Camín del Salvador

Etapa 2: Campumanes - Mieres

Etapa de 20,01 quilómetros que pasa pelos conceyos de Ḷḷena y Mieres, integrantes hasta 1836 d’un únicu conceyu, llamáu’l conceyón pol so gran estensión, y que tenía la capital en La Pola, localidá a la que’l Camín llega malapenes 4 quilómetros depués d’empezáu esti percorríu.

Tol Camín coincide nesta etapa con tramos asfaltaos, o arcenes de carreteres o’l camín fluvial xunto a El Río Caudal que se garra dende la salida d’Uxo hasta la llegada a la capital mierense. Caltiénse a lo llargo de la etapa un descensu de contino, dende los 370 m de Campumanes a los 200 de Mieres, colo que se configura un percorríu ensin grandes incidencies de circulación.

La ruta xacobea adiéntrase nesta etapa en plena cuenca minera del Caudal, territoriu afectáu dende mediaos del sieglu XIX por una industrialización intensa derivada de la esplotación del carbón d’hulla del subsuelu y de la instalación consiguiente nesta zona de munches empreses dedicaes a la esplotación y a la tresformación d’esi material. El llabor d’estes empreses mineres tamién s’estendió a la promoción de vivienda obrera y d’otros equipamientos, que dalgunos d’ellos van poder vese al pasar per Uxo y pela capital mierense, casu de les viviendes p’altos directivos de la primer localidá, les viviendes pa obreros (destaquen pola so antigüedá los llamaos cuarteles d’Uxo, al pie de los que pasa la nuestra ruta) o equipamientos del tipu d’escueles y hospitales.

El patrimoniu cultural clásicu ta representáu por construcciones tradicionales, que subsisten sobre manera nos núcleos pequeños de Ḷḷena y Mieres pelos que pasa’l Camín y per dalgún elementu notable, como la ilesia románica d’Uxo, de la que güei namás subsiste la portada, tres de la reforma integral del templu acometida a primeros del XX de resultes del pasu inmediatu de la llinia de ferrocarril. Tamién se va pasar cerca de la ilesia prerrománica de Santa Cristina de Ḷḷena, declarada Patrimoniu Mundial en 1985, y a la que pue llegase dende’l Camín esviándose un poco de la ruta oficial.

El Camín de Santiago ta presente na historia d’esti territoriu dende la Edá Media. Nel puntu de partida de la etapa, Campumanes, existió una alberguería yá mentada en documentos de 1247 y que diba tener la continuidá nel hospital d’época moderna de la Virxe de la Concepción. Más hospitales de pelegrinos existieron en La Vega’l Ciigu (fundáu en 1642), en La Pola (que se cita’l so hospital de la Virxe de l’Alberguería en documentos de 1722, pero ensin dulda la so fundación ye bien anterior) y en Viḷḷayana (col so hospital de la Virxe de l’Alberguería, fundáu nel XVI). Yá nel conceyu de Mieres, documéntense hospitales de pelegrinos n’Uxo (fundáu a últimos del XV) y na capital, onde se documenta la existencia d’una alberguería en 1186, xunto a la ponte vieya d’accesu a la localidá, que nel sieglu XVII tresllada l’actividá al hospital de Santa Catalina, n’usu hasta’l sieglu XIX.

Descripción de la etapa

Empieza la etapa nel mediu de Campumanes, nel encruz de la cai Felipe Canseco cola carretera que se dirixe escontra Sotieḷḷo. Nesti puntu ye posible garrar l’esvíu per esta postrer carretera y empobinar, per un camín alternativu al oficial, escontra la ilesia prerrománica de Santa Cristina de Ḷḷena.

El camín oficial sigue pela cai Felipe Canseco y atópase llueu, a mano derecha, la capiya del Santu Cristu.

Pasada la capiya, apórtase bien llueu al palaciu de Revillagigedo, a mano derecha, construcción de planta rectangular y dos altures, adosada a una torre esquinera, de trés altures, posible orixe de la construcción. Enfrente del palaciu hai una fontina, y pasáu’l monumentu, dientro de la so parcela, existe una ponte de piedra, güei non a la mano del peatón, pa salvar El Río Güerna, qu’agora crúciase per una ponte de formigón paralela a la histórica.

En cruciando’l ríu síguese pel arcén de la carretera autonómica AS-242 y llégase llueu a un grupu pequeñu de cases que se pasa per delantre; ente les cases hai una construcción tradicional con un corredor de madera desenvueltu na planta superior. Ensin garrar nenguna esviadura, síguese pel arcén y crúciase per debaxo d’un viaductu de l’autovía y llégase xusto depués a la fonte d’El Reúndu, que queda a mano esquierda del camín.  

Malapenes cien metros depués de la fonte, ta’l pueblu d’El Reúndu, que se traviesa siguiendo’l percorríu de l’AA-242.

Pásase al pie de construcciones tradicionales, dalguna con horru, y al llau d’otres más recién, una d’elles diseñada a imitación d’una construcción palaciega, construyida con piedra de cantería grande, escudu y recercos nos vanos. Nesta localidá existe tamién la posibilidá d’esviase del camín oficial p’averase a la ilesia de Santa Cristina de Ḷḷena cruciando una pasarela enriba l’autovía, a mano derecha de la ruta.

Síguese pel arcén, en paralelo a l’autovía A-66, que va a la derecha del Camín. Mediu quilómetru depués de dexar atrás el pueblu, llégase a un ñudu de comunicaciones y hai que siguir derecho pela AS-242, dexando a mano derecha los accesos a l’autovía.

Depués d’otros 800 metros pel arcén, ente praos y dalguna casa sola (dalguna de tipoloxía tradicional asturiana), llégase al pueblu de La Vega’l Rei.

Apaez de primeres un conxuntu de viviendes unifamiliares de construcción nueva, nuna zona con cera, que depués dexa pasu a les construcciones del centru del llugar, ente les que destaquen les de tipoloxía popular asturiana, con corredores y galeríes de madera; hai tamién dalgún horru, como ún asitiáu, a mano derecha del camín, xunto al accesu a una pasarela peatonal que crucia l’autovía y que lleva a Santa Cristina de Ḷḷena, no que ye otru esvíu del camín oficial.

Traviésase La Vega’l Rei pela carretera AS-242, y síguese un poco más alantre de frente nun cruz con una carretera que lleva a l’autovía. Poco depués ye visible, a la derecha, tres de l’autovía y nun altu, la ilesia prerrománica de Santa Cristina.

Síguese pel arcén de la carretera, ente praos y con El Río Ḷḷena trescurriendo en parte en paralelo, pela derecha, a esta vía. En travesando la carretera les víes del ferrocarril, llégase al pueblu de La Vega’l Ciigu, malapenes un quilómetru depués de dexar atrás La Vega’l Rei.

Traviésase La Vega’l Ciigu pela carretera autonómica. Enantes de llegar, apaez la ilesia parroquial, tres de l’autovía, a mano derecha del camín; pue llegase a ella per una pasarela peatonal, que debaxo pasa la carretera primero de llegar al núcleu del pueblu. Depués d’esa pasarela, pásase al pie d’una fonte de 1907, nuna curva onde se sigue de frente, pero que contra la esquierda conduz al centru de La Vega.

En dexando atrás la fonte, la carretera trescurre ente tires de viviendes qu’arrodien el percorríu del camín unos metros. Trátase de cases unifamiliares adosaes, de dos altures (pisu baxu y planta cimera), dalgunes d’elles presenten balcones con rexería nel pisu d’enriba. Una d’eses cases, a mano derecha, de construcción non mui vieya, presenta na fachada un escudu pequeñu.

Dexaes atrás estes cases, y en pasando ente praos, llégase a la capiya de Santa Ana, vinculada a la casona asitiada a la so derecha, la Casa de Palacios.

El camín ésviase nesti puntu unos 140 metros de la carretera, pa siguir al pie de la capiya y al llau de la portalada d’accesu a la casona. Va depués ente murios de piedra y praos, y confluye finalmente otra vez cola carretera, pela que se dexa atrás el pueblu. Dende esti puntu existe yá una cera nel marxe esquierdu de la carretera y síguese per ella hasta llegar, yá en malapenes doscientos metros, a les primeres naves (nel polígonu industrial d’El Masgaín) y construcciones qu’anuncien la llegada a la capital del conceyu de Ḷḷena, La Pola.

Traviésase La Pola de sur a norte siguiendo la exa que marca la carretera AS-249, que nel centru de la localidá tresfórmase en llargos paseos y cais que trescurren al pie de los edificios y espacios públicos principales de la capital.

A la entrada de La Pola lo primero qu’apaez ye una rotonda grande, precedida, a mano derecha del camín, per naves grandes. Nel mediu d’esa rotonda apaecen dos estatues alusives a los zamarrones, obra d’Urruti.

Pasada la rotonda, déxase a mano derecha’l colexu Vital Aza, síguese pela cera hasta llegar a otra rotonda, precedida pol edificiu de les piscines municipales y los del polideportivu Jesús Suárez Valgrande y l’Institutu Benedicto Nieto.

Tres d’esa rotonda llevántense bloques modernos de viviendes. Síguese de frente, ensin garrar nengún esvíu, pela cai Carbayeda, que depués da pasu a la de Vital Aza, ente edificios residenciales que más p’alantre dan pasu a dalguna construcción más antigua, como’l llamáu Xalé Adelina, a mano esquierda, o la casa natal del lliteratu Vital Aza, a mano derecha, declarada Bien d’Interés Cultural, y n’orixe casa vinculada al palaciu vecín de los marqueses de Regueral, asitiáu énte la casa conceyu de L.lena, precedíu d’un espaciu pequeñu axardináu onde se llevanta una estatua dedicada al propiu Vital Aza.

El Camín pasa per esta zona, ente la casa conceyu y el palaciu y la capiyina apegada a él, siguiendo de frente, pa llegar poco depués al parque central de la capital, el d’Alfonso X el Sabiu, presidíu pol edificiu de la ilesia parroquial de San Martín. La obra “Hálito de Lena”, del escultor Diego Segura, alcuéntrase nuna esquina d’esti espaciu, enriba d’unes escaleres que lleven a una zona de La Pola con munches sidreríes y edificios antiguos.

Depués déxase atrás el parque, síguese de frente, pela cai Corporaciones de Ḷḷena, y pásase depués per delante del edificiu del teatru Vital Aza, a mano derecha de la ruta.

Poco más alantre, déxase a mano esquierda la escuela pública Jesús Neira y depués el colexu del Pilar, a la derecha.

Depués de los colexos síguese pela cai Hermanos Granda hasta llegar finalmente a una rotonda onde se sigue de frente (pa la derecha, la carretera lleva al enllaz cola autovía), al pie de torres altes de viviendes a mano derecha del camín. En pasando una gasolinera y un bloque más d’edificios, gárrase un esvíu a la derecha, al llau d’esti bloque, baxando una rampla que conduz a El Río Ḷḷena. Síguese’l percorríu pa la esquierda, pel paséu fluvial.

Unos 230 metros depués, en cruciando un ríu per una pasarela moderna, déxase’l paséu fluvial, torciendo a la esquierda nel llugar de La Barraca y avanzando escontra un gran viaductu de ferrocarril, que primero de llegar a él enllázase cola carretera autonómica AS242, siguiendo pel so arcén, pa la derecha.

Pásase al pie de una tira de viviendes, en La Barraca, y síguese depués pel arcén de la carretera ente praos a la derecha y dalgunos murios grandes de formigón a la esquierda, de contención de les víes del ferrocarril que va pela esquierda, en paralelo a la carretera y a una cota más alta. Más p’alantre llégase al pueblu de La Vega, con una fonte a la entrada; traviésase’l llugar siguiendo’l percorríu de la carretera, ente cases de poca altura y dalgún horru. Ente les cases pue acolumbrase, a mano derecha, y acullá d’unes praderíes, una gran instalación industrial.

Xusto depués de La Vega llégase al pueblu de Viḷḷayana, pela carretera rebautizada nesti puntu como avenida del Camín de Santiago, que tien cera na zona ente cases, yá nel nucleu urbanu.

Pásase xunto a dalguna vivienda de gran interés, como ye’l casu d’una n’esquina con trés plantes, con corredores de madera nos dos pisos cimeros.

Nel mediu del pueblu, el camín ésviase temporalmente de la carretera, garrando un esvíu a la derecha pela cai La Panera, al pie d’una panerona, y baxando ente les viviendes hasta llegar a la plaza del Cristu, presidida pola ilesia de San Martín, frente a la que se dispón una fonte y, n’alto, un horru coles parés cargaes y pintaes en blanco.

En pasando la ilesia, xúbese per una cai que lleva otra vez a la carretera; síguese per ella contra la derecha, pasando énte una tira de viviendes d’una y dos altures, nel percorríu final del camín pel pueblu de Viḷḷayana.

Dexaes atrás estes viviendes, síguese ente construcciones soles, delles naves y en paralelo a les víes del tren, qu’en dalgún puntu riquieron llevantar viaductos, visibles dende’l camín.

Pásase al pie de les árees industriales de Vaḷḷines, Vegamuro y los llamaos talleres vieyos de Román, formaes toes elles por grandes naves y delles viviendes vinculaes a les mesmes. Nel llugar de Sanriella, onde antaño existió una venta caminera, ta’l tránsitu del conceyu de Ḷḷena al de Mieres.

Depués, pásase a circular xunto al ríu, que queda a la derecha, mentes que’l llau esquierdu ta llindáu por murios altos de piedra de contención de les llinies del ferrocarril. La carretera pasa percima de dalgún tramu de ferrocarriles vieyos yá desapaecíos y casetes de control del tráficu ferroviariu; llégase de siguío al pueblu d’Uxo, yá nel conceyu de Mieres.

Llégase a Uxo, tres d’un encruz de carreteres, cruciando’l  principiu de la ponte que salva El Río Caudal (formáu un pocu más arriba, en Sovilla, de la unión de los ríos Ḷḷena y Ayer) y qu’escontra la derecha lleva a Figareo y al valle de Turón.

Cruciada esa ponte, apaez a la esquerda’l el gran edificiu de los inxenieros de l’antigua sociedá Hullera Española. Pásase per delantre, aportando a la carretera local MI-3, que traviesa tola localidá, y que per un tramu ensin ceres lleva al centru del pueblu. Delantre d’esi xalé de los inxenieros pue garrase un esvíu que dexa travesar Uxo siguiendo’l percorríu del paséu fluvial, ensin aportar al interior de la localidá.

El camín oficial sigue escontra’l centru, ente cases non mui altes, munches con galeríes de madera, y llega depués de 300 metros a un esvíu que conduz, a la esquierda, pa la ilesia de Santolaya y la plaza qu’ésta preside, onde s’alcuentra’l cuartel de la Guardia Civil y una fonte.

En travesando la plaza, síguese contra la derecha, pa enllazar otra vez cola carretera xeneral MI-3 nel so tránsitu pela localidá, tuércese a la esquierda y pásase per delantre de dos grandes bloques de viviendes obreres, de la tipoloxía conocida como cuarteles, con trés niveles; los dos cimeros tienen corredores de madera, que valen d’accesu a les cases dende les escaleres llaterales qu’articulen en vertical los bloques de los cuarteles.

A mano derecha, un poco más alantre alcontramos una casona con dos escudos, y depués, en pasando una curva, los restos d’una antigua fábrica de chocolates.

Síguese pela travesía principal d’Uxo, ente otres viviendes de gran interés, de tipoloxía obrera y popular.

Dexaes atrás eses viviendes, pásase, yá a les afueres d’Uxo, al pie d’un centru de salú y un polideportivu, tres del que s’enllaza, a mano derecha, cola sienda fluvial, pela que sigue’l percorríu xacobéu nos siguientes 4,7 quilómetros, aproximao.

Nun primer momentu pásase al pie de la escombrera minera de Ricastro, a la esquierda del Camín, y llégase más p’alantre al pueblu de Santuyano, pasando per delantre de la so estación de ferrocarril y debaxo del arranque de la ponte que lleva a la ilesia parroquial d’esta localidá, asitiada al otru llau d’El Río Caudal.

Depués de Santuyano yá s’entra nel área urbana de Mieres. Pásase al pie de los llugares d’El Pedroso, El Praón y El Requexéu, pa depués circular énte les naves del polígonu industrial de Gonzalín; yá s’acolumbren al otru llau del ríu les primeres barriaes de Mieres.

Tres del polígonu llégase a la estación de ferrocarril de Mieres, síguese de frente pela sienda, dexando a mano derecha la ponte de Siana y enllazando más p’alantre cola ponte agora peatonal de La Perra, de fierro y piedra, que cerca d’ella alcontrábase la alberguería histórica de La Ponte, yá mentada en 1186.

Esti hospital de pelegrinos, xunto a la ponte, yá taría en funcionamientu en 1189, cuando un documentu fala de la so fundación por Gonzalo Pérez Gibelín y la so muyer. Nesi añu 1189 Gundisalvo Petri dónalu a la catedral uviedina y pasa en centuries posteriores a camudar l’allugamientu pal cascu urbanu de Mieres; el so herederu ye l’hospital de Santa Catalina, qu’en 1564 allugábase en La Cai, nún de los núcleos históricos de Mieres, mentes que más p’alantre, desque sufrió los efectos d’una inundación, treslládase a la plaza de La Paraxuela.

Crúciase El Río Caudal pela ponte de La Perra y hai que baxar depués unes escaleres pa circular per un pasu fonderu de l’autovía que lleva a otres escaleres que dexen llegar a una pasarela peatonal que crucia les víes del ferrocarril de vía estrecha; báxase directamente a la cai Manuel Llaneza y queda a mano derecha la estación del ferrocarril de vía estrecha FEVE.

Síguese per esa cai y llégase a una rotonda que, en pasándola, síguese de frente, dexando a mano derecha la estación vieya del ferrocarril Vasco Asturianu (al pie d’ella caltiénse una locomotora de vapor del añu 1902) y el barriu modernu construyíu no que yeren los terrenos ferroviarios.

Llégase poco depués al parque central de Mieres, el de Xovellanos, manzorga, y síguese pela cai Manuel Llaneza y llégase desiguida al gran edificiu de les escueles Aniceto Sela, per delantre de les que sigue la ruta, llegando un poco más p’alantre al edificiu de la escuela vieya de capataces mineros, güei reconvertida en Casa de la Cultura de Mieres.

Finalmente, esta cai conflúi na de Ramón y Cajal, torciendo a la esquierda y siguiendo’l percorríu per delantre del edificiu de lo que yera’l cine Esperanza.

Pasáu’l cine, llégase nunos 100 metros a la plaza de La Pasera, presidida pola estatua del lliteratu Teodoro Cuesta y cola ilesia parroquial de San Xuan al llau. Ye ésti’l puntu final de la etapa.

Compartir

Share on facebook
Share on twitter
Share on linkedin
Share on pinterest
Share on email
Scroll to Top