Camín del Salvador

Etapa 3: Mieres - Uviéu

Última etapa del percorríu del Camín del Salvador que xunta Mieres del Camín cola capital asturiana, onde la Cámara Santa de la so Catedral ye’l final simbólicu d’un percorríu que tuvo por oxetivu principal averar a los pelegrinos a les reliquies d’esti santuariu, el más importante d’España pola cantidá y calidá d’oxetos sacros qu’atesoraba y que na Edá Media convirtiólu nel segundu focu d’atracción de romeros d’España, namás per detrás de Compostela.

La etapa tien un llargor de 17,30 quilómetros, pasando pelos conceyos de Mieres, La Ribera y Uviéu. Ye una etapa munchos quiebros, con xubíes y baxaes pronunciaes, que s’empecipien yá al dexar atrás el nucleu urbanu mierense, cola ascensión al altu d’El Padrún y el posterior descensu hasta Lluniego. En pasando per esta localidá uviedina, vuelven les xubíes y baxaes, más moderaos, hasta la llegada final a Uviéu.

Lo más del percorríu trescurre per caminos asfaltaos y arcenes de carreteres, anque hai un porcentaxe pequeñu de la etapa (malpenes 3 quilómetros) que se fai per siendes de tierra y grava. Existe un tramu d’interés especial na ruta xacobea nesta etapa. Trátase del camín, entá empedráu en bona parte, que s’alcuentra na xubida a Picullanza (nel conceyu de La Ribera) y más p’alantre nos tramos finales del descensu d’esta elevación.

Ye ésta una etapa rural dafechu, na que, sacante’l pasu pelos núcleos de Mieres, Lluniego y, a la fin, Uviéu, circúlase sobre manera per una redolada natural, con pueblinos y caseríes de munchu interés. El patrimoniu cultural ye abondosu y variáu, empezando pel tradicional barriu mierense de Requexu pa siguir cola bayura d’arquitectura tradicional (caseríes, horros, llavaderos, capiyes) que se va dir presentando énte’l pelegrín nel so circular per llugares pequeños como La Rebollá, Copián, Casares o Picullanza, por indicar namás unos pocos. Tamién se pasa pela localidá histórica de Lluniego, cola so ponte sobre un calce d’El Río Nalón inexistente dende 1676, y col palaciu de los Bernaldo de Quirós, dos grandes fitos del patrimoniu xacobéu d’Asturies.

Les referencies históriques al pasu de pelegrinos per esta etapa son bien abondoses. Existieron agospedamientos d’atención y auxiliu al romeru en llugares como La Rebollá (onde hubo una malatería que tamién dio serviciu al pelegrín yá dende’l sieglu XII). Tamién en Copián ta rexistrao que’l rei Alfonso VI ordenó en 1103 la construcción d’una alberguería, asocediéndose nos sieglos posteriores les referencies a los intentos por materializar esti deséu que se desconoz si se llegó a facer realidá. En Lluniego existió un hospital, dedicáu a la Virxe de los Remedios, nel barriu de La Fonte de Baxo, y caltiénse entá la casa onde s’asitió. Finalmente, nel destín d’esta etapa y del Camín del Salvador, Uviéu, existió una rede amplia d’equipamientos d’apoyu y serviciu al pelegrín.

Descripción de la etapa

Principia la etapa na plaza de La Pasera de Mieres. Arródiase la portada de la ilesia de San Xuan y síguese de frente, cruciando sobre El Río San Xuan y dexando a mano derecha la plaza de Requexu, arrodiada de construcciones tradicionales, de dos y trés plantes, con galeríes y corredores de madera; nos sos baxos alcuéntrense delles sidreríes que convierten esti espaciu nún de los centros simbólicos de la cultura sidrera asturiana, a la que s’homenaxa con una escultura d’un eschador de sidra. Al llau d’ella pasa’l percorríu del Camín.

Síguese de frente, dexando atrás la plaza de Requexu y adientrándose na cai d’Oñón (que coincide col tránsitu de la carretera autonómica AS-242 pel núcleu urbanu de Mieres), ente bloques modernos de viviendes y dalguna casa vieya aislada.

Déxase a mano esquierda un polideportivu, enfrente d’una fonte de 1896 allugada nel tramu de muriu de piedra de contención de la lladera.

Síguese recto, ensin garrar nenguna esviación peles cais llaterales, pasando xunto a una gasolinera y siguiendo depués pel barriu de La Peña. Pásase per una cera al pie de les murueques de l’antigua industria cárnica de Los Mallos y del llavaderu de carbón d’El Batán, perteneciente a la empresa Hunosa.

A mano derecha, a una cota superior a la del camín, vense les viviendes tradicionales del barriu de La Peña, d’una y dos altures. Síguese ente les murueques d’instalaciones industriales vieyes y dalguna vivienda sola, cruciando per debaxo de dos viaductos de l’autovía minera, pa de siguío dexar a mano esquierda un llavaderu de 1897, construyíu en lladriyu y con cubierta de madera. Tres d’esti llavaderu, qu’aprovecha l’agua d’El Río San Tiso, yá nuna zona de viviendes de tipoloxía obrera, hai un esvíu a la derecha que lleva, a 75 metros, a la ilesia y al albergue de pelegrinos de Mieres.

Nesi cruz, el camín oficial sigue’l percorríu de frente, pela carretera autonómica AS-242, que nesta zona dispón de ceres, al pie de viviendes obreres nel llau derechu del camín, mentes que l’esquierdu atiesta con naves y talleres, y nél hai una fonte de piedra de 1896. Síguese per esta cera hasta llegar a una rotonda, onde se tuerce pa la derecha, xunto a una alliniación de viviendes y la entrada (conformada a la manera d’un gran vanu d’accesu nun muriu de piedra) a la mina vieya de mercuriu de La Peña.

Pasada esta portalada d’accesu a la mina, síguese derecho pela AS-242, que llueu dexa de tener ceres, polo que va ser menester circular pel arcén. Xúbese ente viviendes de tipoloxía obrera y árboles; la carretera ta encaxonada ente una turria alta de tierra a la derecha y un ribayu a la esquierda. Mediu quilómetru, aproximao, depués de dexar atrás les últimes cases de La Peña, llégase al pueblu de La Rebollá, pasando al pie de la so ilesia de Santa María Madalena, na zona conocida como La Malatería.

Síguese pela carretera, travesando’l pueblu, con cases de dos y trés pisos, dalgún horru y una fonte monumental de piedra de 1923.

Dexao atrás La Rebollá, sigue l’ascensión, con una cuesta curiosa y el pasu per curves bien zarraes, ente viviendes cada vez más soles y vistes escelentes, a la esquierda, del valle d’El Río Caudal y, xusto enfrente, acullá de l’autovía, y nel valle, del pueblu d’Ablaña.

Tres d’un percorríu d’unos 400 metros, llégase al pueblu d’El Rollu, con viviendes y dalgún horru y panera.

De siguío llégase a Copián, siguiendo la xubida pela carretera autonómica, ente cases, praderíes amplies a mano esquierda, y vistes de la central térmica d’Ablaña, asitiada xusto enfrente d’esta zona, a lo fondero del valle.

Unos 700 metros depués de dexar atrás les últimes viviendes de Copián, llégase, nuna curva, y a los pies d’El Picu Gúa, al llavaderu de Santa Llucía, construyíu en 1933, como atestigua una inscripción de piedra, de diseñu racionalista.

Depués del llavaderu, llégase llueu al llugarín de Santa Llucía, nel llau derechu del camín, debaxo d’un ocalital.

A mano esquierda siguen les vistes panorámiques escelentes del valle del Caudal y, al fondo, del cordal de L’Aramo.

L’ascensión sigue y lleva a otru pueblu, Aguilar. Ye un llavaderu lo primero qu’apaez, a mano derecha; en pasándolu y tres una curva y un tramu entre praderíes, llégase a les viviendes del pueblu, alliniaes alredor de la carretera, y destaca a mano derecha una gran panera.

Inmediatamente depués, la carretera lleva a El Padrún; tamién ta’l pueblu precedíu d’un llavaderu (na zona de La Piperona), a mano derecha de la ruta, y detrás d’él tán les cases d’esti nucleu, xusto al llau de L’Alto’l Padrún, de 385 metros d’altitú.

Algamada la cima d’esti altu, empieza la baxada escontra una filera llarga de construcciones, nel llau esquierdu de la carretera, de tipoloxía obrera, con viviendes yustapuestes de dos altures, colos recercos de los güecos resaltaos con lladriyos. Depués d’eses cases, pásase al pie d’unes praderíes y llégase finalmente a otru nucleu pequeñu de viviendes asitiáu xusto na llende de los conceyos de Mieres y Uviéu.

Namás adientrase n’Uviéu, el camín dexa la carretera y ésviase pa la derecha en dirección al pueblu de Casares, per un camín asfaltáu encaxonáu ente turries de tierra a entrambos llaos, qu’ente praderíes lleva en descensu a esi pueblu, tres d’un percorríu d’unos 250 metros.

Llégase al pueblu y la primer casa que s’atopa frente al camín ye una construcción tradicional de dos pisos, con un corredor de madera nel d’enriba. Tuércese nesi momentu a la esquierda, contra un espaciu abiertu onde hai una fonte y un llavaderu cubiertu, síguese per delantre d’esos elementos y torciendo de siguío a la esquierda, de manera que nun se llega a entrar en Casares.

Baxa’l camín per una pista asfaltada unos 80 metros y depués gárrase’l primer esvíu posible a la derecha, per una sienda estrecha de tierra que pasa ente praos y llendada por muncha vexetación, d’árboles y carba, y que progresivamente va encaxonándose ente turries de tierra. Tres mediu quilómetru, esta sienda acaba dando na carretera y sigue pel arcén a la derecha, baxando una cuesta que llega a un encruz de víes onde se xira a la esquierda, continuando pel arcén de la carretera ente praos, árboles y dalguna casa sola, como una de grandes dimensiones asitiada nuna curva, a mano derecha del camín, a menor cota que’l mesmu.

Esta carretera, depués de daqué más de 700 metros, llega al pueblu de Lluniego. Desque se percuerre esta distancia, el camín ésviase d’ella, torciendo a la esquierda en dirección a la estación de ferrocarril per una carretera que tien cera. Poco después de la esviadura, alcuéntrase a mano esquierda la llamada fonte de Los Llocos, construyida en 1776; caltiénse’l cañu de piedra de dómina barroca y amestáron-y un llavaderu, tamién de piedra. Esta fonte ye un testimoniu de los esfuerzos realizaos na Asturies del XVIII por ameyorar les dotaciones de les víes d’accesu a la capital.

Depués de la fonte síguese pela cera hasta llegar a un pasu fonderu, a mano derecha, que se garra. Esti pasu dexa cruciar les víes del ferrocarril y apuértase depués a una pasarela peatonal sobre l’autovía, que conduz a una casería con una panerona y a la carretera xeneral que traviesa Lluniego, col nome d’Avenida del Príncipe d’Asturies. El percorríu va pela cera d’esta vía, a la esquierda.  

Esta cera lleva al pueblu de Lluniego; apaecen llueu les primeres cases, amás del edificiu de les piscines municipales, a la esquierda. Alternen los edificios de viviendes modernos con otros tradicionales y de tipoloxía obrera; nun espaciu abiertu a mano derecha del camín, hai tamién dellos horros y paneres mui alteriaos pero d’interés pola so decoración. Una panera asitiada énte la ilesia destaca pola so decoración tallada, qu’inclúi dende un escudu d’armes a una inscripción qu’indica “Año de 1800”.

Pásase delantre del centru de salú, casona vieya con escudu na so fachada y al pie de delles viviendes con grandes corredores nes sos plantes cimeres, llegándose de siguío a la ilesia parroquial, a mano esquierda del camín, con un monumentu a los mineros al llau y un parque pequeñu delantre.

Pasada la ilesia síguese de frente, ente más cases tradicionales, onde son frecuentes los corredores de madera, y yá na parte final del pueblu apaez a la derecha’l cementeriu, arrodiáu por un muriu altu de piedra, xusto delantre del accesu al principal conxuntu monumental d’esta localidá, la torre de los Quirós, el palaciu vecín de los Bernaldo de Quirós y la ponte vieya de piedra sobre El Río Nalón.

Pasáu esti conxuntu, síguese pel arcén de la carretera AS-242 (yá ensin cera), dexando atrás les últimes cases de Lluniego, amás d’un esvíu pa dir a Santianes y Tudela Agüeria. Pásase debaxo d’un viaductu de l’autovía y llégase, pela carretera, a la ponte moderna de Lluniego, proyectada en 1780 pol arquitectu Manuel Reguera, y que cunta con una gran calzada d’aproximación, ente murios de piedra, qu’antecede a la ponte puramente dicha, pela que se crucia’l ríu.

Depués de cruciar El Río Nalón llégase a El Portalgo, cola oficina vieya de peaxe del real portalgu a la esquierda. Detrás d’esta construcción, nun barriu pequeñu surdíu alredor d’ella, destaca un xalé de promoción indiana, allugáu nuna parcela que tien nel xardín una palmera, y una casona con corredor, de tipoloxía tradicional asturiana.

Dexada atrás la casa de peaxe, síguese pela derecha, per un camín estrechu de piedra, con tramos d’empedráu natural, que pasa ente árboles y que xube en cuesta empinada pela lladera del monte Corona, dexando contemplar, a mano derecha, bones perspectives de la ponte sobre’l ríu y del polígonu industrial de Lluniego. Más p’alantre, va poder vese de frente’l pueblu de Manzanea.

Depués d’unos 700 metros de percorríu per esta pista, llégase a la vera d’una vivienda unifamiliar, que se pasa debaxo d’ella, travesando una portiella y llegando a una zona llana col firme formigoniáu, con una gran construcción a la esquierda, destinada a servicios asistenciales. Síguese pa la esquierda, al pie de les instalaciones d’esta institución y al llau de dellos campos de fútbol; a la derecha, en pasándolos, gárrase’l segundu esvíu a la derecha qu’apaez, xusto primero de llegar a la llende ente los conceyos d’Uviéu y La Ribera, per una pista empedrada que xube ente árboles, praos y dalgún tramu de muriu llateral de piedra. Tres d’un percorríu de mediu quilómetru, llégase al pueblu de Picullanza, pasando entós el camín a tar asfaltáu. Tuércese a la derecha, travesando’l pueblín, ente cases tradicionales con corredores de madera y dalguna panera de grandes proporciones.

En pasando al pie d’una casa de dos pisos, con un gran corredor de madera nel d’enriba, nuna curva llégase a un encruz onde’l camín sigue pela derecha, continuando per una carretera asfaltada que xube una cuesta pa pasar al llau d’una panerona que detrás tien una casona de tipoloxía mariñana y una casa ente murios llaterales de piedra con corredor na planta cimera, nel llugar de La Venta l’Aire.

En dexando atrás esti conxuntu, sigue xubiéndose pela carretera hasta que s’abandona na siguiente curva, pa siguir de frente per un camín formigoniáu llendáu polos murios de zarru, de piedra, d’una vivienda moderna allugada a la derecha, a más altura que’l camín, y con praderíes a la esquierda. Dende esti puntu tiense la primer vista de la ciudá d’Uviéu, al fondu, debaxo d’El Monte Naranco.

Síguese per esta pista, que pasa ente praos y dalguna casa sola, torciendo a la derecha nel primer biforcu de caminos qu’apaez, y pasando, tres unos 400 metros, a dir per una sienda de tierra y piedra, llendada nun tramu curtiu por ocalitos na vera derecha. Llégase al pueblu de Samiguel, xusto na llende ente los conceyos de La Ribera y Uviéu.

El camín (agora una pista asfaltada) pasa pel mediu de les edificaciones, al pie d’una panera y un horru; sigue depués per un tramu onde la ruta va tar delimitada por muries de piedra, hasta llegar a una casa de tipoloxía mariñana. Pasada esta vivienda, la ruta pasa a ser una sienda de tierra, más p’alantre empedrada, que baxa ente árboles, murios de piedra y praos. Depués d’un percorríu d’unos 600 metros, desemboca nuna carretera, en curva, y síguese pel arcén a la esquierda. El Camín baxa y avanza poco depués de frente, nun cruz con otra vía que parte pa la esquierda, pasando de siguío énte una casería pequeña, con trés construcciones y un horru, alliniaos a entrambos llaos de la carretera, nel núcleu de La Venta, pasándose depués, tres d’una curva zarrada, xunto a una nave llarga de piedra.

Xúbese pela carretera ente praos y dalgún árbol, dexando atrás un esvíu a la esquierda con una gran casería y un horru.

Síguese de frente pasando al pie d’otra casería y dexando a mano esquierda otru esvíu, siguiendo la xubida y dexando atrás dalguna casería sola, en Caxigal, pa llegar de siguío a un llavaderu cubiertu, a mano esquierda del camín. Pasáu esti llavaderu, llégase bien llueu al pueblu de Los Prietos, que s’arrodia siguiendo’l trazáu de la carretera, dexando’l núcleu de la población a mano esquierda del Camín.

Síguese pela carretera pasando pela zona d’El Caserón, onde son munchos los horros y paneres y les construcciones tradicionales. La carretera acaba confluyendo, síguese de frente y pásase al pie d’una construcción de dos plantes dedicada a un negociu hosteleru. Llégase a una zona yá con cera, pela que se baxa, ente viviendes unifamiliares y zarros de parceles, yá en La Manxoya.

Llueu se pasa al pie de les murueques de la ilesia vieya de Santiago de La Manxoya, a mano derecha del camín, a una cota daqué superior, pa, malapenes 50 metros depués, llegar a la ilesia moderna de La Manxoya, a mano esquierda del camín, col campusantu al llau, nuna parcela arrodiada por un muriu de piedra, que tien dientro una estatua al pelegrín.

Pasada la ilesia, sigue baxándose pel barriu de La Bolgachina y crúciase per debaxo d’un viaductu de la ronda de circunvalación d’Uviéu, siguiendo recto pela cai Armando Collar, ente bloques modernos d’edificios, n’otros 340 metros pa, de siguío, esviase a la esquierda pela cai de La Malatería, una pista formigoniada que llinda col Parque d’Iviernu, a la vera de la cerca pa zarrar lo que yera la malatería de San Llázaro, nel barriu uviedín del mesmu nome.

Síguese per esta sienda, ensin esviase, hasta llegar a la cai Gil Blas, onde se tuerce a la derecha pa pasar énte la fachada principal de lo que yera la malatería.

Pasada la malatería, tuércese a la esquierda, síguese pela cai Aurelio de Llano y llégase a la intersección cola Ronda Interior d’Uviéu, na cai Muñoz Degraín, nun puntu onde ta una estatua llevantada nel 2007 y dedicada a Santiago Pelegrín.

Crúciase la ronda y síguese pela cai Leopoldo Alas, arrodiando la parcela onde ta’l Seminariu Metropolitanu d’Uviéu, que tien nes sos instalaciones un albergue de pelegrinos. Nesta cai hai dellos bloques de viviendes de promoción pública de los años 1950.

A lo cabero de la cai, nun encruz asitiáu al principiu del parque d’El Campillín, síguese derecho, pela cai de La Madalena, yá nel cascu históricu d’Uviéu, pasando frente al antiguu palaciu de Vistalegre y la residencia de La Madalena.

Esta cai desemboca na plaza de la Constitución, presidida pola Casa Conceyu d’Uviéu, que se traviesa’l so arcu central pa llegar a la cai Cimavilla, que lleva ente edificios vieyos a la cai de La Rúa, arrodiada en parte polos edificios qu’integren el Muséu de Belles Artes d’Asturies. El destín final de la cai ye la plaza d’Alfonso II, presidida pola Catedral de San Salvador, puntu final d’esta etapa y del Camín del Salvador.

Compartir

Share on facebook
Share on twitter
Share on linkedin
Share on pinterest
Share on email
Scroll to Top