Etapes del Camín del Salvador

Introducción

EL CAMÍN DEL SALVADOR

La ruta xacobea qu’enllaza Llión con Uviéu ye una de les víes vinculaes al Camín de Santiago de percorríu más curtiu, malapenes 120 quilómetros, pero d’historia más llarga, al lligase directamente los sos oríxenes cola promoción y puxanza del cultu a les reliquies calteníes na catedral d’Uviéu, yá con relevancia evidente na segunda metá del sieglu XI.

Yá’l rei asturianu Alfonso II fixere tolo  posible pa dotar a la so capital nueva, Uviéu, d’un gran relicariu onde se depositaren reliquies de tolos apóstoles, fechu qu’ayudó a un cultu incipiente,  de primeres local, a la catedral de San Salvador. Tres del treslláu de la corte a Llión en 910 paeció apandar esti fenómenu, que se vio, sicasí, reforzáu nel sieglu XI gracies al gran cultu que profesaron al relicariu uviedín dellos monarques de Llión y Castiella, casu de Fernando I, quien lu visitó en 1053, y, sobre manera, d’Alfonso VI, qu’en 1075 procedió a l’apertura del Arca Santa caltenida na Cámara Santa de la catedral d’Uviéu, nun actu onde tuvo acompañáu polos grandes dignatarios del momentu, incluyíu’l famosu Cid Campeador.

Esa Arca Santa que s’abrió en 1075 yera una caxa vieya de madera de cedru que caltenía reliquies de Xesús, la Virxe María y los apóstoles. Caltúvose nos principios del cristianismu en Xerusalén, hasta que les socesives incursiones perses na ciudá santa forciaron a treslladala al norte d’África y dende ellí a Toledo, nun intentu de protexer esa ayalga. En Toledo, nel sieglu VIII, diba cambiase la caxa primitiva por otra de madera de carbayu, que foi la que viaxó hacia’l norte d’España nel momentu de la invasión musulmana de 711. De mano atopó abellugu en La Malena, monte de l’asturiana sierra de L’Aramo, na zona central del Principáu, hasta qu’en tiempos del rei Alfonso II foi depositada na actual Cámara Santa de la Catedral d’Uviéu. Un primer intentu d’abrila foi en 1035, protagonizáu pol obispu Ponce de Tavernoles, anque según la lleenda un rellumu surdíu del arca torgó-ylo. En 1075 llogróse finalmente en presencia del rei Alfonso VI.

Namás s’abrió l’Arca Santa, realizóse un inventariu de les decenes de reliquies calteníes nella, ellaborándose inventarios que llueu se divulgaron per tola Europa cristiana, entamando d’esta manera un fluxu cada vez más notable de pelegrinaxe a la catedral uviedina. P’acoyer a esos pelegrinos el mesmu rei Alfonso VI donó l’antiguu palaciu de los reis d’Asturies n’Uviéu, el “palatium frantisco” pa la so conversión n’hospital de pelegrinos, col nome de San Xuan.

Esti mesmu monarca y los sos socesores Fernando II y Alfonso IX van tratar de favorecer la creación d’una rede asistencial al pelegrín nel camín que s’empezó a consolidar ente Llión y Uviéu, aniciu del actual Camín del Salvador. Exemplu d’eso son les disposiciones pa intentar dotar d’un hospital de pelegrinos al entós peligrosu y solitariu paraxe del altu d’El Padrún y el monte de Copián, ente la villa de Mieres y la de Lluniego, realizaes socesivamente en 1103, 1143 y 1220, anque paez que nun diba ser hasta 1267 cuando esta intención cuayare, na malatería de La Rebollá. Otros hospitales de pelegrinos van surdir col tiempu nesta ruta del Salvador, casu especial del vinculáu a la colexata de Santa María d’Arbas, nel sieglu XII, o los existentes en Campumanes (citáu en 1247), Uxo (albergue documentáu nel XV) o Mieres del Camín (que yá se cita’l so primer albergue en 1189).

Al pie d’estes albergueríes, son munches tamién les referencies a actuaciones de meyora nes pontes peles que pasaba la ruta xacobea del Salvador, casu de les alusives a les pontes d’Uxo, Mieres o Lluniego, toes elles vinculaes directamente a hospitales de pelegrinos qu’había a la vera, nuna asociación típica del mundu xacobéu.

Uviéu consolídase dende últimos del sieglu XI como’l segundu gran centru de pelegrinaciones de la península ibérica, namás per detrás de Santiago de Compostela, como se reflexa nes Partíes del rei Sabiu Alfonso X, quien al definir al pelegrín failo indicando que ye la persona que va en pelegrinaxe a Santiago o a San Salvador d’Uviéu “o a otros llugares de llonga y d’estraña tierra”. Va ser frecuente nos sieglos medievales que se llegue a producir l’asociación ente San Salvador d’Uviéu y el conxuntu de la rexón asturiana, sobre manera en documentos de fuera d’España, onde se llega a aludir, por exemplu, a Xixón como’l puertu de San Salvador.

El Camín del Salvador va ser frecuentáu por viaxeros estranxeros, que dalgunos dexaron testimoniu del so pelegrinar, aludiendo siempre nos sos testos a la dureza del tránsitu pel cordal Cantábricu o a la guapura del paisaxe ástur. Un famosu cantar de pelegrinaxe francés señala la necesidá sentida por munchos nos sieglos medievales d’esviase en Llión del camín francés pa dirixise al norte, pela ruta del Salvador, hacia la Cámara Santa uviedina:

Quien va a Santiago y non al Salvador

Visita al criáu y dexa al Señor

Na renacencia xacobea actual, la ruta del Salvador consolidóse como un camín de conexón ente’l camín francés y los caminos del Norte d’España. Ye una ruta que parte del mesmu centru de Llión, de cerca del antiguu hospital de San Marcos, actual Parador Nacional, y que na so vertiente asturiana (en travesando’l puertu de Payares) pasa pelos conceyos de Ḷḷena, Mieres, La Ribera y Uviéu, dende onde pue siguise pa Santiago pela ruta primitiva (hai un camín, non declaráu oficialmente anque sí señalizáu sobre’l terrén, que conecta Uviéu con Avilés y dende ehí cola vía costera escontra Compostela).

Ver toles rutes

Scroll to Top