una palmera alta énte la construcción.

• Ver ficha: Casa de Gumersindo Rodríguez   

En pasando esta casona, la ruta xacobea vira a la esquierda, conectando col camín de Los Carbayones, que xube y crúciase con otra vía, que tira a la esquierda pela cai Eugenio L. Alonso; la xubida lleva a un encruz de caminos, con isleta vexetal nel mediu, onde hai que garrar el que sigue pela esquierda, al pie d’una urbanización pequeña de viviendes adosaes.

Síguese per esta vía, bordiada primero por murios altos de piedra, que dan pasu depués a murios de formigón y más p’alantre a un conxuntu d’edificios, na Travesía de Muros, que conducen tres d’un percorríu curtiu pela cai Arango a la Casa Conceyu de Muros de Nalón, precedíu d’un espaciu públicu presidíu pola estatua del primer marqués de Muros de Nalón, Constantino Fernández Vallín y Álvarez Albuerne.

• Ver ficha: Casa de María Paz Uría González   
• Ver ficha: Casa Conceyu

En dexando tras l’edificiu del Conceyu, llégase a la gran plaza de Muros de Nalón, presidida pola ilesia parroquial y la so torre, auténticu faru visible dende munchos quilómetros a la redonda. Nesti puntu acaba la etapa.

L’orixe d’esta plaza central de Muros de Nalón arrinca de la concesión de mercáu nel sieglu XVI y la so configuración respuende más al modelu de campu ferial que de plaza en sí. Anguaño preséntase como una plaza ecléctica, muestra de les distintes tipoloxíes arquitectóniques desenvueltes dende’l sieglu XVIII hasta agora, destacando un conxuntu d’edificios del sieglu XVIII, caracterizaos poles sos composiciones de fachada rítmiques y simétriques, resueltes con balcones enrasaos o con corredores volaos y bufardones retrasaos. Destaca la vivienda col númberu 20, construyida nel sieglu XVIII por un presbíteru de la catedral d’Uviéu, D. Juan del Riego, que mandó llabrar inscripciones con alusiones relixoses nos cargaderos de los vanos. Esta casa yera conocida como la de “las Pilotinas”, porque tuvo habitada poles fíes d’Andrés del Riego, pilotu de mar.

• Ver ficha: Ilesia de Santa María de Muros de Nalón   
• Ver ficha: Muros de Nalón